Proverbio 8:4-11

⁴“Ay-ayagak dakayo amin ay ipogaw isnan daga.

⁵Mabalin ay lomaing din magay ammo na ya manemneman din naong-ong.

⁶Dengngen yo tan nabanol ya kosto din ibagak.

⁷Tet-ewa amin din ibagak tan kaliliget ko ay man-etek.

⁸Din amin ay kalik et matalek, maga polos di iaw-awana ono ietekana.

⁹Mo waday panang-awat yo ya layden yo ay matapian di ammo yo, maila yo ay nalawag din kalik ya magay kaipaksawana.

¹⁰Ibilang yo koma din pamagbagak ay nabanbanol mo palata ya din panakaammo ay nabanbanol mo din kanginaan ay balitok.

¹¹Tan nabanbanol din sirib mo din nangingina ay al-altin di awak. Olay sino ay laylayden yo yan adi makaiso en sisya.