9¿E kami keꞌelawi riꞌ ri oj aj judiꞌabꞌ, lik utz qaꞌanom y na jinta kꞌana qamak chikiwa ri na e ta aj judiꞌabꞌ? ¡Na e ta riꞌ! Ma e pachaꞌ ri nukꞌutum loq: Konoje, tobꞌ e aj judiꞌabꞌ o na e ta aj judiꞌabꞌ, junam e kꞌo chuxeꞌ ri qꞌatbꞌal tzij re ri Dios ruma ri kimak.
10Ma jewaꞌ ri tzꞌibꞌital kan pa Ruchꞌaꞌtem ri Dios: Na jinta juna tikawex jusukꞌ chwach ri Dios, tobꞌ tane xa jun.
11Na jinta junoq kamajaw usukꞌ runaꞌoj ri Dios. Na jinta junoq katzukuw re Rire.
12Konoje ri winaq ebꞌelinaq che rubꞌe ri Dios, y na jinta chi kꞌana kichak. Na jinta junoq kaꞌanaw ri utz, tobꞌ tane xa jun.
13Ri chꞌaꞌtem kel lo pa kichiꞌ ri winaq e pachaꞌ uchuyil ujul animaꞌ teqꞌel uchiꞌ; ma rukꞌ ri kaqꞌ kesokosoꞌnik. Ri chꞌaꞌtem kel lo pa kichiꞌ e pachaꞌ chi veneno re kumatz.
14Yey rupa kichiꞌ nojinaq che itzel taq tzij y kꞌaxlaj chꞌaꞌtem.
15Lik kacha kikꞌuꞌx che kekamisanik.
16Tobꞌ pa taq kebꞌikꞌow wi, kekikoj ri winaq pa kꞌaxkꞌolil y pa bꞌis;
17pa taq e kꞌo wi rike, na jinta kꞌana utzil chomal.
18Na jinta ne kꞌana xiꞌin ibꞌ kukꞌ chwach ri Dios kachaꞌ.
Romanos 3
Romanos 3:9-18