Pend-nesihetler 1:1-19

¹Israil padishahi Dawutning oghli Sulaymanning pend-nesihetliri: —

²Bu pend-nesihetler sanga eqil-paraset, edep-exlaqni ögitip, séni ibretlik sözlerni chüshinidighan qilidu;

³sanga danaliq, heqqaniyliq, pem-paraset we durusluqning yolyoruq-terbiyisini qobul qilduridu.

⁴Bu pend-nesihetler nadanlarni zérek qilip, yashlarni bilimlik we sezgür qilidu;

⁵bulargha qulaq sélishi bilen danalar bilimini ashuridu, yorutulghan kishiler téximu dana meslihetke érishidu,

⁶shundaqla pend-nesihetler hem temsillerning menisini, danishmenlerning hékmetliri hem tilsim sözlirini chüshinidighan qilinidu.

⁷Perwerdigardin qorqush bilimning bashlinishidur; Exmeqler danaliqni we terbiyini közge ilmaydu.

⁸I oghlum, atangning terbiyisige qulaq sal, anangning söz-nesihetidin ayrilma;

⁹chünki ular séning béshinggha taqalghan gül chembirek, boynunggha ésilghan marjan bolidu.

¹⁰I oghlum, yamanlar séni azdursa, ulargha egeshmigin.

¹¹Eger ular: — Yür, tuzaq qurup adem öltüreyli; Yoshuruniwélip, birer bigunah kelgende urayli!

¹²Tehtisaradek ularni yutuwéteyli, Saq bolsimu, hanggha chüshkenlerdek ularni yiqitayli;

¹³Ulardin xilmuxil qimmetlik mal-dunyagha ige bolup, Öylirimizni olja bilen toldurimiz.

¹⁴Biz bilen shérik bol, Hemyanimiz bir bolsun, dése, —

¹⁵I oghlum, ulargha yoldash bolma, Özüngni ularning izidin néri qil!

¹⁶Chünki ularning putliri rezillikke yügüridu, Qolini qan qilish üchün aldiraydu.

¹⁷Herqandaq uchar qanat tuyup qalghanda tuzaq qoyush bikar awarichiliktur;

¹⁸Lékin bular del öz qénini töküsh üchün saqlaydu; Öz janlirigha zamin bolushni kütidu.

¹⁹Nepsi yoghinap ketken herbir ademning yollirining aqiwiti mana shundaq; Haram mal-dunya öz igilirining jénini alidu.