Maliku 11

1

2

3

4

5

6

7

8

9

10

11

12

13

14

15

16

¹Pomwe Jezu na wakupfundzira wace akhafendera kuJerusalemu, pafupi na mizinda ya Betefaje na Betaniya ya pafupi na phiri la oliveira, Iye adatuma wakupfundzira wace awiri,

²aciti: “Ndokoni m'mui omwe uli kutsogolo kwanu. Mungandopita, mukagumana kabulu kadamangiridwa, komwe kakanati kupakiridwa na munthu ali yentse. Mukakatsudzule mucibwera nako.

³Penu Wina an'kubvundzani kuti:‘Thangwe ranyi muli kucita bzimwebzi?’ Tawirani kuti: ‘Mbuya an'kafuna, ndipo patsogolo pace an'dzakabwezera pomwe kuno.’”

⁴Panthawe yomweyo wakupfundzira wale adayenda, acikawona kabulu kadamangirira pafupi na msuwo, kunja mphephete mwa njira, ndipo adakatsudzula.

⁵Anango omwe akhali pamwepo adawabvundza kuti: “Thangwe ranyi muli kutsudzula kabuluka?”

⁶Iwo adawatawira ninga momwe Jezu adawauza. Ndipo adawaleka acitenga.

⁷Wadakatenga kabulu, acibwera nako kuna Jezu ndipo wadatandika bzakubvala bzawo pamsana pakene, ndipo Jezu adapakira.

⁸Wanthu azinji akhambatandika bzakubvala bzawo munjira, anango akhambatandika mithawi ya miti yomwe akhambatcola mminda.

⁹Wanthu omwe akhali patsogolo, na omwe akhali mmbuyo, adakuwa kuti: “‘Ozana!’ Simbani omwe ali kubwera mudzina la Mbuya.

¹⁰Simbani Umambo bwa baba wathu David, bomwe buli kubwera mudzina la mbuya. Ozana kwa Mulungu wakudzulu!”

¹¹Ndipo Jezu adapita muJerusalemu, acikapita muNyumba ya Mulungu. Pakuti yakhali kale maulo, adanyang'ana-nyang'ana bzentse ndipo adacoka aciyenda kuBetaniya pabodzi na wakupfundzira wace khumi na awiri.

¹²Mangwana yace, pomwe iwo akhacoka kuBetaniya, Jezu adabva njala.

¹³Ndipo na patali adawona mkuyu ukhana masamba. Adayenda pafupi kuti pinango angawone nkhuyu. Ndipo adafika, alibe kuwona nkhuyu, adandokawona masamba yokha. Nakuti ikhali lini nyengo ya nkhuyu.

¹⁴Pamwepo adawuza mutiyo kuti:“Muti iwe, kuyambira lero, cipo winango ali-yentse an'dzadya lini bzisapo bzako.” Ndipo wakupfundzira wace adabva bzimwebzo.

¹⁵Iwo atafika kuJerusalemu, Jezu adapita muNyumba ya Mulungu, aciyamba kuthotha omwe akhacita malonda mmwemo. Adagwesa meza zakusinthira kobiri na mipando ya wanthu wakugulisa nkhangaiwa.

¹⁶Akhabvumiza lini ali-yentse agwate na pacinthalo ca Nyumba ya Mulungu adanyamula cinthu.

¹⁷Ndipo akhawapfundzisa aciti:“Bzidanembedwa kuti: ‘Nyumba yangu in'dzacemeredwa Nyumba ya mapembero kwa madziko yentse.’ Tsono imwe mwaisandusa nkhunde ya mbabva.”

¹⁸Pakubva bzimwebzi akulu wa azibaba wa ntsembe na apfundzisi wa Mtemo akhanyang'ana njira yakuti amuphe. Tsono akhabva naye mantha thangwe wanthu wentse akhadabwa nabzo bzomwe Iye akhapfundzisa.

¹⁹Kudayamba kudoka, Jezu na wakupfundzira wace adacoka mumzinda mule.

²⁰Macibese, pakuyenda munjira, adawona mkuyu ule wauma na mizi kubodzi.

²¹Pamwepo Pedru pakumbuka bzire, adamuuza kuti:“Mpfundzisi, onani, mkuyu omwe mudatemberera wauma.”

²²Jezu adawatawira, “Khulupirirani Mulungu.

²³Cadidi ndiri kukuwuzani kuti penu wina aniuza phiri iri kuti: ‘Coka apa, ukabzithuse kunyandza,’ angalewa na mtima wakusaya kukayika, mucikhulupirira cadidi kuti bzomwe ali kulewabzo bzin'citika, na tenepo bzin'dzacitika ninga bzomwe walewa.

²⁴Na tenepo ndiri kukuwuzani kuti ciri centse comwe mungakumbire mwa kupemba, khulupirirani kuti mwatambira ndpo na tenepo mun'dzatambira.

²⁵Ndipo mungafuna kupemba, cakutoma mulekerere mwandzanu penu munaye cinthu. Mungaterepo, Baba wanu omwe ali Kudzulu an'dzakulekelerani bzakuipa bzanu.”

²⁶“Tsono penu imwe munilekerera lini andzanu, Baba wanu omwe ali Kudzulu an'dzakulekereranimbo lini bzakuipa bzanu.”

²⁷Adabwerera pomwe kuJerusalemu. Ndipo pomwe Iye akhandobzifambira mNyumba ya Mulungu, akulu wa azibaba wa ntsembe, na apfundzisi wa mtemo, pabodzi na akulu wa maAjuda adabwera kuna iye acimubvundza kuti:

²⁸“Kodi utongi wakuti mumbacite bzimwebzi mudautenga kuponi? Mbani adakupasani utongi umweyu?”

²⁹Jezu adawatawira, “Na inembo ndicikupasani mbvundzo ubodzi. Munganditawira, ndipo nin'kuwuzani komwe ndidatenga utongi wakuti nimbacite bzimwebzi.

³⁰Kodi ubatizi bwa Juwau bukhali bwa kudzaulu ayai bwa wanthu? Nditawireni.”

³¹Ndipo iwo adabvundzana acimbati, “Tingalewa adazitenga kwa Mulungu, umweyu anilewa kuti:‘Kodi thangwe ranyi tsono mulibe kum'khulupirira?’

³²Tsono tingalewa kuti adazitenga kwa wanthu...” Iwo akhagopa wanthu, pakuti wanthu wentse wakhatawirira kuti Juwau akhali mpolofita.

³³Na tenepo adamutawira Jezu kuti:“Tin'dziwa lini.” Iye adawatawira kuti:“Na inembo nin'kuwuzani lini komwe ndidautenga utongi wakuti nimbacite bzimwebzi.”