Yabura 132:2-18

²A naxa a rakali Alatala bɛ, a naxa a rakali Yaxuba Marigi Ala Sɛnbɛma bɛ,

³«N mu soma n xɔnyi, n mu n sama,

⁴n mu n ya maxima, n mu n ya magirama,

⁵han n sa lingira sɔtɔma Yaxuba Marigi Ala Sɛnbɛma bɛ tɛmui naxɛ.»

⁶Won nu bara a xa fe mɛ Efarata bɔxi ma. Won naxa a li Yaara xa xɛ ma.

⁷«Won xɛɛ a xa hɔrɔmɔlingira yire, won xa won xinbi sin a santide ya i.

⁸Alatala, keli i xa talu i sabatide, i tan nun i xa saatɛ kankira.

⁹I xa sɛrɛxɛdubɛe xa lu xunnakeli kui, i dugutɛgɛe xa e sɛɛwɛ xui rate.»

¹⁰I xa konyi Dawuda xa fe ra, i naxa mɛɛ i xa mangɛ sugandixi ra.

¹¹Alatala a kali nɛ Dawuda bɛ, marakali naxan mu kanama, a naxɛ, «N i bɔnsɔɛ nde nan dɔxɔma i xa kibanyi ma.

¹²Xa i xa die sa n ma saatɛ binya, e n ma yaamarie rabatu, e xa die fan luma nɛ i xa kibanyi ma abadan.»

¹³Barima Alatala bara Siyoni sugandi, mɛnni nan nafanxi a ma a sabatide ra.

¹⁴A naxɛ, «N sabatide nan be ra abadan. N dɔxɔma be n ma kibanyi kui barima be rafanxi n ma.

¹⁵N barakɛ sama nɛ Siyonikae ma, n baloe fi e xa misikiinɛe ma.

¹⁶N kisi fima nɛ e xa sɛrɛxɛdubɛe ma, e dugutɛgɛe bɛɛti bama nɛ sɛɛwɛ kui.»

¹⁷«Be n Dawuda sɛnbɛ rakelima nɛ, n naiyalanyi raminima nɛ n ma Mixi Sugandixi bɛ.

¹⁸N yaagi dusuma nɛ a yaxuie xun na, kɔnɔ n nɔrɛ dusuma a tan nan xun na.»