SALMOS 89

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

67

68

69

70

71

72

73

74

75

76

77

78

79

80

81

82

83

84

85

86

87

88

89

90

91

92

93

94

95

96

97

98

99

100

101

102

103

104

105

106

107

108

109

110

111

112

113

114

115

116

117

118

119

120

121

122

123

124

125

126

127

128

129

130

131

132

133

134

135

136

137

138

139

140

141

142

143

144

145

146

147

148

149

150

¹X̱ana' Dios, góḻteza' che yeḻa' ži'i ḻaže' chio'. Wzenla' to kwe' to kwe' ẕa'sóto' ka' nako' ḻi ḻaže'.

²Nnezla' sóateze yeḻa' ži'i ḻaže' chio', na' to chi'ize zoa yeḻa' ḻi ḻaže' chio', kan zoakze ya'abá.

³Le' wnnó': “Bena' to diža' ḻen bennen' wžía'. Bchebe ḻaža'a da' gona' che Dabí, wen žin chia'.

⁴Goža'-ne': gona' ga sóatezegak ẕa'só' ka', na' gona' ga nna biá'tezgakbe' ḻo wlazo' le'.”

⁵Benne' ka' nníta'gake' ya'abá žoe ḻáwgake' Le' ni'a che da' ẕente da' žono', na' ni'a che yeḻa' ḻi ḻaže' chio', X̱ana' Dios.

⁶Bi zoa no benne' ya'abá, bennen' nake' ka nakkzo' Le', X̱ana' Dios. Bi zoa no benne' nake' benne' ẕente ka nako' Le'.

⁷Benne' ka' zej nnite'e ya'abá žápegake' Dios ba la'ne na' yógo'te benne' chie' ka' ẕžébegake' Ḻe'.

⁸X̱anto' Dios, ẕnna bi'o benne' zante, benne' žjake' ḻo wdiḻe, nníta'gake' ya'abá. Bi zoa no benne' nake' ka nako' Le', X̱ana' Dios. Nako' Benne' wáḻeḻe'e, na' nakkzo' ḻi ḻaže'.

⁹Ẕnna bi'o nisdo' dan' ẕgo'nen. Kate' ẕgo'nḻe'en Le' ẕbek žion'.

¹⁰Blej bchochjo' benne' Egipto ka', na' bgá'ngake' ka to da' gat. Besḻaso' benne' ka' bi ẕḻé'egekle' Le' chawe' ḻen no'o wáḻeḻe'e.

¹¹Chio' Le' nak ya'abá, na' chio' Le' nak yežlyó. Beno' yežlyó nga, na' da' ka' nníta'gaken ḻawlen.

¹²Beno' da' de cheḻá'a gan za' be' zag, na' da' de cheḻá'a gan ẕde wbíž byo' zag ka'. Ḻo yeḻa' žebele žoḻgak Ya'a Tabor, na' Ya'a Hermón chio' Le'.

¹³Benne' wáḻeḻe'e nako' Le', na' ẕenḻe'e nak yeḻa' wak chio'.

¹⁴Ḻo da' chawe', na' ḻo da' ḻi ḻaže' ẕnna bi'o. Ḻo yeḻa' ži'i ḻaže' na' ḻo da' ḻi ḻaže' žono' yógo'te.

¹⁵Ba nez ẕen naken chegak benne' ka' žóḻgake' da' žoe ḻáwgake' Le', na' zej zoe' ḻo yeḻa' baní' chio', X̱ana' Dios.

¹⁶Ni'a chio' Le' žebéḻe'egekle' dot ža, na' želyenle' x̱tižo'o Le' dan' nako' chawe'.

¹⁷Nakkzo' Le' yeḻa' waḻe chegak benne' ka', na' ḻezka' yeḻa' x̱tan chégake'. Žono' neto' wáḻeže dan' naken da' žénekzlo' gono'.

¹⁸X̱anžo Dios žape chi'e žo'o, na' Dios la'y chegak benne' Israel ka' ẕchi'le' žo'o.

¹⁹Ža ni'te bchaḻjo' da' bḻoe'elo' benne' chawe' ka', benne' wen žin chio' ka', na' wnnó': “Ba wžía' to benne' waḻe ladjw benne' chia' ka'. Bena' ga ẕnna bi'e, na' žákḻena' ḻe'.

²⁰Wžía' Dabí, benne' wen žin chia'. Bzoakza' ḻe' nich gake' benne' wnná bia'.

²¹Neda' gákḻenteza' ḻe'. Ḻen yeḻa' wak chia' gon chocha' ḻe'.

²²Benne' ka' bi ẕḻé'egekle' ḻe' chawe' bi gak bi da' góngake' chie', na' benne' wen da' ẕinnj ka' bi gak góngake' ḻe' ẕia.

²³Wléj wchochjkza' benne' ka' bi ẕḻé'egekle' ḻe' chawe', na' wkwasa' benne' ka' ḻawe' ḻe'. Wžía yi'a benne' ka' ẕží'igake' chie' ḻe'.

²⁴Ží'itezla' ḻe', na' gaka' ḻi ḻaže' ḻen ḻe', na' ni'a chia' neda' golže yeḻa' wnná bia' chie'.

²⁵Gona' ga nna bi'e do ẕente žoa'a nisdo', na' do ẕente žoa'a yegw Éufrates.

²⁶Ḻe' yi'e neda': Le' nako' X̱a'. Nako' Dios chia'. Žape chi'o neda', na' žesló' neda'.

²⁷Neda' wzóa' ḻe' ka ẕi'na' blo, na' nna bi'e yógo'te benne' wnná bia' ka' dot yežlyó.

²⁸Ží'itezla' ḻe', na' sóateze diža' da' bénḻena' ḻe'.

²⁹Gona' ga sóatezegak ẕa'sóe' ka', na' nna biá'gake' ḻo wlaze' ḻe' x̱ak zoa ya'abá.

³⁰Cha' wsangak ẕa'só Dabí ka' da' bchi'la' ḻe'e, na' cha' bi góngake' ka nak da' goža' ḻégake',

³¹na' cha' wzóagake' cheḻa'ale da' bsedla' ḻégake', na' cha' bi góngake' kan ẕnnakza' neda',

³²na' wsaka' zi'a ḻégake' dan' ẕží'igake' chia' neda', na' chinnja' ḻégake' yid dan' žóngake' da' ẕinnj,

³³san bi wsana' kan nži'ila' Dabí, na' bi wsana' gak ḻi ḻaža'a ḻen ḻe',

³⁴na' bi gaḻ ḻaža'a diža' da' bénḻena' ḻe', na' bi wchá'a da' ba wnnía'.

³⁵To chi'ize bzetj kwina', bchebe ḻaža'a bi da' gona', na' batkle gon ḻaža'a che Dabí.

³⁶Wnnía': Sóatezegak ẕa'sóe' ka', na' nna biá'gake' ḻo wlaze' ḻe' ḻawa' neda' x̱ak zoa wbíž.

³⁷Yeḻa' wnná bia' chie' sóatezen choch x̱ak zoa byo' ya'abá. Sóatezen choch x̱ak zoa ya'abá.”

³⁸Le', Dios, wléj yichjo', na' bzo' cheḻa'ale bennen' wžío', na' ẕžá'aḻi'o ḻe'.

³⁹Bzo' cheḻa'ale diža' dan' bénḻeno' Dabí, benne' wen žin chion', na' bka'no' ka'ze yeḻa' wnná bia' chie'.

⁴⁰Bchinnjo' ze'e da' wdape chi'in yež ẕen chien', na' bchinnjo' yógo'te yo'o waḻe, da' ka' wdape chí'igaken yežen' ḻo wdiḻe.

⁴¹Yógo'te benne' ka' ẕdégakze' ga na' ẕbángake' da' ka' gota' chie', na' benne' yež gawze ka' žon dítjgekle' ḻe'.

⁴²Beno' ga bzéx̱jwgak benne' ka' ḻe', benne' ka' bi ẕḻé'egekle' ḻe' chawe', na' žebéḻe'egekle'.

⁴³Bchinnjo' da' ka' ẕkonle' žin ḻo wdiḻe, na' bi gókḻeno' ḻe' ḻo wdiḻen'.

⁴⁴Bekó'o yeḻa' ẕen chie', na' bka'no' ka'ze yeḻa' wnná bia' chie'.

⁴⁵Beno' ga nake' ka to benne' gole kate' ne zoe' yiz kwide' chie', na' beno' ga žedoe'ele'.

⁴⁶X̱anto' Dios, ¿to chi'ize bi yenlo' cheto'? ¿To chi'ize ẕža'akzo' neto'?

⁴⁷Bejsá' ḻaže' soa' yežlyó nga to chí'ido'ze. Beno' ga zoagak nbangak yógo'te benne' to chí'ido'ze.

⁴⁸Nitó benne' bi soe' nbane' to chi'ize. Yógo'tie' gátgake'. Nitó benne' bi yelé' ḻo na' yeḻa' got.

⁴⁹X̱anto' Dios, ¿biž nži'ilo' Dabí kan bchebe ḻažo'o, na' wnnakzo' gono'?

⁵⁰Bwia nga, X̱anto' Dios, ka yógo'te benách ẕka'ngak benne' wen žin chion' ka'ze, na' nbaga'a neda' da' žon dítjgekle benne' wláž chia' ka'.

⁵¹Benne' ka' bi ẕḻé'egekle' Le' chawe' žon dítjgekle' bennen' wžío' Le', X̱anto' Dios. Žon dítjgekle' ḻe' gáte'teze zeje'.

⁵²¡Ga'n ẕen X̱anžo Dios to chi'ize! Ka' naken, na' ka' gaken.