1Ntsiku inango, mthithi ukuru wa wanthu udagumana pomwe.nakuona kuti palibe cakudya, Jezu adacemera wakupfundzira wace aciwawuza kuti,
2“Ndiri kuwabvera ntsisi wanthuwa, thangwe akhala nande ntsiku zitatu ndipo alibe cakudya.
3Ningawabweza kwawo na njala tenepa, an'dzakomoka pa njira, thangwe winango acokera kutali.”
4Wakupfundzira wace adamubvundza kuti, “Wanthu azinji terepayu munthu angawanyang'anire tani cakudya cakukwanira, munthuku muno?”
5Jezu adawabvundza kuti, “Muna mikate mingasi?” Iwo wadatawira, “Minomwe.”
6Pamwepo Jezu adauza mbumba ire kuti ikhale pantsi. Pambuyo pace adatenga mikate minomwe ire, acitenda Mulungu, adaigwatagwata aciipereka kwa wakupfundzira wace kuti agawire mbumba ire. Wakupfundzira wale wadaigawira mbumba ire.
7Akhana tuntsomba pomwe tung'ono-ng'ono. Jezu adatenda Mulungu, acilamula wakupfundzira wace kuti agawire mbumba ire.
8Wentse adadya acikhuta. Wadakokhobza bzakusala, acidzaza bzitundu bzinomwe.
9Wanthu omwe akhali pamwepo, amuna okha akhali pafupi-fupi bzulu bzinai. Jezu adadzauza mbumba kuti iyende.
10Pambuyo pace Iye na wakupfundzira wace adapita mmwadiya aciyenda ku mbali ya Dalammanuta.
11Ndipo Afaliseyu wadaenda kuna Jezu,ku katsutsana naye. Iwo adamukumbira kuti awawonese cizindikiro cakudabwisa cakucokera kudzulu. Akhandofuna kumuteyera msampha basi.
12Jezu adasisimira mu mtima aciti, “Thangwe ranyi wanthu wa tsapano lino wambafuna kuwona cizindikiro cakudabwisa? Ncadidi ndiri kulewa kuti palibe cizindikiro cidza citika kwa mbumba iyi.”
13Na tenepo, adawasiya, acipita pomwe mmwadiya aciyambuka ng'ambu ire.
14Pakucoka wakupfundzira wa Jezu akhadayebwa kutenga mkate, tsono mmwadiyamo akhana mkate ubodzi wokha.
15Ndipo Jezu adawabebesa aciti, “Bvesesani mucenjere na cakutupisa ca wafaliseyu na ca Herodi.”
16Pamwepo wakupfundzira wale adayamba kutsutsana acimbati, “Ali kulewa bzimwebzi thangwe tiribe mkate.”
17Jezu adabva bzomwe iwo akhalewa. aciwabvundza kuti, “Thangwe ranyi muli kutsutsana kuti mulibe mkate? Kodi mukhanati kuzindikira ayai kubvesesa? Kodi misolo yanu njakuuma, nandi?
18Maso munayo, tsono muniwona lini? Ndipo makutu munayo, tsono mumbabvesesa lini? kodi imwe m'nkubukira lini?
19Pale ndidagwata-gwata mikate mixanu kuti ndidyese wanthu bzulu bzixanu, kodi mudadzaza bzitundu bzingasi bza bzakusala?” Wakupfundzira wale adati, “Bzitundu khumi na bziwiri.”
20Jezu adawabvundza pomwe kuti, “Kodi pale ndidagwata-gwata mikate minomwe na kudyesa wanthu bzulu bzinai, mudakonkhobza bzitundu bzingasi bza bzakusala?” Iwo adati, “Bzitundu bzinomwe.”
21Pamwepo Jezu adati, “Kodi mukanati kubva basi?”
22Jezu na wakupfundzira wace adafika ku Betsaida. Kumweko wanthu adabwera na zimola, wacimukumbira kuti amukhuye.
23Jezu adam'phata boko, acicoka naye kunja kwa mui. Adaikha mata mmaso mwa munthu ule, acimuikha boko acimubvundza kuti, “Kodi uli kuwona cinthu?”
24Munthu ule adakwiza maso acilewa, “Ndiri kuwona wanthu ali kufamba-famba, tsono wali kuwoneka ninga miti.”
25Adamuikha pomwe boko mmaso mwace. ndipo adapenya acipora , aciyamba kuwona bwino-bwino
26Jezu adamuuza kuti ayende kwawo, acimuwuza kuti, “Uleke kubwerera ku mui ule.”
27Jezu na wakupfundzira wace adayenda ku mii ya ku Sesaleya-Filipi. mu njira adabvundza wakupfundzira wace kuti, “Kodi wanthu ambalewa Ine ndine yani?”
28Iwo adatawira kuti, “Winango ambalewa ndimwe Juwau M'batizi, winango ndimwe Eliya, winangombo ambalewa ndimwe m'bodzi wa apolofita.”
29Pamwepo Jezu adawabvundza kuti, “Kodi imwepo, mumbati ndine yani?” Pedru adamutawira kuti, “Imwe ndimwekirixtu Mpulumusi adalewedwa ule.”
30Tsono Jezu adawalamula kuti waleke kuwuza munthu winango ali-yentse bza Iye.
31Jezu adayamba kupfundzisa wakupfundzira wace kuti, “Mwana-wa-Munthu bzin'dzafunika kuti aboneresedwe kwene-kwene. Akulu wa Ayuda, na akulu wa azibaba wa ntsembe na amisiri wa Mtemo wacidzamulamba. Iye an'dzaphedwa, tsono zingadzapita ntsiku zitatu an'dzamuka.”
32Bzimwebzi adabzilewa padeca Na tenepo Pedru adamutenga aciyenda naye pambali, aciyamba kumutsimula.
33Tsono Jezu adaceuka, acinyang'ana wakupfundzira wace winango wale, ndipo adatsimula Pedru. Adati, “Coka kwa ine, iwe Satana! Ndzeru yako ndiyo lini ndzeru ya Mulungu , ni ndzeru ya wanthu.”
34Pambuyo pace Jezu adacemera mthithi wa wanthu pabodzi na wakupfundzira wale kuti abwere pafupi na iye, adawauza kuti, “Munthu an'funa kunditewera, abzilambe iye yekha, ndipo anyamule mtanda wace acinditewera.
35Thangwe an'funa kupulumusa moyo wace, an'dzautaya, tsono wakutaya moyo wace thangwe ra Ine na Mafala Yabwino, an'dzaupulumusa.
36Kodi ndiko kuti munthu ana phindu lanyi acikhala na bzentse bza pantsi pano, iye acitaya moyo wace?
37Munthu kuti alombole moyo wace angapereke ciyani?
38Nakuti aliwetse wa m'badwe wadzigololo na kuphonya uno, an'cita manyazi na Ine ndipombo na mafala yangu pamaso pa wanthu, napombo ine Mwana-wa-Munthu nin'dzacita naye manyazi pomwe nin'dzabwera pabodzi na anjo zakucena, na mbiri ya Baba wangu.”
