Proverbio 15:13-27

¹³Maila sin ropan di ipogaw mo naragsak. Mo manladladingit, palalo abe ay madismaya.

¹⁴Din masirib yan laydena ay man-adal, ngem din magay nemnem na yan nemnemena di magay silbi na.

¹⁵Innagew ay naligat di biyag di kaseseg-ang, ngem din naragsak ay ipogaw et kanayon ay gan-ganasena di biyag na.

¹⁶Maymayat di kasasaad di nabiteg ay mangipatpateg en Diyos mo din palalo ay baknang ay ad-adoy pandandanagana.

¹⁷Maymayat di mansida si nateng ay waday layad mo din mansida si kam-isan ay karni ay waday liget sin nemnem.

¹⁸Din makabonget yan pawadaena di ibaw, ngem din naanos yan pawadaena di kapya.

¹⁹Ad-adoy ligat sin biyag di nasadot olay intoy em-emeyana, ngem din nalinteg yan magay problima ay domteng sin biyag na.

²⁰Paragsaken di nanemneman ay anak din akin anak en sisya. Din naong-ong anggoy di manglasoy sin napoana.

²¹Maragsakan din magay nemnem na sin magay silbi na ay inoong-ong, ngem din masirib yan say amagena din kosto.

²²Magay pantongpalan di plano mo magay kosto ay pamagbaga, ngem matongpal da mo ad-adoy mamagbaga.

²³Palalo ay omiparagsak din kosto ay kali sin kosto ay timpo.

²⁴Say pandanan di masirib din danan ay manturong si biyag ay baken din danan ay manturong si pese.

²⁵Dadaelen Diyos din beey di mangipapangato si nemnem da, ngem salaknibana din sanikwan di nalasang.

²⁶Kaliliget Diyos din nemnem di managbasol, ngem malaydan sin kalin di nalinis di nemnem na.

²⁷Din mangamgam si kinabaknang yan pawadaena di problima sin pamilya na, ngem matago di manigaan si pasoksok.