Mak 5:20-36

²⁰Ya eme ndramak nane dah, iu ili bolo kon ma ronoh udu loboho Dekapolis asehek ta nyala lahou tinan mene, Jises ndramesekei i tan, ya eme iri lau marakon lomondra solo-an.

²¹Eme Jises i ndron ja iu i kapa gwa bilisiu, eme ya lau solo-an labai, atukum ame le kapa gwa hawen.

²²Eme ndramak ari ta atondrok asiu ta atukum tiri Juwis nyaran Jairus, iy atou Jises ma iy eme taku in katin.

²³Eme Jairus tiye sahou tikisiy i tan i buku doh, “Naduk badih badeh, mirihik ta anya kimek ai, ou ame atehei minem ki tan ya iy kamak ja.”

²⁴Eme Jises i hawen, ma hawe iri lau solo-an an hamon tan ala ale, ma awudi iy udu le alih.

²⁵Eme ya badih ari udu aliy, sik ndra udu tan winiya jaha ma ronoh la-uh.

²⁶Iy ndrakahei luk sabe kolek ndra tiri lau ta anyumor ma amekes iy kamwenen, arile bwe, sik tan bamwenen se bwai. Ya iy akohok sisi-in kahis le, ma sik ja asahan boto-on le gwek.

²⁷Iy ndranuhun nyala Jises bwena, eme iy sokohani iy i ndrokowa iri lau ili in hamon tan, eme iy tawi kiri awin ta Jises,

²⁸tasah iy anya, “I buku none jo katawi le kiri awin tan kameh jo amwenen ja.”

²⁹Eme se nawin bwe, sik ndra tan iu ma ano mara-ei, eme iy atona bolo odan badeh, ndramwenen mara-ei.

³⁰Jises ndratanan boto-on tan ndrame len, eme iy tubuni madan i tiri lau marakon, eme ma iy tiye, “Are lau tawi awin tek?”

³¹Eme oro lau tan anya, “Ou atou lau ahas badam badeh, i buku sah handru, ma ou tiye anya ja, ‘Are lau tawi jo?’”

³²Eme madan ili eme, iy anya kasilah are lau nane amekes lakou doh.

³³Eme badih nane dah tanan lakou nane asahan tan, eme iy inoh ma iy totoreh, ma iy morohani iy i andri kati Jises eme ma iy asehek sasah mene asahan tan.

³⁴Eme Jises tiye i tan anya, “Nadu badih den, ou atehei budon tam handru in tek, ma mesekei ou asahan amwenen. Ou au ma ndrinem kamunum, tasah sik tam ndra-au ma ndrano mara-ei.”

³⁵Eme iy asehek sahou kahis le, lau ra-on ado asiu ta Jairus ame tiye ta Jairus, “Nadum badih ndramak. I buku sah ou asehek sahou kahis i ta ndramak ta leheya badeh?”

³⁶Eme Jises banuhun sahou toro bwe, eme iy tiye i ta Jairus, “Ou sanoh, budon tam handru ki-in tek.”