1Eme Saŋbalati â Tobia â Araba ŋic Gesem erâ râsifâc‐nâŋec gâcne jaŋe, noni sac bakupe sawane moc mi fowec irec biŋe manambiŋ. (No ine dameŋ ira motâc wiac mi ɋeticke‐fârepo.)
2Eme Saŋbalati â Gesem jahe dâŋ râe‐narehuc kecʒiŋuc mupic: “Go Ono wâneŋko waretec hae mocko bâbâfuac enʒepeneŋ.” Erâ jahe sipiricnunicte maŋkehuc mupic.
3Irec no jaherao kiŋaŋ sorec‐jopahuc kecʒiŋuc mupo: “No gie sâko moc bakopacte sâcne mi hufâpemu. No fahare ŋoherao hufâhape giezi wemocko mâc foocmu.”
4Eme jahe arec jahec â jahec dâŋ ijaha râe‐narepire no dâŋ hawarine ijaha wâc bâtikie‐jactepo.
5Ehame Saŋbalati e arec 5 dâŋ ijaha muhuc papia qâreŋkerâ kiŋaŋ qaqafâc‐ticne jarehuc norao sorec‐jopawec.
6Papia irec maŋnao dâŋ ʒiŋuc qâreŋkekicne fowec: “Ŋic gurune gurune jaŋe gore dâŋ kecʒiŋuc muhapie Gesemzi wâc ijaha mukac: Go â Judaŋic ŋoŋe maŋrâŋgeŋ bâfuazo eŋgopieŋte sac bakomec hâcne. Erâ go ŋicwofuŋ‐jeŋic ecmurâ manasukic.
7Erâ go gahacnere manasuhuc Jerusalem haeo dâŋ ʒiŋuc musaweniŋte porofete âkendâŋ‐jopameŋ: ‘Juda mâreŋko ŋicwofuŋ moc jukac.’ Eme dâŋ i hâcne ŋicwofuŋ âzâcneniŋmu. Irec go waretec dâŋ ʒi muc manac epene taraoc.”
8Eme no ʒiŋuc muhuc dâŋ râecnepe rawec: “Go wiac mukomec iŋucne moc mi ekicne, i go gahacne maŋko fuac dâŋ.”
9Jaŋe ʒiŋuc manasuhuc hâhâwic henâreniŋte dâŋ i mumbiŋ: “Gie i mi batarahuc bâniniŋkepie fozejec.” O Anutu, ʒi menane basanaŋkec.
10Eme no Delajare ŋokâ Mehetabe ŋosa‐ticne Semaja e ficticne motâc herâ ŋehame raʒipo. Eme ʒiŋuc muwec: “Nâhâc Anuture taha ufuŋmaŋko tumaŋnerâ taha ufuŋte motâc i sasawa hefârezeperec. Ŋic guzo muŋgopieŋ jaŋe ŋafeo hâcne wareniŋmu.”
11Mume ʒiŋuc mupo: “No mo ŋicte hâwicnume wisepemu, erâ no iŋucnezi taha ufuŋko ferâ sâcne jupemu me? Irec no mi fepemu.”
12No ʒiŋuc hone mana tarac epo hâcne: Semaja e Anutuzi mi sorewec, e Tobia â Saŋbalati jahe furi râcnepicte no râsi enarehuc findaŋdâŋ muwec.
13E iŋuc eme no hâhâwic bâfuarâ hata ira âtehuc hehesic bâfuapemurâ furi râcnekicne. Erâ no mu surec enarehuc ʒâŋe biŋe‐nane bâsâqoreniŋte iŋuc embiŋ.
14O Anutu‐nane, go Tobia â Saŋbalati jahe wiac sasawa epic irec sâcko okacne jactezemec. Erâ wâc porofete ŋokac Noadia â porofete gâcne sâko hâhâwic henareniŋte mumbiŋ jaŋe wâc mâmâc.
15Eme sac i ʒoaŋ gie bapa 52 baku Elule mosare ʒoaŋ gie bapa 25 ira batarambeŋ.
16Eme kisâfâc‐nâŋec ŋic gurune gurune rârec‐nâporâ jumbiŋ jaŋe biŋe manarâ hâwic‐jopame hâbi‐jeŋic goroŋkewec. Jaŋe gie i Anutu‐nâŋecte babaficko baku batarambeŋ, iŋuc mana tarambiŋ hâcne.
17Ehame dameŋ ira Judaŋic fekicne jaŋeraonec papiazi Tobiarao fisiwec â Tobiaraonec papiazi jaŋerao wâc fisiwec.
18E Arare ŋokâ Sekaniore kimo juwecte Juda mâreŋko ŋic bocjaha jaŋe bafickeniŋte mupaŋkembiŋ hâcne. Eme ŋokâ‐ticne Johanaŋzi Berekiare ŋokâ Mesulamte otâ ŋonâŋ‐ticne rowec.
19Erâ jaŋe nore maio eebapa‐ticne i mumbiaŋkembiŋ, ehuc dâŋnane i wâc âzâcnembiŋ. Ehame Tobiazi hâhâwic henareocte papia râehuc jaha domawec.
