Maleko 5:20-36

²⁰Iya kabo ye lau Dekapolisi tehana unai Yesu saha ye ginauli iya unai wa ye hewasa, ede tamowai maudoidi se nokokalili.

²¹Yesu ye gelu waga wa unai na ye uyo hali tanakawasi wa. Ye duna kabo ye pesa nagali wa unai, na bodalakilaki temenai se tupagogoima iya unai.

²²Kabo sunago tanuwagana hesau, hesana ede Yailo, iya Yesu ye kita ede ye lau ye tulibono Yesu talanuwana unai.

²³Na ye hedede katekamkamnalau iya unai, ye wane, “Natugu waihiu gagilina ye kasiyebwakalili. Taba gonowana ku laoma ku kabilau unai to kabo ye namwanamwa.”

²⁴Unai Yesu maiyana se lau, na bodalakilaki wa se hemuliwatanidi na yodi lau wa unai meta Yesu unai se heduheduna.

²⁵Waihiu hesau temenai, kana kasiyebwa meta kwasina ye miyamiyagabaei bolimai saudoudoi-labui.

²⁶Bolimai ne luwadiyena doketa maudoidi yodi sagu kalinawai meta nige gonowana, na waihiu wa meta ye kamkamnakalili. Na hemaisadi mo udiyedi yona moni maudoina ye hegehe, na kana kasiyebwa wa kabo ye helahelaki mo ye lau.

²⁷Iya Yesu yona laoma wasana ye lapui ede boda luwadiyena ye laoma Yesu dagelana unai na kana kwama ye kabitonogi,

²⁸unamo ede yona nuwatu ye wane, “Taba kana kwama mo ya kabitonogi, kabo ya namwanamwa.”

²⁹Mahanana ne unai kwasina kasiyebwana wa ye kaiyawasi, na tauna kamnana ye lapui meta kasiyebwa wa ye tatagwaligwaliko.

³⁰Na Yesu kamnana ye lapui meta gigibwali ye pesagabaei, unai ye kitabui boda wa udiyedi na ye henamai ye wane, “Kaiteya kagu kwama ta ye kabitonogi?”

³¹Yona hekahekatao se hededelau unai se wane, “Boda wa ku kitadi se heduheduna kalimwai, na ye saha to ku henamai ku wane, ‘Kaiteya ye kabilaoma kaliguwai?’”

³²Na Yesu ye kaikewatakikili taba bena laulau ne tauginaulina wa ye kita.

³³Saha ye tubu wa unai ede waihiu wa ye nuwatulobai, unai ye matausitabutabubu. Kabo ye laoma ye tulibono Yesu talanuwana wa unai, na kabo saha ye ginauli wa ye hededehemasalaha.

³⁴Yesu kabo ye wane, “Natugu, kowa yom sunuma unai ede ku namwanamwa. Ku lau ma nuwabigam, kam kasiyebwa ye kaiyawasiko.”

³⁵Sola iya ma hedehededena na sunago tanuwagana wa yona numa unai tamowai hekadi se laoma na se hededelau iya unai se wane, “Natum waihiu wa meta ye boitako! Tanuwagada tabu ku hemohemode.”

³⁶Yesu nige ye lapulau yodi hedehedede wa udiyedi, na ye hededelau sunago tanuwagana wa unai ye wane, “Tabu ku nuwabasabasa, na ku kawamamohoiyeigau mo.”