Pend-nesihetler 3:1-35

¹I oghlum, telimimni untuma, Dégenlirimni hemishe könglüngde ching tut.

²Chünki u sanga beriketlik künler, uzun ömür we xatirjemlik qoshup béridu.  

³Méhriban we heq-semimiy bolushtin waz kechme, Bularni boynunggha ésiwal, Qelbingge pütiwal.  

⁴Shundaq qilghanda Xuda we bendilerning neziride iltipatqa layiq bolisen, danishmen hésablinisen.

⁵Öz eqlingge tayanmay, Perwerdigargha chin qelbing bilen tayan'ghin;

⁶Qandaqla ish qilsang, Perwerdigarni tonushqa intil; U sanga toghra yollarni körsitidu.  

⁷Özüngni eqilliq sanima; Perwerdigardin eyminip, yamanliqtin yiraq bol.

⁸Shundaq qilghiningda, bu ishlar derdingge derman, Ustixanliringgha yilik bolidu.

⁹Perwerdigarning hörmitini qilip mal-dunyayingdin hediyelerni sun'ghin, Étizingdin tunji chiqqan mehsulatliringdin Uninggha atighin;

¹⁰Shundaq qilghiningda, ambarliring ashliqqa tolup tashidu, Sharab kölchekliringde yéngi sharab éship-téship turidu.

¹¹I oghlum, Perwerdigarning terbiyisige biperwaliq qilma, Uning tenbihidin bezme.

¹²Chünki, ata eziz körgen oghligha tenbih-terbiye bergendek, Perwerdigar kimni söygen bolsa uninggha tenbih-terbiye béridu.

¹³Danaliqqa muyesser bolghan kishi, Yoruqluqqa ige bolghan kishi némidégen bextlik-he!

¹⁴Chünki danaliqning paydisi kümüshning paydisidin köptur, Qimmiti sap altunningkidinmu ziyadidur.

¹⁵U leel-yaqutlardin qimmetliktur, Intizar bolghan herqandaq nersengdin héchbirimu uninggha teng kelmestur.

¹⁶Danaliqning ong qolida uzun ömür, Sol qolida bayliq we shöhret bardur.

¹⁷Uning yolliri sanga xush puraq tuyulur, Uning barliq teriqiliri séni aram tapquzur.

¹⁸U özini tapqan ademge «hayatliq derixi»dur, Uni ching tutqan kishi némidégen bextlik!

¹⁹Perwerdigar danaliq bilen yer-zéminni berpa qildi, Hékmet bilen asmanni ornatti.

²⁰Uning bilimi bilen yerning chongqur qatlamliri yérildi, Hemde bulutlardin shebnem chüshti.  

²¹I oghlum! Danaliq bilen bilimni közüngdin chiqarma, Pishqan hékmet we pem-parasetni ching tut.

²²Shuning bilen ular jéninggha jan qoshidu, Boynunggha ésilghan ésil marjandek sanga güzellik qoshidu.

²³Shu chaghda yolungda aman-ésen mangalaysen, Yolda putlashmaysen.

²⁴Yatqanda héch némidin qorqmaysen, Yétishing bilenla tatliq uxlaysen.

²⁵Béshinggha dehshetlik wehime chüshkende qorqmighin, Rezillerning weyranchiliqidin ghem qilmighin!  

²⁶Chünki Perwerdigar séning tayanchingdur, U putungni qapqanlardin néri qilidu.

²⁷Peqet qolungdin kelsila, hajetmenlerdin yaxshiliqni ayimighin.

²⁸Qolum-qoshniliring séningdin ötne sorap kirse, «Qaytip kétip, ete kelgin, ete bérey» — démigin.

²⁹Qoshnanggha ziyankeshlik niyitide bolma, Chünki u sanga ishinip yéningda xatirjem yashaydu.

³⁰Birsi sanga ziyan yetküzmigen bolsa, Uning bilen sewebsiz majiralashma.

³¹Zulumxor kishige heset qilma, Uning yol-tedbirliridin héchnémini tallima.

³²Chünki qingghir yollarni mangidighanlar Perwerdigarning neziride yirginchliktur, Lékin Uning sirdash dostluqi durus yashawatqan ademge teelluqtur.

³³Perwerdigarning leniti rezillik qilghuchining öyididur, Lékin U heqqaniy ademning öyige bext ata qilur.

³⁴Berheq, mesxire qilghuchilarni U mesxire qilidu, Lékin kichik péil kishilerge shepqet körsitidu.

³⁵Danalar shöhretke warisliq qilidu, Lékin hamaqetler reswa qilinidu.