Y Salmo Sija 132:2-18

²Jaftaemano na manjula gui as Jeova yan japromete y Gaesisiña gui as Jacob;

³Magajet na ti jujalom gui tabetnaculon y guimajo, ni jufalag gui camajo:

⁴Ti junamatujog y atadogco; ni junamaego y lasas y atadogco,

⁵Asta qui jusodayo y lugat para si Jeova, y tabetnaculo para y Gaesisiña gui as Jacob.

⁶Estagüe na injingog masangangüe guiya Efrata ya inseda gui fangualuan qui jalomtano.

⁷Infanjalom gui tabetnaculuña: inadora gui menan y fañajangan adengña.

⁸Cajulo, O Jeova, gui lugat y descansomo: jago yan y atcan y minetgotmo.

⁹Polo y mamalemo sija ya ufanminagago ni y tininas: ya y mañantosmo sija ufanagang ni y minagof.

¹⁰Pot y naan y tentagomo as David, chamo bumibira y matan y pinalaemo.

¹¹Si Jeova manjula minagajet gui as, David; ti ubira güe; y tinegcha y tataotaomo, juplanta gui jilo tronumo.

¹²Yaguin jaadaje y famaguonmo y tratujo, yan y testimoniojo ni y jufanagüe sija, asta y famaguonñija locue ufanmatachong gui tronumo para taejinecog.

¹³Sa si Jeova guinin jaayeg Sion; este jadesea para sagaña.

¹⁴Este y lugat y descansoco para taejinecog: este nae jusaga; sa este judesea.

¹⁵Bae jubendise dangculo y prebensionña: ya bae junafannajong y mamobleña ni y pan.

¹⁶Junafanminagago locue y mamaleña sija ni y satbasion: yan y mañantosña sija ufanagang managang ni y minagof.

¹⁷Ayonae junadoco y canggelon David: guinin jufamauleg y candit para y pinalaejo.

¹⁸Bae junafanminagago y enemiguña sija ni y minamajlao; lao y jiloña nae unamagas y coronaña.