San Marcw 5:20-36

²⁰Dxel ziax, guzuloj rëbix loj ree bén zojb niz Decápolis gra ni been Dios por laax, abiꞌ graczi reeman badxaloj.

²¹Chi badxin Jesús loj barcw stiblad roꞌ nijs guin, dád zien ree bejn bidoꞌp, persi roꞌzi nijs guin bayaꞌnman.

²²Dxel bidxin tijb bén rniabee lën tijb xyadoo ree bén Israel, laman Jairo. Chi baguiaaman Jesús, bazuxibaman lojman,

²³abiꞌ guzajcaman laaman liaadx, rëbaman: ―Ma cayëjt da xiꞌnan. Yoꞌsii din gudxiib yaal guijquim din yayajquim din guibanm.

²⁴Zinët Jesús bén guin, dád zien bejn zinal laaman xt rixaꞌt reeman laaman.

²⁵Loj graczi reeman noꞌch tijb béngunaa, ma gojc chiptioꞌp ijz ragxuuman ryajbaman rejn.

²⁶Dád ma guzagdiajman, ma banijt graczi ni rajpaman guial wejman loj ree doctor, per ad bayajctaman, aal mazri zroꞌ rajcaman.

²⁷Chi biguiejnman gra ni rüjn Jesús, gudëdaman la̱d ree bén guin, gubigaman niz xijchaman dxel bagaalaman xabaman.

²⁸Guial gunaladxaman: “Gugalzan xabaman, ma bayajc gajcan.”

²⁹Loj hor zii gajc gulëjz biajbaman rejn, abiꞌ gogbeeman ma bayajcaman.

³⁰Laa gogbee gajc Jesús guial yuꞌ chu ma bayajc por xguialrniabeeman, abiꞌ badxiꞌ lojman loj ree bén guin dxel gunabdiidxaman, rëbaman: ―¿Chu baquiꞌ da xaban?

³¹Abiꞌ rëb ree xbejnman lojman: ―Awa ruguiaal xt rixaꞌt reeman lüj guiáad lüj rniabdiidxil chu baquiꞌ xabil.

³²Per Jesús ruguiaaman gra lad din guguiaaman chu baquiꞌ laaman.

³³Abiꞌ guidib rnij béngunaa guin guial rdxebaman, guial gogbeeman ma bayajcaman, bigzuxibaman loj Jesús, beman diidxli ni beenman.

³⁴Dxel rëb Jesús lojman: ―Xiꞌn, guial bililadxil naj zeel ma bayajquil. Baguiaj zagdxe. Ma bayajquil guialguijdx ni goquil.

³⁵Sta canee Jesús zian, chi bidxin ree bén guza lidx Jairo, rëb reeman loj Jairo: ―Ma güjt xiꞌnl. Ad ruslenril mextr guin mazri.

³⁶Per chi biguiejn Jesús ni rëb reeman, rëbaman loj Jairo: ―Ad rdxebil, bililadxzi naj.