1Ndipo Jesu adanyamuka pambuto ire, adayenda kumbali ya kuJudeya, kumbali ya ng'ambo ya mkulo wa Jordani. Ndipo wanthu azinji adadzagumana pomwe na iye. Mwa cizerewezi cace, akhawapfunzisa pomwe.
2Ndipo adafika mafaliseu anango, adamubvundza kuti, “Nandi bzakubvumizidwa kuti munthu alambe m'kazi wace?” Akhadam'bvundza tenepo kuti amunyanganire thangwe.
3Jezu adawatawira aciti: “Ciani comwe Mozeji adakulamulirani?”
4Iwo adati:“Mozeji adabvumiza kuti munthu anembere m'kazi wace tsamba lakulambana patsogolo pace amucose.”
5Jezu adati: “Mozeji adakunemberani mtemo umweyo thangwe ra kuuma mitima kwanu.
6Koma, pa ciyambi pa bzentse Mulungu, adalenga wanthu, mamuna na m'kazi.
7Thangwe race mwamuna an'dzasiya baba na mai, acikaphatana na m'kazi wace,
8ndipo awiriwa akhala thupi libodzi. Na tenepo ndiwo lini pomwe awiri, akhala thupi libodzi.
9Na tenepo bzomwe Mulungu waphataniza, munthu aleke kubzilekanisa.”
10Pomwe adapita mnyumba, wakupfundzira adamubvundza Jezu bza nkhani imweire.
11Iye adatawira kuti: “Omwe an'lamba m'kazi wace acikalowola munango, ali kucita upombo kuna mkazi wace.
12Bzibodzi-bodzimbo m'kazi angalamba mwamuna wace, acikalowodwa na munango, na iyembo ali kucita upombo.”
13Wanthu winango akhambabwera na wana kwa Jezu kuti awakhuye. Tsono wakupfundzira wace akhambawatsimula mwa ukali.
14Jezu pomwe adawona bzimwebzire, adakalipa aciwauza kuti, “Alekeni wanawa abwere kwa Ine. Lekani kuwaletsa thangwe Umambo bwa Mulungu n'bwa wale wakulingana na iwowa.
15Cadidi ndiri kulewa kuti omwe an'bvuma lini Umambo bwa Mulungu ninga mwana, umweyo an'dzabupita lini.”
16Na tenepo adayamba kuwakumbatira wana wale, aciwasandzika boko na kuwadalisa.
17Pomwe Jezu akhaguduka, munthu wina adam'thamangira, acimgodama kutsogolo kwace, acimubvundza kuti:“Mpfundzisi wabwino, kodi ningacite tani kuti ndidzatambire moyo wakusaya kumala?”
18Jezu adamutawira kuti: “Uli kundicemereranyi wabwino? Wabwino ni m'bodzi yekha, Mulungu basi.
19Mitemo umbaidziwa:‘Leka kupha, leka kucita upombo, leka kuba, leka kucita umboni bwakunama, leka kunamiza andzako, lemekeza baba wako na mai wako.’”
20Munthu ule adati: “Mpfundzisi, bzentsenebzi nimbabziteweza kuyambira ndiri mwana.”
21Jezu adamunyang'ana, na lufoi acimuwuza kuti:“Uli kusaya cinthu cibodzi: ndoko, ukagulise cuma centse. Kobiri zentse ukapase wanthu wakusauka, ndipo un'dzatambira cuma kudzulu. Patsogolo pace ubwere, udzanditewere.”
22Pakubva bzimwebzi, nkhope yace idadodoma, ndipo adacoka na kuneseka mumtima thangwe akhali munthu wa nthaka izinji.
23Jezu adanyang'ana mbali mwace, aciuza wakupfundzira wace kuti:“N'bzakunesa tani wacuma kukapita muUmambo bwa Mulungu!”
24Wakupfundzira wadadabwa na mafalayo. Tsono Jezu adabwerezera, aciti:“Wana wangu, n'bzakunesa tani kukapita muUmambo bwa Mulungu!
25N'bzakupusa kuti ngamira ipite pamubo wa ntsingano kuposa kuti munthu wakudala akapite muUmambo bwa Mulungu.”
26Pamwepo wakupfundzira adadabwa kwene-kwene acibvundzana kuti:“Kodi angapulumuke mbani?”
27Jezu adawanyang'ana aciti:“Kwa wanthu n'bzin'kwanisika lini, tsono kwa Mulungu ntenepo lini, Kwa Mulungu bzentse n'bzakukwanisika.”
28Pamwepo Pedru adayamba kuuza iye, kuti:“Onani, ife tidasiya bzinthu bzentse kuti tikutewereni.”
29Jezu adatawira:“Cadidi ndiri kukuuzani imwe, kuti omwe an'siya nyumba, abale, mpfumakazi, mai, baba, wana ayai minda thangwe ra Ine, ndipombo thangwe ra Mafala Yabwino,
30umweyo pantsi pano an'dzatambira bzentse bzakuwanda kwene-kwene kusiyana na kale: nyumba, abale, mpfumakazi, mai, wana, minda, ndipombo matsautso. Ndipo kutsogolo an'dzatambira moyo wakusaya kumala.
31Pamwepo azinji omwe ali wakuyamba an'dzakhala wakumalizira, wakumalizira an'dzakhala wakuyamba.”
32Wakhali pa ulendo bwa kuJerusalemu, Jezu akhali patsogolo, wakupfundzira wace akhadabwa. Napombo wanthu omwe akhatewera akhana mantha. Ndipo adawacemera pomwe wakupfundzira khumi na awiriwo pambali, aciwafokotozera bzomwe bzin'dzamucitikira.
33Adati:“Tiri paulendo wa kuJerusalemu. Kumweko Mwana-wa-Munthu ali kukaperekedwa kwa akulu wa azibaba wa ntsembe na apfundzisi wa mtemo. Iwo an'kamutonga na kupasa nyathwa kuti aphedwe. Ndipo an'kamupereka kwa wanthu wakunja.
34Iwo an'kamusinjirira, acikamupsipira mata, acimuchanga ndipo acimupha. Zingadzapita ntsiku zitatu, Iye an'dzamuka.”
35Tiyagu na Juwau, wana wa Zebedeu, adafendera kwa iye aciti:“Mpfundsisi, comwe tinikukumbirani, muticitire.”
36Jezu adabvundza kuti: “Mun'funa kuti ndikucitireni ciyani?”
37Iwo adati:“Tin'funa kuti pomwe mun'dzakhala mumbiri yanu, mudzatiikhe m'bodzi kuboko lanu ladidi, wina lamadzere.”
38Tsono Jezu adati: “Mun'dziwa lini bzomwe muli kukumbira. Kodi imwe mungakwanise kumwera mkombo omwe ine nin'dzamwera? Ndipo imwe mungadzabatizidwe ninga momwe ine nin'dzabatizidwa?”
39Iwo adatawira kuti: “Inde, tin'dzakwanisa.” Pamwepo Jezu adati:“Cadidi, mkombo omwe Ine nin'dzamwera, imwe mun'dzaumwerambo, ndipo mun'dzabatizidwa ninga ine.
40Tsono Ine ni utongi lini bwangu kuikha munthu kuboko ladidi ayai lamadzere. Mulungu ndiye adakondza mbutozo an'dzapasa ali-yentse omwe iye an'funa.”
41Pomwe anango wale khumi adabva bzimwebzi, adakalipira Tiyagu na Juwau.
42Ndipo Jezu adawacemera kuti abwere pafupi na iye, adati: “Mun'dziwa kuti atongi wa madziko ambayakunda. Akulu-akulu wawombo ambawonesa mphambvu zawo kwa wanthu wawo.
43Tsono pakati pa imwe bzileke kukhala tenepo. Omwe an'funa kukhala mkulu, atumikire andzace.
44Ndipo omwe an'funa kukhala wakuyamba, akhale kapolo wa wentse.
45Thangwe Mwana-wa-Munthu: alibe kubwera kuti adzatumikiridwe tsono kuti Iye adzatumikire wanthu na kupereka moyo wace kuti alombole azinji.”
46Ndipo atafika mumzinda wa Jeriko. Pomwe akhacoka mumzinda ule na wakupfundzira wace, pabodzi na mthithi wa wanthu, adagumana zimola m'bodzi wakukumbira-kumbira akhadakhala mphepete mwa njira. Munthuyo dzina lace akhacemeredwa Batolomeu, mwana wa Timeu.
47Pomwe iye adabva kuti ni Jezu wa kuNazalee, adakuwa aciti:“Jezu, Mwana wa David, ndibvereni ntsisi!”
48Wanthu azinji akhamutsimula mwa ukali kuti anyamale. Tsono iye adapitiriza kukuwa aciti:“ Mwana wa David, ndibverenimbo ntsisi!”
49Jezu adaima, aciwauza kuti:“Mucemereni.” Iwo adamucemera acimuuza kuti: “Limba mtima, lamuka, ali kukucemera.”
50Pamwepo iye adathusa kapote wace adamuka, acimoga, aciyenda kuna Jezu.
51Jezu adamubvundza kuti: “Un'funa kuti ndikucitire ciyani?” Zimola ule adatawira kuti, “Mpfundzisi, nin'funa kuwona.”
52Jezu adamuwuza kuti: “Ndoko, cikhulupiriro cako cakulimbisa.” Nthawe ibodzi-bodziyo adayamba kuwona, ndipo adatewera Jezu panjira.
