1Kuyamba kwa Mafala Yabwino yakulewa bza Jezu Krixtu, Mwana wa Mulungu.
2Ninga mpolofiti Isaya adanemba kuti:“Mulungu adati, Ndin'dzatuma mtumiki wangu kutsogolo kwako, kuti akakondze njira yomwe iwe udzapitembo.
3Fala la munthu wakukuwa mthengo ali kulewa kuti, ‘Kondzani njira yakudzapitira Mbuya, thamulani miseu yomwe adzapitembo.’”
4N'cadidi adawoneka Juwau M'batizi kuthengo acilalika, “Sandulikani mtima, mubatizidwe. Mulungu an'dzakulekererani bzakuipa bzanu.”
5Akhabwera kwa iye wanthu wakucokera kumbali zentse za Judeya na Jerusalemu. Iwo akhazimbula bzakuipa bzawo, Juwau akhawabatiza mumkulo wa Jorodau.
6Iye akhabvala khanda la nchefu, akhamanga mciuno na mceka. Cakudya cace cikhali mabombo na uci bwa mthengo.
7Akhalalika aciti: “Pambuyo pangu pakubwera winango wamphambvu kuposa ine. Wakuti ine ndine wakusaya kufunika ngakhale kukotama kutsudzula thambo za xangu zace.
8Ine ndakubatizani na madzi, tsono Iye an'dzakubatizani na Mzimu Wakucena.”
9Ntsiku zimwezo Jezu adabwera kucokera kuNazalee, mui ubodzi wa Galileya, acibatiziwa na Juwau mumkulo wa Jorodau.
10Pakucoka mmadzimo, adawona kudzulu kwakufunguka, ndipo Mzimu Wakucena udabuluka kwa Iye ninga nkhangaiwa.
11Kudzulu kudabveka mafala yakuti: “Iwe ndiwe Mwana wangu wa pamtima. Nimbakomedwa nawe kwakukulu.”
12Nthawe imweyo Mzimu Wakucena udapitisa Jezu mthengo.
13Adakhala kumweko ntsiku makumi manai. Sathani adamuyeza. Bzikhalipombo bzirombo bza mthengo. Tsono anjo zikhamutumikira.
14Ataikhidwa kaidi Juwau, Jezu adayenda kuGalileya acilalika Mafala yabwino yakulewa bza Mulungu.
15Adati: “Nthawe yakwana. Bwafika Ufumu bwa Mulungu. Sandulikani mtima. Khulupirirani Mafala Yabwino.”
16Pakuyenda mmphephete mwa thawale la Galileya, Jezu adawona wanthu awiri, Sirimau na m'bale wace Andereya, akhatheya bwazi mmadzi, thangwe akhali akhongwe.
17Adawauza Jezu: “Imwe munditewere, ndikusanduseni akhongwe wa wanthu.”
18Adasiyeratu mabwaziyo ndipo adamutewera.
19Atafamba pang'ono, adawona Tiyagu na Juwau, wana wa Zebedeu, omwe akhali mmwadiya kukondza mabwazi.
20Jezu adawacemera, ndipo adasiya baba wawo Zebedeu mmwadiya pabodzi na anyabasa wace, acitewera.
21Adayenda wentse kuKafernau. Yatafika ntsiku ya malinkhuma, Jezu adayenda mnyumba ya mapembero, acipfundzisa.
22Wentse adadabwa na bzakupfundzisa bzace thangwe akhapfundzisa na utongi, akhasiyana ninga amisiri wa Mtemo.
23Nthawe pang'ono adawoneka mnyumba ya mapemberomo munthu wakuphatidwa na mzimu wakuipa. Adalewa na kukuwa aciti:
24“Tina ciani na Imwe, Jezu wa Nazalee? Kodi mwabwera kudzatidzonga? Ndakudziwani kuti ndimwe Wakucena wa Mulungu.”
25Ndipo Jezu adalamulira mzimu wakuipayo, aciti, “Khala zii, coka mwa munthuyu.”
26Pamwepo mzimu wakuipa ule udamutekenyesa munthuyo kwakukulu ucikuwa kwene-kwene, ndipo udacoka.
27Wentse wale adadabwa kwakukulu acimbabvundzana, “Kodi bzimwebzi n'ciani? Cakupfundzisa cipsa cimweci! Ambaitonga mizimu yakuipa na mphambvu, ndipo idamubvera.”
28Mwakamkulumize, mbiri yace idamwazika mbali zentse za Galileya.
29Pambuyo pace Jezu adacoka kunyumba ya mapembero kule, adayenda kunyumba ya Sirimau na Andereya pabodzi na Tiyagu na Juwau .
30Mibzala wa Sirimau akhadagona kwakufesuka, pamwepo wanthu adawuza Jezu bza matendayo.
31Jezu adayenda aciwaphata boko aciwamusa, ndipo maferu yadamala. Na tenepo mai ule adawaphikira cakudya.
32Maulo, latamira dzuwa, adawabweresa wentse wanthu kwa Jezu wakuduwala na wakuphatidwa na mizimu yakuipa.
33Wentse wa mumzindamu adagwezekana pamsuwo.
34Jezu adalimbisa azinji omwe akhabonera na matenda yakusiyana-siyana, acicosa mizimu yakuipa, aciiletsa kulewa-lewa thangwe idamuzindikira.
35Macibese-bese kukhanati kucena, Jezu adamuka aciyenda kuthengo. Kumweko adakapembera.
36Sirimau na andzace adamunyang'ana mbali zentse.
37Atamugumana adamuuza kuti: “Wanthu wentse ali kukunyang'anani.”
38Tsono Iye adatawira kuti: “Mbatiyendeni tipite kumidzi inango pafupi na pam'pano, ndikalalike mafala kumweko. Thangwe ndibzo ndidabwerera.”
39Ndipo adayenda acilalika mnyumba zentse za mapembero kuGalileya kwentseko acicosa mizimu yakuipa.
40Munthu winango wa mapere adabwera kwa Jezu. Adagodama acimudandaulira: “Mucifuna, mungakwanise kundilimbisa.”
41Jezu adamubvera ntsisi. Adatambalisa boko lace acimukhuya acilewa, “Cadidi, ndafuna, ulimbe!”
42Panthawe ibodzi-bodziyo mapere yace yadamala, acicenesewa.
43Ndipo Jezu adamuwuza kuti acoke acimucenjeza
44kuti, “Uleke kuwuza ali-yentse bzimwebzi, tsono uyende ukabziwonese kwa azibaba wantsembe*, ukapereke ntsembe yomwe adalamula Mozeji ikakhale mboni kuti walimbadi.”
45Adandocoka pamwepo, munthuyo adayamba kumbazimbula bzentse na kumwaza nkhani. Na tenepo bzikhafunika lini kuti Jezu awoneke padeca mmizinda mwentse tsono akhakhala kuthengo. Ndipo wanthu akhambayenda kwa Iye kucokera mbuto na mbuto.
