Mark 5:20-36

²⁰Woallo ken inlahr pwahjili nehn wein Decapolis manman koalikko ma Jesus wiahng ih; irai ken inenin pwuriamweikihla.

²¹Jesus pwuroahng pwurla oaloap lehu. Pokon koalik oau aluhpene pidekihpene ih in poahrinjeddo.

²²A koaunin jinakoke men, oadoa Jairus, rukdihoang in pwoalkoa,

²³engdehnla nehn ah poakpoak, pwa “Maing, noai jerpein siksik kij nimwennoar mehdi. Menlau inla kihdahng poahmmwen pohn ih pwa en sihkeida apel kak mour.”

²⁴Jesus uhda pwilihla joumajjo. A pokon koalikko pel kahujla. Wija ohroj nehn allo ken koaisla.

²⁵Lihmen pel pwili mine wijahu, ma anki johmwehuin insa pwilpwil oaroain johnpar eijek riau.

²⁶Ih ken roaproapoan mour ipen sohnwini dir, doadoahkkihla nah mwani kan ohroj. Apwen johpwa kaspoa, pwa pwen naunahla kahuka.

²⁷Nehn en liho rongda doahr Jesus jang ipen armaj kan, ih ken sohlahng likinjarkin, pukkoangdi ah likkoauwo,

²⁸pwehng pein ih, “Ma pwen ah likkoauohr ngoahi pukkoang, ngoahi nen sihkeida.”

²⁹Doari, ih ken pukkoang en Jesus likkoauwo, a nehn anjoauwohr koarkoarin insahu enngengla; liho ken poahmda jang nehn palwoaroa pwa ih ne sihkeidahjang ah johmwehuwo.

³⁰Nehn anjoauwohr Jesus poahmda sihkei kij injang ipoa, ih ken jipwjipweljili nehn pokonno, pwehng ihr “Inje ma pukkoang oai likkoauwe?”

³¹Nah sohnpadahkkok pwehng ih, “Koawoa kapang pwa pokonne koaisihla koawoa; a koawoa ken pwa ‘Inje pukkoang ngoahi?’”

³²Jesus ken jipwjipweljili pohn pokonno pwa en kapangda inje ma wia mehu.

³³A liho, nehn ah kidalda dahkij wiawihoang, ih ken majpwehkda roarroarroar, sohdo ipoa, rukdi in pwoalkoa, pwehng Jesus me ohroj.

³⁴Jesus ken pwehng liho, “Noai jerpein, oamw pwojon ioar kasihkeida koawoa. Doari, alwe in peren pwa koawoa ne sihkeidahjang oamw johmwehu en.”

³⁵A nehn ah lallallal, pakair oau lel ipen Jairus, jang in umwahu, ma pwa, “Nihmw jerpeinno ne mehdi; joah kadroapwoahki Johnpadahkken en indoa.”

³⁶Jesus johpwa soahk; ih pwehng Jairus, “Koawoa en joah mijik, a koawoa pwojonnoar.”