Pesalem 132:2-18

²Taêm ênam gebe eŋ kêtôc lêma gêdêŋ Apômtau ma gêjac mata biŋ gêdêŋ Jakobnê Anôtô ŋaclai gebe

³“Aê gabe jasô ŋoc beclêlôm atom ma jasa tauc sic janêc ŋoc mê atom,

⁴aê gabe matocanô ênam kauc bêc ma matoc êmôp êtu bêcŋa atom,

⁵jamoa e jatap Apômtaunê mala teŋ sa ma jatap Jakobnê Anôtô ŋaclai nê andu teŋ sa acgom.”

⁶Biŋŋanô, aêac aŋgôŋ Eprata ma aŋô andu tau ŋawae, go atap sa aŋga kôm Jarŋa.

⁷Aêac asôm gebe “Ajôc, tasô ênê andu ŋalêlôm tana nadau tauŋ ma tateŋ mec tanêc ênê akaiŋ ŋataoŋ.”

⁸O Apômtau, ôndi tonêm poac ŋakatapa ŋaclaiŋa ma ôna malam ôlêwaŋ taômŋa.

⁹Aômnêm dabuŋwaga sêsô biŋgêdêŋ êtu nêŋ ŋakwê ma aômnêm lau mansaŋ sênam lasê totêntac ŋajamgeŋ.

¹⁰Ôtiŋ nêm ŋac, taŋ goeŋ oso eŋ naŋ, su atom êtu nêm sakiŋwaga Dawidŋa.

¹¹Apômtau kêtôc lêma ma kêsôm nê biŋ kêtu tôŋ gêdêŋ Dawid. Eŋ kêsôm tobiŋŋanôgeŋ ma oc ênam ôkwi atom gebe “Aê gabe jakêŋ aôm taôm latôminêŋ teŋ êŋgôŋ aômnêm lêpôŋ.

¹²Latômi embe sêmansaŋ aêŋoc poac to ŋoc biŋsu, taŋ jandôŋ êsêac naŋ, oc nêŋ wakuc sêŋgôŋ aômnêm lêpôŋ endeŋ tôŋgeŋ.”

¹³Biŋŋanô, Apômtau kêjaliŋ Sion sa ma taê gêjam gebe êtu ênê andu.

¹⁴Ma eŋ kêsôm gebe “Aê maloc jalêwaŋ tauc endeŋ tôŋgeŋŋa naŋ tonec. Aê taêc gêjam kêtu tôŋ tec jaŋgôŋ tonec.

¹⁵Aê gabe janam mec êsêacnêŋ gêŋ êlêlêc su. Aê gabe jakêŋ mo êôc nêŋ lau ŋalêlôm sawa tôŋ.

¹⁶Aê gabe jakêŋ moasiŋ êtu nêŋ dabuŋwaganêŋ ŋakwê. Êsêacnêŋ lau mansaŋ oc sênam lasê totêntac ŋajamgeŋ.

¹⁷Aê gabe Dawidnê ŋaclai êpoa lasê aŋga tônê. Aê kamasaŋ aêŋoc ŋac, taŋ gaeŋ oso eŋ naŋ, nê jakaiŋ teŋ kêkô.

¹⁸Aê jakêŋ majeŋ êtu ênê ŋacjonêŋ ŋakwê, mago eŋ êkuc sunsuŋ ŋaôsic-ôsic êŋgôŋ eŋ môkêapac.”