Markus 5:20-36

²⁰Iei mine ewe mwän a feila seni, a tori ewe fanü itan Engol Telinimw o apworausafeili mine Jesus a föri fän itan. Iwe, ekewe aramas meinisin mi rongorong ei pworaus ra mairü ren.

²¹Iwe, Jesus a liwinsefäliti epek ewe noom. Ikenan eu mwichen aramas mi chomong ra mwicheto ren.

²²Mürin Jairus eman meilapen imwen felikis a feito. Iwe, lupwen a küna Jesus, a chapetiu arun pechen

²³o a fokun tüngormau ngeni, “Nei nengin a arap ngeni mäla. Kose mochen kopwe feito o iseis poumw won, pwe epwe pöchökülela o chikarsefäl.”

²⁴Mürin Jesus a etala Jairus. Nge chomong aramas ra tapwela mürin o etiepach ngeni.

²⁵Iwe, a wor eman fefin a eäni samaun fefin mi fokun watte lon ükükün engol me ruu ier.

²⁶A fokun riaföü ren chomong sousafei ra säfeeni. A pwal fangala meinisin mine a wor ren fän iten an epwe küna pöchökül, nge an samau a chök wattela.

²⁷Lupwen ei fefin a rong usun pworausen Jesus, a feito me lükisökürün lein ewe mwichen aramas o atapa üfan,

²⁸pun a ekieki lon lelukan, “Are üpwe chök atapa üfan, üpwe pöchökülsefäl.”

²⁹Lon ewe chök otun a atapa üfen Jesus we, an we samau a köüla. Iwe, a mefi lon inisin pwe a chikar seni an we samau.

³⁰Lon ewe chök otun Jesus a mefi pwe och manaman a towu seni, iei mine a sap ngeni ewe mwichen aramas o a aisiniir, “Iö we a atapa üfei?”

³¹Nöün kewe chon kaiö ra pölüeni, “Ka fen küna ekewe aramas mi etiepach ngonuk, nge pwota ka ais, ‘Iö we a atapaei?’”

³²Iwe, Jesus a nenefeil pwe epwe küna iö we a föri ei.

³³Nge ewe fefin a silei mine a fis ngeni. A feito o fotopwäsuk arun pechen Jesus fän chechech me niuokus. Iwe, a pwäri ngeni Jesus meinisin mine a fis ngeni.

³⁴Iwe, Jesus a üreni, “Nei fefin, om lükülük a apöchökülokotä. Kopwe feila fän kinamwe pwe ka chikar seni om samau.”

³⁵Nge lupwen Jesus a chüen kakapas, ekoch nöün Jairus chon künö ra war o üreni, “Noumw nengin a mäla. Pwota ka chüen aweiresi ewe sense?”

³⁶Iwe, Jesus esap afäli mine ra apasa, nge a üreni Jairus, “Kosap niuokus, kopwe chök lükü.”