1Ehame Saŋbalati e nâŋe haesac bahuc jumbeŋ irec biŋe manarâ mâretec aaricke sâqorewec. Aarickeme Judaŋic mu gâgâwi enârewec.
2Ehuc qomâfâc‐ticne â Samaria momori jaŋere maio kecʒiŋuc muwec: “Judaŋic betaŋkekicne keci jaŋe wemo wiac eŋgopieŋ? Jaŋe wiac sasawa mocwâc heɋâreniŋmu me? Jaŋe taha bâzi rikeniŋmu me? Jaŋe ʒoaŋ gie bapa mocjaha irec maŋnao bafâreniŋmu me? Jaŋe qânâ ʒoczi ʒakicne i jawa guruonec rorâ bapie qânâ mocwâc eocmu?”
3Eme Amoŋŋic Tobia e ere heririŋko domahuc muwec, “Iŋuc hâcne, jaŋe wiac baŋgopieŋ keci i kâte qâto moczi fainao feocmuo ine ŋenʒaŋneocmu.”
4O Anutu‐nâŋec, go manac, nâŋe suŋgiŋ‐nâpokicne. Go musopec‐jeŋic i bâtikietec jaŋe jaŋacne faio fezejec, ehuc batac bawarec ejarerâ kâpâcwâru bacjopa rapie mâreŋ mocko juniŋte qikiŋ‐jopazemec.
5Go kiŋjeŋic mi hefackezemec â sâqocne‐jeŋic mi bâtâmirezemec. Jaŋe hae sac bapa ŋic jaŋere ʒâŋe faio go maŋbâiŋ egareŋgopieŋ hâcne.
6Nâŋe ine haesac ʒuhuckerâ bakupene kikic efârerâ hâŋne‐ticne i nâfockewec. Iŋuc fuame ŋic ŋokac jaŋe gie i ʒoɋachec bambiŋ.
7Eme Saŋbalati â Tobia erâ Araba ŋic â Amoŋŋic â Asidode ŋic jaŋe, Jerusalem haesac i ʒoɋachec ququŋke tâmiric bahuc sawane forawec i biac bâzicke‐fârezo eŋgopieŋ, biŋe iŋuc manarâ aaric‐jopa sâqorewec.
8Irec jaŋe fisira Jerusalem haeo ʒika qahuc hae rune maŋ bâsifuc ejareniŋte tumaŋne‐fârembiŋ.
9Eme irec jaŋe fisinʒipiŋte Anutu‐nâŋec numucnehuc ŋafe â ʒoaŋ ŋeŋezicfâc‐nâŋec juniŋte soŋaŋ âkendâŋ‐jopambeŋ.
10Erâ ine Juda mâreŋ rune jaŋe mumbiŋ, “Tagi roro jaŋere tâpiri i omaekac â jawa wiac ine ŋemâcnea fokac, irec nâŋâc gie i sâcne mi banaŋmu.”
11Ehame kisâfâc‐nâŋec jaŋe mumbiŋ, “Jaŋe mi manahapie me mi honec‐nâpohapie nâŋâc ŋondeŋ‐jeŋicko fisirâ jopahuc gie i bâniniŋkenʒepeneŋ.”
12Eme Judaŋic râsi ŋondeŋko jurambiŋ jaŋe nâŋerao fisirâ arec 10 ʒiŋuc nâzâmbiŋ: “Hae mâreŋ juŋgopieŋ sâc irecnec râsi fisi‐nâreniŋmu.”
13Eme no sac râpenao hae sahao mâreŋ uuruŋne forawec ira garikiŋ‐jeŋic sâc ŋic ʒika â sându â tepe‐jeŋichec râec‐jopapo.
14Erâ no fahare fifisacne fihuc soŋaŋ micne â ŋic fekicne erâ ŋic ŋokac sâko ʒiŋuc jazapo: “Ŋoŋe jaŋere mi hâwic‐ŋopazejec. Ŋoŋe Wofuŋ e kâcɋene â qeŋ bipinehec i manasunʒepieŋ, ehuc ŋokâfâc‐ŋeŋic â otâfâc‐ŋeŋic â ŋonâŋfâc‐ŋeŋic erâ fic hae‐ŋeŋicte ʒika qanʒepieŋ.”
15Ehame kisâfâc‐nâŋec jaŋe, Judaŋic jaŋere dâŋ maŋkembeŋ i jaŋe biac manambiŋ, erâ dâŋ birickembeŋ i Anutuzi hetâtie‐nârewec iŋuc mana tararâ behembiŋ. Irec nâŋe buc buc gie‐nâŋecko mocwâc risiembeŋ.
16Eme ʒoaŋ ira fuŋkerâ jufehuc gieŋicfâc‐nane bâfâuc‐jopape dâkâne jaŋe sac bambiŋ â dâkâne jaŋe sându maro â tepe erâ maruku barâ domambiŋ. Ehuc micnefâc‐jeŋic jaŋe Juda kikefuŋ sacgie bambiŋ jaŋere râpeo domambiŋ.
17Ehame tagi bambiŋ jaŋe mejeŋic moczi gie bambiŋ â mejeŋic moczi ine ʒikare wiac bambiŋ.
18Eme sac bambiŋ jaŋe buc buc ʒika‐jeŋic rorâ gâjoŋ‐jeŋicko hafepie domaha gie bambiŋ. Ehame ŋic qeŋ qawec e nore gâjoŋkoa juwec.
19Eme no soŋaŋ micne â ŋic fekicne erâ ŋic ŋokac gâcne sâko ʒiŋuc jazapo: “Gie i kâcɋene â qaratiekicne, erâ nâŋâc sacgieo sawa ʒora sasawa domaŋgopeneŋ.
20Irec ŋoŋe hae mâreŋ ira me ira juhuc qeŋfânâŋ manarâ nâŋerao ʒira fisi‐fârenʒepieŋ. Ehame nâŋâcne ʒika i Anutu‐nâŋeczi qaocmu.”
21Nâŋe iŋuc erâ sacgie bambeŋ, ehuc ŋic dâkâne jaŋe furic râeme fuŋkerâ sându barâ jukuhapie hae ŋafeme bâpiŋ wefuwec.
22Erâ no dameŋ ira ŋic ŋokac wâc ʒiŋuc jazapo: “Ŋic sasawa â kiŋaŋ qaqafâc‐ŋeŋic ŋoŋe Jerusalem haeoa ŋec foc enʒepieŋ, ehuc ŋafeo soŋaŋ‐nâŋec junʒepieŋ â ʒoaŋko gie banʒepieŋ.”
23Irec no nahacne mecne â qomâfâc‐nane mecne â gieŋicfâc‐nane â ruc bapa ŋic bâjâpecnuhuc jumbiŋ mecne nâŋeraonec moczi moc ŋaqi qoruc‐ticne moc mi heunuckewec. Nâŋe buc buc ʒikare wiac i menâŋeckoa fowec.
