Proverbio 21:18-29

¹⁸Nam-osen din managbasol din ligat ay panggep da ay ipalak-am sin nalinteg.

¹⁹Maymayat di man-es-esa ay manbiyag sin lugar ay magay omili mo din makibeey si makaibaw ya makamayotmot ay asawa.

²⁰Kanayon ay wada di nankababanol ay bonag ya mayat ay makan sin beey di masirib, ngem din naong-ong yan abosena ay dagos din sanikwa na.

²¹Din mangipakat si kabaelana ay mangonod si nalinteg ya managseg-ang ay panagbibiyag et baken kinalinteg anggoy di mawada en sisya, mo adi et matagotago abe ya maidayaw pay.

²²Kabaelan di masirib ay abaken di ad-ado ay sosoldadon di esa ay siyodad et dadaelena din alad ay pantaltalkan da.

²³Din naannad si kali na et mailisi si problima.

²⁴Din makalasoy ya mangipapangato si awak na et kanan di ipogaw en nalastog.

²⁵Din nasadot ay manigaan ay man-obla et pespeslena di awak na met laeng.

²⁶Kanayon ay mankolang si kasapolana, ngem din nalinteg yan kanayon ay man-idawat.

²⁷Kaliliget Diyos din daton di managbasol, masepsep mo lawa di panggep na.

²⁸Maipasaldeng di maetek ay tistigo, ngem mapati din mandenge ay kosto, asi mankali.

²⁹It-it-ek di managbasol di kabaelana, ngem din nalinteg yan nemnemena ay kosto di amagena.