Nɛɛmii 10 - Bibeli Luayãtaalá

Nɛɛmii 10

Click on verse(s) to share them!

¹Yã́ beeↄ yã́i píi wálɛ lɛdoũkɛnnↄ ń sĩanao, wálɛ kɛ̃́ lá guu. Wá dↄaanaↄ ń Levii buiↄ ń wá sa'onaↄ lɛ́ ń seela kɛwà.

²Gbɛ̃́ pↄ́ aa ń seela kɛ̀wàↄn kɛ: Bùsu gbãade Nɛɛmii Akalia nɛ́, Zedekia,

³Selaia, Azalia, Zelemii,

⁴Pasuu, Amalia, Malakia,

⁵Atusu, Sebania, Maluku,

⁶Aliũ, Mɛlemↄ, Obadia,

⁷Daniɛli, Ginɛtↄ̃, Baluku,

⁸Mɛsulaũ, Abia, Miamɛ,

⁹Maazia, Bilegai ń Semaiao. Gbɛ̃́piↄá sa'onaↄnɛ.

¹⁰Levii buiↄn kɛ: Azania nɛ́ Yesua, Enada nɛ́ Binui, Kamiɛli

¹¹ń ń gbɛ̃́ↄ: Sebania, Odia, Kelita, Pelaia, Anana,

¹²Mise, Leobɛ, Asabia,

¹³Zakuu, Selebia, Sebania,

¹⁴Odia, Bani ń Beninuo.

¹⁵Isaili dↄaanaↄn kɛ: Palↄsi, Paata Mↄabu, Elaũ, Zatu, Bani,

¹⁶Buni, Azegada, Bebai,

¹⁷Adonia, Bigivai, Adini,

¹⁸Atee, Ezekia, Azuu,

¹⁹Odia, Asuũ, Bezai,

²⁰Alifi, Anato, Nɛbai,

²¹Mapiasi, Mɛsulaũ, Ezii,

²²Mɛsezabɛli, Zadoki, Yadua,

²³Pelatia, Anana, Anaia,

²⁴Ozee, Anania, Asubu,

²⁵Aloese, Pila, Sobɛki,

²⁶Leuũ, Asabana, Maasea,

²⁷Ahia, Anana, Ana,

²⁸Maluku, Aliũ ń Baanao.

²⁹Isaili kĩniↄ, sa'onaↄ ń Levii buiↄ ń bĩ́ibↄlɛdↄ̃anaↄ ń lɛ̀sinaↄ ń Lua ua zĩkɛnaↄ ń gbɛ̃́ pↄ́ aa kɛ̃̀ bui pↄ́ liaańziↄwa aa Lua ikoyã kũaↄ nàkↄ̃wa ń ń gbɛ̃́ pↄ́ dɛ gbãade ũↄ. An naↄ ń ń nɛgↄ̃ɛↄ ń ń nɛnↄɛↄ nàmá lↄ ń gbɛ̃́ pↄ́ yã́pi mà mɛ́ aa dↄ̃ↄ píi.

³⁰Aa lɛgbɛ̃̀ aa mɛ̀: Wá sì ń Luao, wáↄ tɛ Lua ikoyã pↄ́ a kpà a zↄ̀blena Mↄiziwai. Wáↄ Dii wá Lua yãdilɛaↄ kũa ń aà yãdanɛↄ, wíↄ aà ↄtondↄkĩi gwa.

³¹Wá wá nɛnↄɛↄ kpã́sã bui pↄ́ liaawáziↄwa lↄo. Wá ń nɛnↄɛↄ sɛ́ wá nɛ́ↄnɛ sↄ̃o.

³²Aa mɛ̀ lↄ: Tó bui pↄ́ liaawáziↄ mↄ̀ ń laao ge pↄ́wɛnae aa yía kã́mabogↄↄ, wá lúmá kã́mabogↄↄzĩ ge lousisigↄↄzĩo. Wɛ̃̀ sopla ń wɛ̃̀ soplao wáli tó tↄↄlɛ ĩ́ampa, wíli gbɛ̃́ↄ kɛ̃́ ń ń fĩaↄ.

³³Wá dìlɛ wázĩa yã́ ũɛ, wá baade lí ã́nusu kpa wɛ̃ ń wɛ̃o galaũ síiↄ̃ wá Lua ua zĩ yã́ musu.

³⁴Iↄ dɛ pɛ̃ɛ pↄ́ wì kpa Luawa pↄ́ ũ ń pↄ́wɛnti pↄ́ wìↄ kpawà lá gu lɛ́ dↄo ń sa pↄ́ wìↄ a pↄ́ kátɛu à tɛ́kũ lá gu lɛ́ dↄo ń sa pↄ́ wìↄ o kã́mabogↄↄ ń mↄ dafu dikpɛgↄↄo ń dikpɛ pãle zĩ́o ń sa pↄ́ wì o sáaukpaa yã́io ń Isailiↄ duun awakpabↄↄ ń wá Lua ua yã́ kĩniↄ píi.

³⁵Wá sa'onaↄ ń Levii buiↄ ń gbɛ̃́ kĩniↄ píi, wa gbɛlà mↄa ń yàao wá Lua ua yã́ musu, wàli mↄò ualɛ ń ualɛo gↄↄ pↄ́ wa dìlɛwa wɛ̃ ń wɛ̃o. A dɛ Dii wá Lua gbagbakĩi pↄ́ ũɛ lá a ku Mↄizi ikoyã guuwa.

³⁶Wáliↄ mↄ Dii kpɛ́u wɛ̃ ń wɛ̃o ń wá buapↄ́ káauↄ ń libɛ sɛ̃́iaↄ píi.

³⁷Wáliↄ mↄ wá Lua ua ń wá nɛgↄ̃ɛ sɛ̃́iaↄ ń wá zunɛ sɛ̃́iaↄ ge sã ge ble, wíli kpá sa'ona pↄ́ lɛ́ zĩkɛ weↄwa, lá a ku Mↄizi ikoyã guuwa.

³⁸Wáli mↄ́ ń wá pↄ́wɛn sɛ̃́iao ń wá kàa sɛ̃́iaↄ ń wá libɛ sɛ̃́iaↄ ń wá vɛ̃ɛ sɛ̃́iaↄ ń wá nísi sɛ̃́iao, wí kálɛ làasiu wá Lua ua sa'onaↄnɛ. Wáli wá buapↄ́ↄ kwide bↄ Levii buiↄnɛ, asa Levii buiↄ mɛ́ ì a kwide si zↄ̃ɛwia ń zↄ̃ɛwiao.

³⁹Tó Levii buiↄ lɛ́ a kwide sí, Aalona bui sa'onaeↄ líↄ kúńnↄ. Levii buiↄ sↄ̃ aali pↄ́ kwide pↄ́ aa sìpi kwide sɛ gɛò wá Lua ua, aali kálɛ làasiu.

⁴⁰Levii buiↄ ń Isaili kĩniↄ píi lí pↄ́wɛna ń vɛ̃ɛo ń nísio labakɛ, aali kálɛ làasiu Lua ua, gu pↄ́ luakukĩi pↄ́ↄ kuu ń sa'ona pↄ́ lɛ́ zĩkɛ weↄ ń bĩ́ibↄlɛdↄ̃anaↄ ń lɛ̀sinaↄ. Màa wáli pãkpa wá Lua uaio.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

Nɛɛmii 1012345678910111213

Nɛɛmii 10
1
2
3
4
5
6
7
8
9
10
11
12
13