Romans 3:9-18

⁹Yaa, ngay kan thawāng niiyant pam wanch ngamp Jews il-ilantana. Niiy ngaantam-ngeeyaniy keꞌ nil God.angan pam wanch Jews anangan min thath-thathan thanangan ey? pam wanch wiy anangan min yaꞌ ey? An yaꞌ paththam a! Ngay puth kaꞌathaman kan thawangan than pam wanch maꞌmangkaman wayan maꞌ-yotaman iiy-iiyantan, thanan puth kaangk way anman iiy-iiyayn, than Jews aꞌ puth Jews yaꞌ anangan thamp.

¹⁰Wik inan kan-kanama, puth lat ngench thayanangan waaꞌ-waaꞌan: “Pam wanch yotaman way paththam iiy-iiyantan, than meeꞌ God.antangan pam wanch min keꞌam iiy-iiyantan, yaꞌ paththam.

¹¹Than pam wanch yotamangana God.an minam keꞌam thiichantan nunang, yaꞌa, aꞌ than puth kaangk keꞌ wik God.antaman ngeey-ngeeyayn.

¹²Than pam wanch yotamangan man-mangkam theeꞌin nungant God.antan, than yotamangana wayathwin thanttakamana, than puth maꞌmangkaman min keꞌam iiy-iiyin nungant, yaꞌa.

¹³Than wik way paththam aak-yaꞌangan waaꞌ-waaꞌantan thanttakamana aꞌ puth pam wanch wiy anangan man-monkan thenchantan thanangana. Than wik wayan thaw-thawantan thanttakaman-a, an keꞌ thaaꞌ theek way-wayaman thuukangan piꞌ-piꞌana, pam mulathanakana.

¹⁴Thananiya pam wanch wiy anangan nench-nenchantan thanang, aꞌ ak-akantan thanang,

¹⁵aꞌ man kulan wampan thant-a, an paththam piik-piikwuntan thanttakaman mulakama,

¹⁶aꞌ putha wiy anangana way-wayathantan thananga, aꞌ ngangk way-wayam yump-yumpantan thanang.

¹⁷Than kulakan maꞌ-yotam wenk-wenkantan thanttakamana, than puth keꞌam ngaantam-ngeeyantan want-wanttakan ngangk minangaman wun-wunaynana.

¹⁸Than puth God.ana keꞌam ngaantam-ngeey-ngeeyantan nunanga nil wuut piꞌan ngampar paththama.”