Proverbio 1:6-26

⁶ay mangawat sin pamagbaga, apat, pangarig ya bonbontiyan di nankalalaing.

⁷Din egyat ya panangipateg di ipogaw en Diyos, say poon di panakaammo. Din naong-ong anggoy di manglasoy si sirib ya adi aben kabagbagaan.

⁸Sik-a ay anak ko, tongpalem din pamagbagan da amam en inam,

⁹tan pasigedena din ogalim ay kaman din iyat di mapteng ay bedbed ya keke ay mangipapteng sin kailaam.

¹⁰Adi ka manpasolisog sin managbasol ay ipogaw

¹¹mo kanan da, “Omali ka ta manseed takos peslen tako, olay magay basol na.

¹²Napigsa da ed wani ngem kaman tako din kaot ay mangokmon en daida ay sibibiyag.

¹³Alaen tako din nabanol ay sanikwa da ta pon-en tako din beey tako si naakew.

¹⁴Makibingay ka mo maitapi ka en dakami.”

¹⁵Adi kan on-onodan di kaman dadi ay ipogaw

¹⁶tan alisto da ay man-amag si basol, nakasagana da ay manpese.

¹⁷Kaman dan titit ay olay mo il-ilaena din kaiamagan di tagdey, ngem makna pay dedan.

¹⁸Tan da nay ay ipogaw, kaman dan tinagdey din mismo ay awak da, din biyag da ay mismo di ipasobo da.

¹⁹Tan din kinabaknang ay magon-od babaen si basol et omiturong si kateyan.

²⁰Si Sirib et ipigsa nan kali na sin kalsada sin katoptopogan di ipogaw,

²¹ya sin pan-ilaklakoan sin asag-en di segpan di siyodad. Kanana ay mandiskurso sin ipogaw:

²²“Dakayo ay magay ammo na, ay pig-an pay di panlaydan yo ay manemneman? Apay nga adi kayon somaldeng ay manlaslasoy ya manis-iyek sin sirib?

²³Dengngen yo din pamagbagak ta ipaammok din nemnem kon dakayo.

²⁴Ay-ayagak dakayo ngem polos ay adi kayon omikaskaso.

²⁵Tineteweng yo din indaddaan kon dakayo.

²⁶Isonga siyekak dakayo mo domteng di kaeegyat ay ligat yo,