4Islael lavedi oya Ḡo a gose bi eta nisa sabasabana yawaninaḡa i nawanawana a kaiwata te maso dobu Edom mulinaḡa a kwaivivila. Bi geḡa te etamo lava a nawa tunidaboka.
5Kamaina bi lava Mousis bi Maimaituwa lisidimo a giuvitavitalana gado, “Bai aubaina Idipmo kuna kapotiyomai bi kuna natomemai niga kalakalalelemo te ka peki? Niga ḡome mote kani te ka kani bi gauba te ka tego. Niga kanina mana tama ke kanituni daboke.”
6Taunana aubaina Bada mwata wailaukubutidi i giukamaḡedi Islael lavedi lisidimo bi lava wapewapedi ai pekidi.
7Kamaina bi lava a nato Mousis lisinemo bi a giuna gado, “Tama gebogebo ke voiye, te Maimaituwa bi tam lisimimo ke giuvitavitala. Bada lisinemo kwa laupali te mwata ya kaikamaḡedi.” Ḡome Mousis lava aubaidi i laupali.
8Bada, Mousis i giuwena gado, “Mwata kwa voiye te kai modonemo kwai dawe, Laḡannemo lava aiyai mwata wailaukubutina i kalatina ba mwatana kai modonemo ya kita saḡe te ya yawasana.”
9Kamaina bi Mousis bolonsimo mwata i voiye te kai modonemo i wai dawe. Sauḡinemo aiyai bi mwata i kalatina ba mwata aluwina ya kita saḡe bi ya yawasana.
10Islael lavedi a nawa Obotmo a tava bi ḡome edi palai a solu.
11Kota Obot a gose bi a nawa Iye Abalimmo a lauḡalavu, Iye-Abalim ba aibeu yawaninemo, Mowabi lavedi edi dobu isuotinemo.
12Ḡome te a modina munaḡa Deled wapunemo a lauḡalavu.
13Diledmo te a nawa Anon gaubina diyaotinemo kalakalelemo a lauḡalavu, Amoli lavedi edi dobu diyanemo.
21Islael lavedi tauwainoyanoya a giukamaḡedi a nawa Amoli ḡalibonana Siyon ai baḡana gado,
22“Ḡalibona Siyon maso kunai aninemai te em dobu noponaḡa, etabadaḡa maso ke nawa. Bi em daibimo mote kamai kabinawa bi em gauba mote kama tegodi. Em etabadaḡa ka nawa ota te em dobu ka gose kamaḡe.”
23Bi geḡa te ḡalibona Siyon Islael lavedi mote i waianinedi te ena dobu noponaḡa sa nawa. Tana ena tauwaiḡaviya i waigemotidi bi a nawa Deiyas kalakalalelemo, Islael lavedi a suluvaidi.
24Bi geḡa te Islael lavedi a miya moito te ai pekidi bi edi dobu Anon gaubina bi i nawa te Dabok palatina a vai. Dabok noponemo ba Amon lavedi a miyamiya bi edi dobu ba a yaveyave kauwe.
25Niga mainana Islael lavedi Amoli edi taun matabudi bi kota taun Ḡesbon noponemo vaitedi, a kwayavaidi bi tedi ḡome a miya.
31Islael lavedi matabutabudi Amoli edi dobu matabuna a vai bi a miyagalame.
32Bi Mousis olooloto i giukamaḡedi a nawa a laumulimuli te bainewa Diesa taunina maso a suluvai. Kamaina bi Islael lavedi Diesa taunina bi diyanemo taun ḡesaudi vaitedi a suluvaidi bi ḡome Amoli lavedi a miyamiyana vaitedi a kwavivaidi.
33Bi kota a moito vitaledi te Basan etana a kaiwata. Bi etamo Basan ḡalibonana Ogi ena tauwaiḡaviya vaitedi a miya moito te Islael lavedi Edleimo maso a suludi.
34Bi Bada, Mousis i giuwena gado, “Kuma naile kaikana nimammo e sako, ena tauwaiḡaviya bi ena dobu matabuna. Bainewa Ḡesbonmo Amoli ḡalibonana Siyon kuna voivoiyena, mainana kota niganana Ogi ena lava vaitedi lisidimo kwa voiye.”
35Islael lavedi a tapitapila te Ogi natunatuna bi ena tauwaiḡaviya ai peki kovidi bi mote aiyai i yawasana. Bi Dobuna Ogi i waibadayena Islael lavedi a vai.
