1Eme mosa ijaha irec ʒoaŋ gie bapa 24 ira ŋic ŋokac tumaŋnerâ jumbiŋ jaŋe nânâ sowa juhuc mateŋ barâ qizec‐jeŋic ʒafe ruambiŋ.
2Erâ Israe ŋic jaŋe ŋic jabane hecke‐jarerâ buc domahuc jaŋe jaŋacne â apa ŋosafâc‐jeŋic jaŋere sâqocne â kiŋ bahac i mufuambiŋ.
3Erâ jaŋe dodoma‐jeŋickoa domahuc Wofuŋ Anutu‐jeŋicte sâcmutâc papia qizec i aue jahec â moc mocwâc ʒuhuckerâ wosembiŋ; â aue jahec â moc ira ine Wofuŋ Anutu dapecnehuc sâqocne‐jeŋic mufuambiŋ.
4Eme Lewiŋic jaŋere ririo ŋic kecʒiŋuc jaŋe domambiŋ: Jesua, Bani, Kadimiele, Sebania, Buni, Serebia, Bani â Kenani. Jaŋe owa ruruckehuc Wofuŋ Anutu‐jeŋic wâsickembiŋ.
5Iŋuc ehuc Lewiŋic Jesua, Kadimiele, Bani, Hasabeneja, Serebia, Hodia, Sebania â Petahia jaŋe mumbiŋ, “Ajoc, ŋoŋe Wofuŋ Anutu‐ŋeŋic juju hati e kecʒiŋuc muhuc muac baafec ecneniŋ: Ʒâŋe rarage fekicne sâkozi jambuŋ â mumuteŋ sasawa jowaru‐fâreekac i muac baafec ecnezo.”
6Eme Eʒerazi ʒiŋuc muwec: “Wofuŋ, go mocjahazi Wofuŋ jukomec, goki hâcne sambâŋne sambâŋne jaŋere sambâŋ i aŋelofâc‐ticne jaŋehec bâfuac‐jopameŋ. Erâ mâreŋ â fainao wiac forakac sasawa, erâ hâwec â maŋnao wiac forakac sasawa i mâmâc bâfua‐fâremeŋ, erâ wâc hone akic ejareekic. Ehame sambâŋko aŋelo jaŋe go dape‐gareeŋgopieŋ.
7Wofuŋ Anutu goki hâcne Abram rowosâerâ Kaldea ŋic jaŋere hae Uru irecnec jowa warerâ Abraham ʒâŋe i râcnemeŋ.
8Erâ maŋticne gorao siŋkerâ fowec i honerâ Kanaaŋ ŋic â Hitiŋic â Amori ŋic â Periʒi ŋic â Girigasi ŋic jaŋere mâreŋ ʒi ɋâricfâc‐ticne tahac‐jopacmurâ ehec ʒâʒâfic emeŋ. Erâ go tiŋne rune jukomecte mumupaŋ gere fârine bâfuameŋ.
9“Erâ go apa ŋosafâc‐nâŋec jaŋe Aigita mâreŋko fific guguriŋ faio jumbiŋ i honemeŋ â Hâwec Bâbâroŋko wâsicgupie mana‐jaremeŋ.
10Ehuc go Farao â kiŋaŋ qaqafâc‐ticne erâ mâreŋ‐ticnao ŋic ŋokac jumbiŋ jaŋerao wiac ʒâŋe furu â fuŋne qaqa mâsi bâfuameŋ. Jaŋe apa ŋosafâc‐nâŋec wiac repic qapicne ejarembiŋ i go hone manac emeŋ hâcne. Go iŋuc ehuc juhaŋtec ʒâŋe biŋege fuawec, erâ dameŋ ʒiŋuczia fokac jaha.
11Erâ go hâwec bârâwiŋketec apa ŋosafâc‐nâŋec jaŋe mâreŋ kereŋnao fotâcnembiŋ. Go iŋuc ehuc jopa jâpec ejarembiŋ jaŋe ine qânâ moc tuŋkepene opâ ʒâkâŋ irec fâhâŋnao hurârâŋneekac irec sâc tuŋjopameŋ. Go ʒoaŋko karorac maŋko juhuc bânie‐jaremeŋ â ŋafeo hata honehuc raniŋte ʒocbâruŋ maŋko juhuc jowac‐jopameŋ.
13Go sambâŋkonec Sinai tikio waharâ jaŋehec dâŋ muc manac emeŋ, ehuc mumutâc fâretiŋ â sâcmutâc fârine, erâ dâŋsanaŋ â sâcmutâc dâŋ i jare tahac emeŋ.
14Erâ i kiŋaŋŋicge Mosere micko râehuc tiri sabatage irec fuŋne jaza mutâc ejarehuc sâcmutâc sanaŋ, dâŋsanaŋ erâ sâcmutâcge tahac‐jopameŋ.
15Jaŋe nânâre hâmopie go sambâŋkonec nânâ jaremeŋ, â opâre hâmopie qânâ hârâckonec opâ bâfua‐jaremeŋ. Ehuc mâreŋ jarecmurâ mupaŋke‐jaremeŋ i rarâ ro rauc eniŋte jazameŋ.
16“Eme apa ŋosafâc‐nâŋec jaŋe hehesic bâfuahuc maŋsanaŋ erâ sâcmutâc sanaŋge mi reŋkembiŋ.
17Jaŋe qaqatara bâfuahuc ŋondeŋ‐jeŋicko fuŋne qaqa mâsi bâfuameŋ irec nikec‐jopawec. Ehame maŋsanaŋ erâ Aigita mâreŋko kâpâcwâru gie‐jeŋicko mocwâc risieniŋte micne bapa moc âkendâŋnembiŋ. Erâ ine Anutu go kiŋ bebehege mai jaha fokac, go aki anonoc â buurucgehec, kimbeŋge i urucne â erâ‐eesanaŋge i ɋârâŋne irec mi râpec‐jopameŋ.
18Jaŋe bulimakao motecnere hawari wâc ba akic ehuc ʒiŋuc mumbiŋ: ‘Anutu‐ŋeŋic Aigita mâreŋkonec batarac‐ŋoparâ bacŋopa wefuwec ʒi hâcne.’ Jaŋe iŋuc ehuc mu surec hâhâwicne embiŋ.
19Go buurucge kâcɋenea foekacte mâreŋ burocnao mi râec‐jopameŋ. Karoraczi ʒoaŋko hata bânie‐jarehuc mi rârâŋnewec, me ŋafeo hata raniŋte ʒocbâruŋzi tamae‐jarehuc mi hâpowec.
20Go Mâro biaŋgezi jaza qazuc eocte tahac‐jopameŋ, ehuc ʒuʒuhuc jaha mana gumec‐jopameŋ â opâre hâmopie opâ jaremeŋ wâc.
21Go jara 40 mâreŋ burocnao hone kitaŋ ejaretec wiac moc mi basambiŋ. Erâ ŋaqi qoruc‐jeŋic sucke ʒaŋ mi ewec â kike‐jeŋic wâc mi siwiŋnewec.
22Erâ go uucmaŋne uucmaŋne â ŋicne ŋicne mejeŋicko râec‐jopahuc mâreŋ‐jeŋic wâc tahac‐jopameŋ. Iŋuc ejaretec jaŋe Hesiboŋ haere ŋicwofuŋ Sihoŋte mâreŋ â Basaŋ mâreŋte ŋicwofuŋ Ogore mâreŋ i ro rauc embiŋ.
23Go ɋâricfâc‐jeŋic i sambâŋko bâpiŋ iŋucne basawec‐jopameŋ, ehuc apa ŋosafâc‐jeŋic jaŋe mâreŋ ro rauc eniŋte jazahuc ʒira hâcne jowac‐jopa waremeŋ.
24Eme irec ɋâricfâc‐jeŋic jaŋe ware mâreŋ ʒi ro rauc embiŋ. Ehame go ʒâŋe fai‐jeŋicko mâreŋ rune, Kanaaŋ ŋic hâcne, bawahac‐jopahuc mâreŋ ʒirec ŋicne ŋicne â ŋicwofuŋfâc‐jeŋic jaŋe mejeŋicko râec‐jopameŋ. Jaŋe iŋuc me iŋuc ejareniŋte iŋuc hâcne emeŋ.
25Eme jaŋe hae sacsanaŋ‐jeŋichec â mâreŋ‐jeŋic guecnehec i mâmâc ro rauc efârembiŋ. Jaŋe iŋuc ehuc ficmaŋko mafa wiac biaŋne fusucmarâ fowec i mecne, â opâ nombâŋ â waiŋ gie â oliwa gie â jâchândâŋ nânânere jâcne bocjaha jâmbâŋ i mâmâc ro rauc embiŋ. Ehuc i nâ gapec erâ soka pupuŋ ehuc eehâmoge fekicne irec mana ʒiziwembiŋ.
26“Erâ jaŋe sifu jaha qaqatara bâfuahuc maŋrâŋgeŋ egarerâ sâcmutâc dâŋge râpeckehuc porofetefâcge jaŋe gorao bârisiec‐jopaniŋte uŋ jazapie qâhâmoc‐jopambiŋ. Jaŋe iŋuc ehuc wiac mamakâcne mâretec embiŋ.
27Eme go irec kisâfâc‐jeŋic jaŋere meo râec‐jopatec jaŋe ejarepie ʒâic serereŋ maŋnao jumbiŋ. Eme ʒâic serereŋ dameŋ‐jeŋicko go kio wâwâsic egarepie sambâŋgao juhuc mana‐jaremeŋ. Erâ buurucge ɋârâŋnea fokacte ŋeŋezicfâc‐jeŋic bâfuac‐jopatec jaŋe kisâfâc‐jeŋic jaŋere meonec batarac‐jopambiŋ.
28Eme wamao jufeku maigao hehesic mocwâc bâfuapie go râsifâc‐jeŋic jaŋere meo qikiŋ‐jopatec jaŋe rauc‐joparâ bawahac‐jopambiŋ. Ehame jaŋe mocwâc gorao risierâ kio wâwâsic egarepie go sambâŋko juhuc mana‐jaremeŋ, ehuc dameŋ bocjaha buurucgere sâcko batarac‐jopameŋ.
29Ehuc sâcmutâc dâŋgao bârisiec‐jopacmurâ uŋ jazameŋ. Eme jaŋe sifu maŋsanaŋ erâ sâcmutâc sanaŋge mana rereŋ mi embiŋ â mumutâc dâŋge ŋiczi reŋkehuc bajuhapie juju bâfua‐jareekac i wâc qâsuambiŋ, erâ maŋ â hazec gâc juhuc dâŋ moc mi manambiŋ.
30Erâ go jara bocjaha buuruc qajarehuc jumeŋ, ehuc Mâroge ecnetec eki porofetefâc‐jeŋic baafec‐jopame uŋ jazapie jaŋe sifu hazec mi râembiŋ. Eme go irec mâreŋne mâreŋne irec ŋicne ŋicne jaŋere meo râec‐jopameŋ.
31Erâ ine go buuruc sâkohec irec mi bâsirowec‐jopa‐fâremeŋ. Go aki anonoc â buuruc Anutu hâcne.
32“O Anutu‐nâŋec, go Anutu fekicne â tâpiri sâkohec â qeŋ bipinehec hâcne; go ʒâʒâfic â aki anonoc soŋaŋkeekic irec Asiria ŋicwofuŋ jaŋere dameŋkonecteaŋ nâŋe nâŋâcne â ŋicwofuŋfâc‐nâŋec â fekicnefâc‐nâŋec â taha bapafâc‐nâŋec â porofetefâc‐nâŋec â apa ŋosafâc‐nâŋec erâ ŋic ŋokac sasawa nâŋere faio ŋemâc fewec fokac i honetec wiac afecne mi ezejec.
33Erâ go wiac fua‐nârehuc fokac i fâretiŋ jaha jauŋ faio enârehaŋtecne nâŋe ine epene sâqorewec.
34Erâ ŋicwofuŋfâc‐nâŋec â fekicnefâc‐nâŋec â taha bapafâc‐nâŋec â apa ŋosafâc‐nâŋec jaŋe sâcmutâc dâŋ i mi soŋaŋkembiŋ, erâ sâcmutâc sanaŋge â uŋdâŋge jaremeŋ irec wâc maŋhazec mi râembiŋ.
35Jaŋe iŋuc ehuc uucmaŋ‐jeŋicko â eehâmo sâkoge tahac‐jopameŋ erâ mâreŋ guec sâkohec jaremeŋ ira juhuc kiŋaŋ mi qagarembiŋ, ehuc eebapa‐jeŋic sâqocne i wâc mi râpeckembiŋ.
36Manakic, nâŋe dameŋ ʒi kiŋaŋ qaqa juŋgopeneŋ. Nâŋe apa ŋosafâc‐nâŋec jaŋe jâchândâŋ â wiac biaŋne gâcne nâ bac ehuc ʒeri faio juniŋte mâreŋ tahac‐jopameŋ ira hâcne kiŋaŋ qaqa juŋgopeneŋ.
37Erâ mâreŋ ʒira moneŋ mafa fuaekac i sâqocne‐nâŋecte erâ ŋicwofuŋ rauc‐nâporâ juniŋte âkendâŋ‐jopameŋ jaŋerao raekac. Jaŋe bomboŋ enârehuc nâŋe nâŋâcne â bulimakaofâc‐nâŋec aŋac‐jeŋicte sâcko wiac kosa enâreŋgopieŋ, irec nâŋe ʒâic serereŋ faio juŋgopeneŋ.”
38Eme wiac sasawa fua warewec irec erâ nâŋe ʒâʒâfic‐nâŋec fofo sanaŋ moc ehuc qâreŋkeŋgopeneŋ. Eme fekicnefâc‐nâŋec â Lewiŋicfâc‐nâŋec â taha bapafâc‐nâŋec jaŋe ma basanaŋkehuc ʒâŋe‐jeŋic râeŋgopieŋ.
