Mareko 5:20-36

²⁰Mume ŋic e rarâ, Jesuzi wiac ecnewec irec biŋe hae 10 ŋerawec mâreŋ ira jufârehuc ŋic jazame jaŋe manarâ secke‐fârembiŋ.

²¹Eme Jesu e wokeo ferâ ʒiŋucpec ware fisirâ moŋgeŋko waharâ domahame biac ŋic mâretec fisirâ tumaŋnembiŋ.

²²Ehapie mitific soŋaŋ moc, ʒâŋene Jairo, eki fisirâ Jesu honerâ kikefuŋnao fodaperâ fotariecnehuc

²³ʒiŋuc numucnewec: “Otâ‐nane hâmozo ekac, irec go warerâ megezi bâuarâ bâpiaŋketec juzejec.”

²⁴Âzâcneme manarâ rawec. Rahame ŋic guru sâko jaŋe bâjuŋ qâjuŋ ecnembiŋ.

²⁵Eme ŋondeŋ‐jeŋicko ŋokac moc juwec eki soc rohuc juhame jara 12 ewec.

²⁶Eme dokta bocjahazi erao gie bâipiehapie ʒâic wemo afecne manahuc juwec. Â irec furi moneŋ mafa‐ticne jarekume hesackewec. Eme sifu hucticne mi afeckehuc mâc ɋârâŋkecnewec.

²⁷Eme ŋokac eki hâcne Jesure biŋe manarâ ŋic ŋokac gâcne jaŋere ŋondeŋko juhuc râpefuŋnao rarâ ŋaqi‐ticne bâuawec.

²⁸I ʒiŋuc muhuc ewec: “Ŋaqi‐ticne sawa bâuarâ biaŋnuocmu.”

²⁹Bâuame izia socticne ʒickeme sahac‐ticne bâgunuckeme manawec.

³⁰Eme Jesu e tâpiri‐ticne moc wahame manarâ forisierâ wiohuc muwec, “Ŋaqi‐nane mozi bâuakac?”

³¹Mume motecfâcne jaŋe ʒiŋuc âzâcnembiŋ: “Ŋic jaŋe hejâŋâŋgupie wemocte mukic, ‘Mozi bâuacnukac’?”

³²Eme Jesu eki ine bâuawec e ʒâŋitaocte hone wosâc ejarewec.

³³Ŋokac e ine sahac‐ticnao mâsi fuawec i manarâ maŋne heme ɋarac ɋarac qahuc Jesure maŋfuŋko fodapehuc fuŋne‐ticne mufuarâ âzâcnewec.

³⁴Eme eki ʒiŋuc âzâcnewec: “Ŋokac, mamanasiŋgere biaŋgukac. Irec go buge mâteŋkeha ra ɋiɋicne juzemec.”

³⁵Ŋokac dâŋ iŋuc âzâcnehuc domahame mitific soŋaŋte fickonec kiŋaŋ warerâ mumbiŋ, “Otâge hâmokac, irec wemocte qaqazu maŋgâŋ ecnetec raocmu.”

³⁶Eme Jesu e dâŋ i mana‐bipierâ soŋaŋ ʒiŋuc âzâcnewec: “Mi hâwicguoc, mâc manasiŋnuc.”