Nehemiah 10

1

2

3

4

5

6

7

8

9

10

11

12

13

¹Mwet se emeet in filiya mutun paol kac pa Governor Nehemiah, wen natul Hacaliah. Akluo pa Zedekiah, na mwet inge elos wi pac sainiya: Mwet tol:

²Seraiah, Azariah, Jeremiah,

³Pashhur, Amariah, Malchijah,

⁴Hattush, Shebaniah, Malluch,

⁵Harim, Meremoth, Obadiah,

⁶Daniel, Ginnethon, Baruch,

⁷Meshullam, Abijah, Mijamin,

⁸Maaziah, Bilgai, ac Shemaiah. Mwet Levi:

⁹Jeshua wen natul Azaniah, Binnui ke sou lal Henadad, Kadmiel,

¹⁰ac mwet kasru lalos: Shebaniah, Hodiah, Kelita, Pelaiah, Hanan,

¹¹Mica, Rehob, Hashabiah,

¹²Zaccur, Sherebiah, Shebaniah,

¹³Hodiah, Bani, ac Beninu. Mwet Kol lun mwet uh:

¹⁴Parosh, Pahath Moab, Elam, Zattu, Bani,

¹⁵Bunni, Azgad, Bebai,

¹⁶Adonijah, Bigvai, Adin,

¹⁷Ater, Hezekiah, Azzur,

¹⁸Hodiah, Hashum, Bezai,

¹⁹Hariph, Anathoth, Nebai,

²⁰Magpiash, Meshullam, Hezir,

²¹Meshezabel, Zadok, Jaddua,

²²Pelatiah, Hanan, Anaiah,

²³Hoshea, Hananiah, Hasshub,

²⁴Hallohesh, Pilha, Shobek,

²⁵Rehum, Hashabnah, Maaseiah,

²⁶Ahiah, Hanan, Anan,

²⁷Malluch, Harim, ac Baanah.

²⁸Kut, mwet Israel, wi mwet tol, mwet Levi, mwet topang ke mutunpot lun Tempul, mwet on lun Tempul, mwet orekma ke Tempul ac mwet nukewa su srelosla sifacna liki mwetsac su muta in acn sesr, fal nu ke Ma Sap lun God, aok kut inge kewa, oayapa mutan kiasr ac tulik natusr kewa su matwa fal in kalem,

²⁹kut wi pac mwet kol lasr inge in orala sie wuleang ku, tuh kut fah moul fal nu ke Ma Sap lun God, su God El tuh sang nu sel Moses, mwet kulansap lal, ac tuh kut fah akos ma nukewa su LEUM GOD lasr El sapkin nu sesr, ac kut fah liyaung ma sap ac oakwuk lal nukewa. Kut fin kunausla wuleang se inge, ac fah sie mwe selnga nu sesr.

³⁰Kut fah tia apayuki yurin mwetsac su muta in acn sesr.

³¹Mwet sac fin use mwe mongo ku kutena ma in kukakin nu sesr ke len Sabbath, ku kutena len mutal saya, kut ac fah tia moli ma yorolos. Yac se akitkosr nukewa kut fah tia imai acn uh, ac kut fah sisla soemoul nukewa.

³²Ke yac nukewa, kais sie sesr fah asang sie tafu oalkosr in sie ounce ke silver, in kasru moli mwe enenu lun Tempul.

³³Na pa inge ma kut fah sang in orekmakinyuk ke pacl in alu ke Tempul: bread mutal, mwe kisa wheat ke len nukewa, kosro nu ke mwe kisa firir ke kais sie len, mwe sang mutal lun len Sabbath ac Kufwa lun Malem Sasu ac len fulat saya, oayapa mwe sang mutal saya, mwe sang in sisla ma koluk lun mwet Israel, ac kutena ma ac eneneyuk pac nu ke Tempul.

³⁴Kut mwet uh, ac mwet tol ac mwet Levi, ac fah susfa ke kais sie yac in fahkak sou su ac sruk etong in isik mwe kisa nu sin LEUM GOD lasr, fal nu ke oakwuk lun Ma Sap.

³⁵In kais sie yac kut fah us nu ke Tempul sie mwe kisa ke fahko se meet ke ima lasr, oayapa ke fokinsak mwesrla emeet ulun sak sunasr.

³⁶Wen se oemeet isus me nu sin kais sie sesr kut fah usla nu yurin mwet tol in Tempul, ac kisakunulang nu sin God we, fal nu ke ma oakwuk in Ma Sap. Kut fah oayapa kisakunang cow mukul fusr soko isusla oemeet sin kais soko cow natusr, ac wounsien kais soko sheep ac nani natusr ma mukul.

³⁷Kut fah usla nu sin mwet tol in Tempul flao ma orekla ke kosrani se oemeet lun wheat ke kais sie yac, oayapa mwe kisa lasr saya ke wain, oil in olive, ac kain in fokinsak nukewa. Kut fah usla sie tafu singoul ke fokin ima lasr ac sang nu sin mwet Levi su orani sie tafu singoul in siti srisrik, acn ima lasr oan we.

³⁸Eneneyuk tuh mwet tol su ma in fita lal Aaron me, in wi mwet Levi muta ke pacl in orekeni sie tafu singoul inge. Na mwet Levi fah usla sie tafu singoul in ma orekeni inge nukewa nu ke nien filma ke Tempul, tuh in orekmakinyuk in Tempul.

³⁹Mwet Israel ac mwet Levi fah eis ma orekeni nukewa ke wheat ac wain ac oil in olive, ac filiya ke nien filma yen kufwen mwe orekma lun Tempul oan we, su pa inge fukil in muta lun mwet tol su eis kunokon lalos, ac mwet topang ke mutunpot lun Tempul ac mwet on lun Tempul elos muta pac we. Kut fah tia pilesru lohm sin God lasr.