1Ba nez ẕen naken chegak benne' ka' žóntezgake' da' naken dot da' li, benne' ka' žóntezgake' ka ẕnna da' wnná X̱anžo Dios.
2Ba nez ẕen naken chegak benne' ka' žóntezgake' ka žsedle diža' chie' žo'o, na' dot yichj ḻáẕdo'gake' žóngake' kan ẕnnan.
3Benne' ki batkle žóngake' da' ẕinnj, benne' ka' žóntezgake' ka ẕnna Dios žaḻa' góngake'.
4Le', X̱anto' Dios, bzejni'ilo' neto', nich bento' dot kan zej nak da' ka' wnnakzo' Le'.
5Žak ḻáže'ḻi'a gónteza' kakze ẕnna x̱tižo'o,
6na' batkle yedoe'ela', cha' kwi'a wnné yoe gona' ka nak da' wnnakzo' Le'.
7Ḻo yeḻa' ḻi ḻaže' chia' wká'n ẕena' Le' kate' ba bsedla' da' bchi'a ḻažo'o, da' naken chawe'.
8Gónteza' ka nak da' ka' ẕchi'lo' neto', na' batkle kwej yichjo' neda'.
9¿Nakx̱ gak gon to benne' kwide' da' naken chawe'? Žaḻa' góntezbe' ka ẕnna x̱tižo'o.
10Dot ḻaža'a žon byena' gona' da' ẕnnakzo' Le'. Bi go'o latje wzóa' cheḻa'ale dan' wnnó'.
11Ḻo yichj ḻáẕda'wa' žónteza' ka nak da' ẕnno' Le' nich bi gona' doḻa', na' bi wži'a chio' Le'.
12La'y nako' Le', X̱ana' Dios. Bsedle neda' da' ẕchi'lo' neto'.
13Ḻen žoá'akza' bzenla' benne' ka' ka nak da' bchi'a ḻažo'o.
14Žebéḻe'ežela' žónteza' ka žsedle diža' chio' neto', ka ẕbégekle benne' ka' zej nápḻi'e yeḻa' wnni'a.
15Wláb ḻaža'a ka nak da' wnnakzo' Le', na' wsedla' binlo da' ẕnno' žaḻa' gonto'.
16Yebéḻe'ela' gona' ka nak da' ži'o neto', na' bi gaḻ ḻaža'a kan ẕnna x̱tižo'o.
17Ben chawe' neda', wen žin chio', na' soa' nbana', na' gónteza' ka ẕnna x̱tižo'o.
18Bsaljw yej ḻawa' nich ḻe'ela' da' ẕente da' nyejwn ḻo da' wnnakzo' Le'.
19Naka' ka to benne' ẕdaze' ḻo yežlyó nga. Bzejní'il neda' da' ẕchi'lo' neto'.
20Žedó ḻaža'a dan' dot ḻaža'a žak ḻaža'a gónteza' da' ẕchi'a ḻažo'o.
21Ẕdiḻo' benne' ka' ẕka'n ẕen kwíngake', benne' wen da' ẕinnj ka', benne' ka' ẕzóagake' cheḻa'ale da' wnnakzo' Le'.
22Bi go'o latje no benne' nne zi'e chia', na' wka'ne' neda' ka'ze, dan' žónteza' ka žsedlo' neto'.
23Ḻezka' benne' wnná bia' ka' wnnégake' chia', san neda', wen žin chio', ẕlab ḻaža'a ka nak x̱tižo'o.
24Da' žaz ḻaža'a naken da' žsedle diža' chio' neto', na' ẕzejni'ilen neda'.
25Že' be' da' nakkza' zedle dan' zoa' gata'. Bzoa choch yichj ḻáẕda'wa' ḻen x̱tižo'o.
26Bḻoe'ela' Le' da' žona', na' bezi'o neda'. Bsedle neda' da' ẕnna x̱tižo'o.
27Bzejní'il neda' nich gak gona' da' ẕchi'lo' neto', nich wláb ḻaža'a ka zej nak da' ẕente ka' da' beno'.
28Žedó ḻaža'a dan' žak nyache' ḻaža'a. Ben choch neda' ḻen x̱tižo'o.
29Bi go'o latje gaka' benne' wen ḻaže', na' ḻo yeḻa' žeyache' ḻaže' chio' bsedle neda' da' wnnakzo' Le'.
30Ben byena' gona' da' naken dot da' li, na' ži'a wnné yoe gona' da' bchi'a ḻažo'o.
31Žónteza' ka žsedle diža' chio' neto'. X̱ana' Dios, bi go'o latje yedoe'ela'.
32Gónteza' ka zej nak da' ka' wnnakzo' Le', kate' wzejní'iželo' neda'.
33X̱ana' Dios, bsedle neda' nich gona' ka ẕnna x̱tižo'o, na' gónteza' ka naken na' zejte ža gata'.
34Bzejní'il neda', na' gónteza' da' bchi'lo' neto', na' dot ḻaža'a gona' ka ẕnnan.
35Bḻoe'el neda' nich gona' da' wnnakzo' Le', dan' žak ḻáže'kza' gona' ka naken.
36Ben ga chaz ḻaža'a gona' ka žsedle diža' chio' neto', nich bi dan ḻaža'a yeḻa' gape.
37Bi go'o latje wká'n ẕena' lo'a ka'. Ben choch yichj ḻáẕda'wa' nich gona' ka ẕnna x̱tižo'o.
38Ben ka ẕnna x̱tižo'o da' bchebe ḻažo'o chia' neda', wen žin chio', nich žeba' Le'.
39Bde cheḻa'ale da' ẕnnégake' chia', dan' ẕžeba', dan' chawe' zej nak x̱tižo'o ka'.
40Žak ḻaža'a gona' da' bchi'lo' Le' neto'. Ben choch yichj ḻáẕda'wa' ḻen da' chawe' chio'.
41Da, yeyache' ḻáže'lo' neda', X̱ana' Dios. Da, yesló' neda', ka bchebe ḻažo'o gono'.
42Žecheba' ḻaw bennen' ẕka'ne' neda' ka'ze, ẕnnia': “Žx̱en ḻaža'a x̱tižo'o, X̱ana' Dios.”
43Ben ga sóateza' wchaḻja' diža' da' li chio', dan' žx̱en ḻaža'a da' ẕchi'a ḻažo'o.
44Gónteza' kan ẕnna da' wnnakzo' Le'. To chi'ize góntezan'.
45Lakza' neda' dan' ži'a wnné yoe gónteza' da' wnnakzo' Le'.
46Wchaḻjkza' diža' chio' ḻawgak benne' wnná bia' ka', na' batkle yedoe'ela'.
47Yebéḻe'ekzla' gona' da' wnnakzo' Le', dan' nží'iḻe'elan'.
48Žechebe ḻaža'a gona' da' bchi'lo' neto', dan' nži'ila', na' wláb ḻaža'a ka ẕnna x̱tižo'o.
49Bejsá' ḻaže' da' wchebe ḻažo'o chia' neda', wen žin chio', dan' žx̱en ḻaža'an.
50Katen' wẕáka'ḻi'a, wzóa to da' beyón ẕenen neda', dan' ben choch x̱tižo'o yichj ḻáẕda'wa'.
51Benne' ka' ẕka'n ẕen kwíngake' ẕnnégake' chia', san batkle wsana' da' wnnakzo' Le'.
52Chejsá' ḻaža'a ka nak da' bchi'a ḻažo'o ža ni'te, dan' žeyón ẕenen neda', X̱ana' Dios.
53Ẕža'a neda', na že' zedla' ni'a chegak benne' ka' žóngake' da' ẕinnj, benne' ka' ẕzóagake' cheḻa'ale da' wnnakzo' Le'.
54X̱tižo'o naken to da' žoḻa' kate' ne zoa' to yežlyó da' žen' zi'to' ga zoa laža'.
55Žel chejsá' ḻaža'a La la'y chio', X̱ana' Dios, na' gónteza' ka ẕnna da' wnnakzo' Le'.
56Gaken yeḻa' ba nez ẕen chia' dan' gónteza' da' bchi'lo' Le' neto'.
57Da' ẕdan ḻaža'a nakkzo' Le', X̱ana' Dios. Wnnakza' gónteza' ka ẕnna x̱tižo'o.
58Dot ḻaža'a ẕnnabla' Le' yido' gákḻeno' neda'. Beyache' ḻaže'l neda' kan wnnakzo' gono'.
59Bwia' binlo ka zej nak da' ka' bena', na' da' yoble žona' ka žsedle diža' chio' neto'.
60Ben byena', na' bi wžeḻ-la' gónteza' ka nak da' wnnakzo' Le'.
61Do yeḻj chegak benne' wen da' ẕinnj ka' nžejen neda', san bi na' gaḻ ḻaža'a ka ẕnna da' bchi'lo' neto'.
62Žel žeyasa' na' ẕka'n ẕena' Le' dan' chawe' nak da' ẕchi'a ḻažo'o.
63Naka' toze ḻen yógo'te benne' ka' ẕžébegake' Le', benne' ka' žóntezgake' ka nak da' wnnakzo' Le'.
64X̱ana' Dios, nža' yežlyó yeḻa' žeyache' ḻaže' chio'. Bsedle neda' gona' ka ẕnna x̱tižo'o.
65Žon chawo'o neda', wen žin chio'. X̱ana' Dios, žonon' ka ẕnnakze x̱tižo'o.
66Bsedle neda' da' nak chawe' nich chejni'ilan', dan' žejḻi'a da' wnnakzo' Le'.
67Néžwte ka bzex̱jo' neda' wdía' cheḻa'ale, san na'a žónteza' ka ẕnna x̱tižo'o.
68Nako' chawe', na' ẕnno' gon chawo'o neto'. Bsedle neda' nich gona' ka ẕnna x̱tižo'o.
69Benne' ka' ẕka'n ẕen kwíngake' wnnégake' chia' da' wen ḻaže', san dot ḻaža'a gónteza' da' bchi'lo' neto'.
70Bi yo'o yeḻa' žejní'il ḻo ḻáẕdo'gak benne' ka' san neda' žaz ḻaža'a gona' da' wnnakzo' Le'.
71Chawe' nak bzex̱jo' neda', nich wsedla' gona' ka ẕnna x̱tižo'o.
72Nákḻe'eže chawe' da' bchi'lo' neda', ka zante mil mežw oro, na' plat.
73Ḻen na'kzo' beno' neda' káteze naka'. Bzejní'il neda' nich wsedla' gona' da' wnnakzo' Le'.
74Benne' ka' ẕžébegake' Le' ḻé'egekle' neda', na' yebégekle' dan' žx̱en ḻaža'a gak kan ẕnna x̱tižo'o.
75X̱ana' Dios, nnezla' nak chawe' kan ẕchi'a ḻažo'o, na' ḻo yeḻa' ḻi ḻaže' chio' bsaka' zi'o neda'.
76Na'a ḻo yeḻa' žeyache' ḻaže' chio' beyón ẕen neda' káteze nak da' bchebe ḻažo'o gono' chia' neda', wen žin chio'.
77Beyache' ḻaže'l neda' nich soa' nbana' dan' žaz ḻaža'a gona' da' wnnakzo' Le'.
78Ben ga yedoé'egekle benne' ka' ẕka'n ẕen kwíngake', dan' ẕnnégake' chia', na' bi be bena' chégake', san neda' wláb ḻaža'a ka nak da' bchi'lo' Le' neto'.
79Ben ga ḻa'gak benne' ka' ẕžébegake' Le', nich yéngekle' chia', na' wsédgekle' da' žsedle diža' chio' neto'.
80Ben ga gona' dot ḻaža'a ka ẕnna x̱tižo'o, nich batkle yedoe'ela'.
81Že' zedle be' da' nakkza' dan' ẕbeza' ža yido' yesló' neda'. Žx̱en ḻaža'a gaken kan ẕnna x̱tižo'o.
82Že' bxin yej ḻawa' dan' žénela' yenla' da' nno', na' ẕnnia': ¿Batx̱kze yeyón ẕeno' neda'?
83Ẕbiža' ka to že'e yid dan' naḻan' ḻaw yi', san bi na' gaḻ ḻaža'a gona' ka ẕnna x̱tižo'o.
84¿Balx̱ ža soa' nbana' neda', wen žin chio'? ¿Batx̱kze gono' zi' benne' ka' ẕbia ḻáže'gake' neda'?
85Benne' ka' ẕka'n ẕen kwíngake' bché'ngake' to yežw gan chejbix̱a' neda'. Batkle žóngake' ka ẕnna dan' wnnakzo' Le'.
86Yógo'te da' bchi'lo' Le' neto' naken dot da' li. Gokḻen neda' dan' ẕbia ḻáže'gake' neda', na' bi be bena' chégake'.
87Yeláte'ze bétgake' neda', san bi na' wsana' gona' da' wnnakzo' Le'.
88Ḻo yeḻa' žeyache' ḻaže' chio' ben choch yichj ḻáẕda'wa', nich gónteza' ka žsedle diža' chio' neto'.
89X̱ana' Dios, to chi'ize zoa x̱tižo'o ya'abá na'le.
90Yeḻa' ḻi ḻaže' chio' žinen chegak yógo'te kwe' benách ka'. Le' bzoa chochkzo' yežlyó, na' zoakzen.
91Ni'a che da' wnnakzo' zej nnita' yógo'te da' zej de, na' yógo'ten žóngaken žin chio'.
92Chela' bi wyáz ḻaža'a da' wnnakzo' Le' bache wnitla' ni'a che da' wẕáka'ḻi'a.
93Batkle gaḻ ḻaža'a da' bchi'lo' neto', dan' ni'a chen ba ben chocho' neda'.
94Beslá neda' dan' naka' neda' chio' Le' na' žon byena' gona' kan ẕnna x̱tižo'o.
95Benne' wen da' ẕinnj ka' bwíagake' neda' nich gak wžía yí'gake' neda', san neda' ẕlab ḻaža'a da' žsedle diža' chio' neto'.
96Ba bḻe'ekzla' ẕde chegak yógo'te da' zej de yežlyó, san da' ka' wnnakzo' Le' batkle te chégaken.
97Dios, nží'iḻe'ela' da' žsedlo' neto'. Dot ža ẕlab ḻaža'a ka ẕnnan.
98Ni'a che da' bchi'lo' neto', beno' ga žejní'ižela' ka benne' ka' ẕžá'agake' neda' dan' zóaḻenteze da' wnnakzo' neda'.
99Žejní'ižela' ka benne' ka' žsédgekle' neda' dan' ẕlab ḻaža'a da' žsedle diža' chio' neda'.
100Ba žejní'ižela' ka benne' gole ka' dan' žónteza' ka ẕnna da' bchi'lo' Le' neto'.
101Ben byena' bi be gona' da' bi nak chawe', nich gónteza' ka ẕnna x̱tižo'o.
102Bi bsana' žona' kan bchi'a ḻažo'o dan' bsedlo' Le' neda'.
103X̱tižo'o naken ka to da' ẕix̱ḻe'e ḻo žoa'a. Nakžen ẕix̱ ka nak da' ẕix̱ che bez ḻo žoa'a.
104Ni'a che da' wnnakzo' Le' naka' benne' sina'. Che ḻen bi ẕḻe'ela' chawe' yógo'te da' wen ḻaže'.
105Ka to yi' nak x̱tižo'o gan ẕda', dan' žsa'nín' nez da' ẕzá'ḻena'.
106Bzetja' La la'y chio', Dios, na' bchebe ḻaža'a gónteza' ka bchi'a ḻažo'o da' naken chawe'.
107X̱ana' Dios, ẕzáka'ḻi'a. Ben choch neda' káteze bchebe ḻažo'o gono'.
108X̱ana' Dios, žáta'yoela' Le' si'o da' žoe ḻawa' Le'. Bsedle neda' gona' ka bchi'a ḻažo'o.
109Že' zédtezla' dan' zoa' gata', na' bi na' gaḻ ḻaža'a gona' da' wnnakzo' Le'.
110Benne' wen da' ẕinnj ka' bzáljgake' do yeḻj nich senen neda', san neda' bi bsana' žona' da' bchi'lo' Le' neto'.
111Ba wžía' da' žsedle x̱tižo'o neda' nich gaken da' gápekza' to chi'ize, dan' nak x̱tižo'o da' ẕdan ḻáže'ḻi'a.
112Zoakze ḻáẕda'wa' gónteza' ka ẕnna x̱tižo'o na' zejte ža gata'.
113Bi ẕḻe'ela' chawe' benne' ka' ẕḻoé'ezele kwíngake' chawe', san nži'ila' da' wnnakzo' Le'.
114Nako' Le' ka to yo'o gan ẕga'na' chawe', na' ka to da' žape chi'in neda', dan' žx̱en ḻaža'a gaken ka ẕnna x̱tižo'o.
115Le kwas gan zoa', ḻe'e, benne' wen da' ẕinnj ka', dan' gónteza' ka bchi'le Dios chia' neto'.
116Ben choch neda' káteze ẕnna x̱tižo'o, na' soa' nbana', na' bi yedoe'ela' ni'a che dan' žx̱en ḻaža'a.
117Ben choch neda', na' la', na' chaz ḻáže'teza' x̱tižo'o.
118Blej bchochj yógo'te benne' ka' bi žóngake' kan ẕnna x̱tižo'o dan' nak yeḻa' žejní'il chégake' da' wen ḻaže'.
119Yógo'te benne' wen da' ẕinnj ka' zej nake' ka bebe ḻo yežlyó nga. Che ḻen nži'ila' da' žsedle diža' chio' neto'.
120Žẕize beḻa' žen chia' dan' ẕžeba' Le', san žapa' ba la'ne da' ẕchi'a ḻažo'o, da' naken chawe'.
121Žona' ka nak da' bchi'a ḻažo'o, da' naken chawe'. Bi wdío' neda' ḻo na'gak benne' ka' žsaka' zí'gake' neda'.
122Bchebe ḻažo'o chia' gon chawo'o neda'. Bi go'o latje benne' ka' ẕka'n ẕen kwíngake' wsaka' zí'gake' neda'.
123Gok yej ḻawa' dan' ẕbeza' yido' yesló' neda', na' wchi'a ḻažo'o neto' kan ẕnna x̱tižo'o.
124Ḻo yeḻa' žeyache' ḻaže' chio' ben chawe' neda', wen žin chio', na' bsedle neda' gona' ka ẕnna x̱tižo'o.
125Bzejní'il neda', wen žin chio', nich gónbi'a da' žsedle diža' chio' neto'.
126X̱ana' Dios, ba bžin ža bi da' gono', dan' bzóagake' cheḻa'ale da' wnnakzo' Le'.
127Che ḻen neda' nží'ižela' da' bchi'lo' neto', ka ya oro, na' ka da' záka'že ka ya oron'.
128Che ḻen žekla' záka'že da' wnnó' ka yógo'te da' de, na' bi ẕḻe'ela' chawe' yógo'te da' zej naken da' wen laže'.
129Žebanlto' ka žsedle diža' chio' neto'. Che ḻen dot ḻaža'a žónteza' ka ẕnnan.
130Kate' no benne' bi gak chejni'ile' x̱tižo'o, x̱tižo'o na'kze žsa'nín' ḻe'. Ẕzejni'ilen benne' gax̱jw ḻaže' ka'.
131Wsalja' žoa'a, na' kwez ḻaža'a dan' žak ḻaža'a gónbi'a da' wnnakzo' Le'.
132Bwia neda', na' beyache' ḻaže'l neda', kan žóntezo' chegak benne' ka' zej nži'ile' Le'.
133Ben ga gónteza' ka ẕnna x̱tižo'o, na' bi go'o latje da' ẕinnj nna bian' neda'.
134Beslá neda' ḻo na'gak benne' yichj ža'a ka', na' gónteza' ka nak da' bchi'lo' neto'.
135Ben chawe' neda', wen žin chio', na' bsedle neda' gona' ka ẕnna x̱tižo'o.
136Nis wžeža' goken ka to yegw nis dan' bi žongak benne' ka' da' wnnakzo' Le'.
137X̱ana' Dios, chawe' nako' Le', na' ḻi ḻaže' nak ka ẕchi'a ḻažo'o neto'.
138Da' žsedle diža' chio' neto', dan' bdion' ḻo na'to', naken da' li, na' ḻi ḻaže'.
139Žedó ḻaža'a dan' žé'ḻi'a wnné yoe dan' goḻ ḻáže'gak benne' ka' bi ẕḻé'egekle' neda' chawe' ka ẕnna x̱tižo'o.
140Dot da' li nak x̱tižo'o, na' neda', wen žin chio', nži'ilan'.
141Naka' gax̱jw ḻaže', na' ẕzóagake' neda' cheḻa'ale, san bi na' gaḻ ḻaža'a da' wnnakzo' Le'.
142To chi'ize zoa da' ẕchi'a ḻažo'o, na' da' li nak da' bchi'lo' neto'.
143Da' ẕzáka'ḻi'a, na' da' zede zej nox̱en neda', san žaz ḻaža'a da' wnnakzo' Le'.
144To chi'ize nak ḻi ḻaže' da' žsedle diža' chio' neto'. Bzejní'il neda', na' soa' nbana'.
145Dot ḻaža'a žḻiža' Le', X̱ana' Dios. Ben chawe' neda', na' gónteza' ka ẕnna x̱tižo'o.
146Žḻiža' Le'. Gokḻen neda', na' gónteza' ka žsedle diža' chio' neto'.
147Žasa' néžwte ka ža'ní', na' žḻiža' Le'. Žx̱en ḻaža'a gak kan ẕnna x̱tižo'o.
148Kate' ba goḻe, ẕbeja' yele yej ḻawa', nich wláb ḻaža'a ka nak da' wnnakzo' Le'.
149Ḻo yeḻa' žeyache' ḻaže' chio' benle chi'a. X̱ana' Dios, ka nak da' bchi'a ḻažo'o ben choch neda'.
150Benne' ka' ẕbia ḻáže'gake' neda' zej nnita' góngake' chia' da' ẕinnj. Bsángake' da' ka' bchi'lo' neto'.
151X̱ana' Dios, zo' Le' gawze gan zoa'. Yógo'te da' wnnakzo' naken dot da' li.
152Ža ni'te ba nónbi'a da' žsedle diža' chio' neto', dan' bzo' cheto' to chi'ize.
153Bwia binlo ka ẕzáka'ḻi'a, na' beslá neda', dan' bi na' gaḻ ḻaža'a da' wnnakzo' Le'.
154Bechebe ḻo wlaza' neda', na' beya'w neda'. Ben choch neda' ḻen x̱tižo'o.
155Zedḻe'e gak lagak benne' ka' žebéj yíchjgake' Le', dan' bi ẕbé'gake' wnné yoe góngake' ka ẕnna x̱tižo'o.
156X̱ana' Dios, žeyache' ḻáže'ḻe'elo' benách chio' ka'. Ben choch neda' ka ẕnnakze x̱tižo'o gono'.
157Zanḻe'e zej nak benne' ka' ẕbia ḻáže'gake' neda', na' benne' ka' bi ẕḻé'egekle' neda' chawe', san bi na' wsana' žona' ka žsedle diža' chio' neto'.
158Bi ẕḻe'ela' chawe' benne' ka' žebéj yíchjgake' Le', benne' ka' bi žóngake' ka ẕnna x̱tižo'o.
159Bwia nga, X̱ana' Dios, ka nži'ila' da' bchi'lo' neto'. Ḻo yeḻa' žeyache' ḻaže' chio', ben choch neda'.
160Dot da' li nak x̱tižo'o, na' to chi'ize zoa da' ẕchi'a ḻažo'o Le'.
161Benne' wnná bia' ka' ẕbia ḻáže'gake' neda', na' bi be bena' chégake', san dot ḻaža'a žapa' x̱tižo'o ba la'ne.
162Žebéḻe'ežela' ḻo da' ẕnna x̱tižo'o ka žebele bennen' žežeḻ-le' to yeḻa' wnni'a ẕente.
163Bi ẕḻe'ela' chawe', na' bi ẕzi'a da' wen ḻaže', san nži'ila' da' bsedlo' neto'.
164Tža tža žoe ḻawa' Le' dan' nak chawe' ka ẕchi'a ḻažo'o neto'.
165Ẕga'n cháwe'gac benne' ka' zej nži'ile' da' žsedlo', na' bi be de da' gonen ga chejchégwgake'.
166X̱ana' Dios, ẕbeza' Le' yido' yesló' neda', na' žónteza' ka nak da' wnnakzo' Le'.
167Dot ḻaža'a žónteza' da' žsedle diža' chio' neto', na' nží'iḻe'ela' da' ẕnnan.
168Žónteza' ka ẕnna da' bchi'lo' neto', na' ka žsedle diža' chio' neto', na' ẕḻé'ekzlo' yógo'te da' žona'.
169X̱ana' Dios, benle da' žḻiža' Le'. Bzejní'il neda' ka ẕnna x̱tižo'o gono'.
170Benle da' ẕnnaba' ḻawo' Le'. Beslá neda' ka bchebe ḻažo'o gono'.
171We ḻáwteza' Le', X̱ana' Dios, dan' bsedlo' neda' gona' ka ẕnna x̱tižo'o.
172Wcháḻjteza' ka nak x̱tižo'o dan' chawe' nak da' bchi'lo' neto'.
173Wzóateze gákḻeno' neda' dan' žon byena' gona' ka ẕnna da' wnnakzo' Le'.
174Žak ḻaža'a yesló' neda', X̱ana' Dios. Žaz ḻaža'a da' bsedlo' neto'.
175Ben ga soa' nbana', na' wká'n ẕena' Le', na' da' ẕchi'a ḻažo'o gákḻenen neda'.
176Ẕdía' cheḻa'ale kan ẕda to ẕila' nnitlba'. Beyílj neda', wen žin chio', dan' bi na' gaḻ ḻaža'a da' ka' bchi'lo' neto'.
