Pisalem 132:2-18

²Meenei Dimaadua, Goe gi langahia e Goe di mee a mee dela ne hagababa, di hagababa a mee dela ne hai adu gi di Goe, di Gowaa Aamua, di God o Jacob boloo:

³“Au hagalee hana e ulu gi lodo dogu hale, be e kii i hongo dogu hada.

⁴Au hagalee hagamolooloo be e kii

⁵gaa dae loo gi dagu hagatogomaalia dagu gowaa ang gi Dimaadua, di hale e noho ai di Gowaa Aamua, di God o Jacob.”

⁶Gimaadou gu longono i Bethlehem i di hai o Tebedebe o di Hagababa, gei gimaadou guu gida di maa i lodo di gowaa maalama i Jearim.

⁷Gimaadou gu helekai, “Gidaadou gaa hula gi di Hale o Dimaadua, gaa hai tadau daumaha i mua di lohongo o Maa.”

⁸Meenei Dimaadua, hanimoi gi di Hale Daumaha, madalia Tebedebe o di Hagababa, go di ada o mogobuna, e noho i kinei ga hana hua dono hagaodi ai.

⁹Au daangada hai mee dabu gi heia nia mee ala e donu i nia madagoaa huogodoo, au daangada gi wwolowwolo tenetene!

¹⁰Goe guu hai dau hagababa gi dau dangada hai hegau go David. Meenei Dimaadua, Goe hudee hudua gi daha dau king dela ne hilihili.

¹¹Goe guu hai dau hagababa mau dangihi gi David, go di hagababa dela hagalee huli Kooe: “Au gaa hai di tama e dahi i lodo au dama daane e hai di king, mee gaa dagi i oo muli.

¹²Maa au dama daane la ga manawa dahi gi dagu hagababa mo agu haganoho ala ne wanga gi digaula, gei nia dama daane digaula gaa noho labelaa gi hongo do lohongo king.”

¹³Dimaadua gu hilihili a Zion, Mee e hiihai e hai dono hale i di gowaa deelaa:

¹⁴“Deenei di gowaa dela ga noho iei Au gaa hana hua beelaa, go di gowaa deenei dela e hiihai ginai Au belee dagi.

¹⁵Au ga haga maluagina a Zion gi nia hagadilinga hagahumalia huogodoo ala e hiihai ginai mee. Au gaa hai digau hagaloale a maa gi maaluu gi nia meegai.

¹⁶Au ga haga maluagina digau hai mee dabu a maa i nia mee huogodoo ala e hai go digaula, gei nia daangada a maa ga daahili mo di wwolowwolo tenetene.

¹⁷Go di gowaa deenei dela e hagagila aga ai dagu dangada mai di hagadili o David e hai di king aamua, gei Au ga duudagi adu hua beelaa gi muli nia mogobuna o dogu king dela ne hilihili.

¹⁸Au gaa hai nia hagadaumee o maa gi langaadia huoloo, gei dono henua king gaa gila humalia ge haadanga lamalia.”