1Ka Yesus ’baarki’da ris gwo gwansan mmo/o mo tani a’di ki o imanciḵ a’di gwo gwo mo ki:
2Um mishi mo mo ki ’ko’da cim su/ mo tani a’di ta’da cim ki Mompe’kup̱anyolos midi p̱u’du/ mo dhali Ya/ gi ’Kwani minu c̱i mo mmo’kosh ki cwany’ciṯẖan dhul mo be.
3Dhali igasiis kun can dhali ’kwani gwanyjaḵa/ gi ’kwani mo uni mini tul is mo mmonṯal ’de/ mo e bwaagoŋ ma gasiis jin ca’d mo a’di jin yuḵkunu gway ka Ḵayaap̱a mo be.
4Dhali uni gamki ’twa/ ’kup̱ mo mmonṯal ’de/ mo mmobutha Yesus ki kup̱ mo dhali mmo’kosh a’di jwa mo be.
5Hili uni o gwo mo ki: Yisa ka cim jin yuḵuwa yuḵ mo yisa, hili isi ciki/ haali/ adulaṯṯ midi di mo e bwaŋ ’kwani mo be.
6Dhali ka Yesus di’d e Pam Beeṯaniya e gu’b ma Simaan jin ta gi monthus mo tani
7a’boma kamu/ p̱u’dki’di a’di mo, a’di jin ta’d gi turaŋ gasaas jin ta gi kush mo, a’di jin din ma yina p̱i’dnaŋ gana/ nycine/ jin ’bitha yol she/ ki ’bi’th mo. Dhala yim ki wol a’di e ’kup̱ piti mo me’d jin dikina a’di eya tharabeesa mo be.
8Hili ki imanciḵ a’di gwo p̱arki a’di e mo tani uni deḵ ma nyor mo mmo/o gwo mo ki: Atinta shinu yansan isa ’cesh kan mo?
9Haali/ ayina p̱i’dna/ yansan minu ’taki yol ka guurush ki nyanye/ mo dhali c̱i ’kwani kun hatha’ko’d mo be.
10Hila Yesus ki tor mii yansan ki e mo dhali o uni gwo mo ki: Atinta ṯoca uma ’bom ’kus kan mo? Haali/ ayim mii tony jaro/ gom aha/ mo be.
11Haali/ um isa yempa/ tan gi ’kwani kun hatha’ko’d kun ’kon e um mo. Hili um mini ’koki ta gi aha/ ki sule/ mo be.
12Mmowoluwa yina p̱i’dna/ yansan e buŋgwar is pem mo tani ayim ki mii a’di mmothoson a’di gom aha/ gam kan jin minu kan aha/ mo be.
13Ka jiŋ gana/ aha/ ṯora um gwo mo ki: E mo yin jin minu c̱i gwom ’borga/ yan e mony’ceshi ’baar mo tani a’di jin miin ma yim mo tani minu ṯor mo mmonyoŋ mo mo mmoka ayim e mo be.
14Dhali yan’ko’d jan ṯal ’deŋ kamu/ ’peni uni jin ’dap̱ uni ’twa/ ka ’kume’d i’ce’dka su/ mo jin yuḵu gway ka Yahuusa Isḵariyuuṯi mo tani a’di yaki’d mo e igasiis kun can mo be
15dhali o gwo mo ki: Atinta mmina umi c̱i aha/ mo waḵki/ aha/ mina c̱i a’di ki um mo? Dhali uni ki c̱i a’di gabul ’dolkon kushi iss ’de/ i’ce’dka ’kume’d mo be.
16Dhali ’peni mo c̱aan ki jahanne/ mo tani a’di c̱orki’da c̱or mo mmogam embul gana/ mo mmo’ciṯẖ a’di is ki gwo mo be.
17Dhali ka cim jin ṯwa/a/ gi Maaŋḵuthu’d jin miinu ki dar ga cumaṯ mo tani imanciḵ gwo p̱u’dkina Yesus mo mmo/o gwo mo ki: Mana o /e bwa jin mina amani thoson to mo gom /e mo mmoshwa ki Mompe’kup̱anyolos mo?
18A’di ki o uni gwo mo ki: Iiku/ mo e ’peŋkuman bampa/ mo dhali e jan ’deŋ kamu/ mo dhali o a’di gwo mo ki: Amanṯor gwo o gwo mo ki: Mom pem ’dishi’d mo hila/. Aha/ mina mii rash di ki Mompe’kup̱anyolos yan e gu’b pini nyaḵki imanciḵ aha/ gwo mo be.
19Dhali imanciḵ a’di gwo miikin mo me’d jin ḵankin ma Yesus uni gwo mo, dhali uni ki thoson to mo gom Mompe’kup̱anyolos mo be.
20Dhali ki mo ta mom’pimpili/ mo tani a’di c̱a’bki’da tharabeesa nyaḵki imanciḵ a’di gwo mo kun ’koni ’kume’d i’ce’dka su/ mo be.
21Dhali ki uni ’kokin mo mmoshwa to mo tani a’di ki o uni gwo mo ki: Ka jiŋ gana/ aha/ ṯora um gwo mo ki jan ’de/ ’peni um midi ’ciṯẖ aha/ is ki gwo mo be.
22Dhali uni ’kokina bwa mmodiṯ mo kagahara, dhali uni ki ṯel mii ’pen mo mmo/o a’di gwo mo ka rem ’kup̱ ka baṯẖ ’pen mo ki: Aha/ ’taa? Tap̱a.
23Dhali a’di ki thoḵ gwo mo ki: A’di jin ’thup̱ki me’d piti eya sahan nyaḵki aha/ mo tani a’di midi ’ciṯẖ aha/ is ki gwo mo be.
24Haali/ Ya/ gi ’Kwani yaki’d mo me’d gwo jin ’kwarkunu mo gom a’di mo, hili wayyi e wathi/ yan a’di jin midi ’ciṯẖ Ya/ gi ’Kwani is ki gwo mo. A’di midi ’taki ’bor ki ’bor gana/ mo gom wathi/ yan waḵki/ a’di minu ’taki ’koki dhodhu/ mo be.
25Yahuusa be a’di jin ’ciṯẖki a’di is ki gwo mo a’di ki o a’di gwo mo ki: A/aha/ ’taa, Tap̱a? A’di ki thoḵ a’di gwo mo ki: /E oki a’di wakan si’da/ mo be.
26Dhali me’d jin ’kokina uni mmoshwa tonṯe/ mo tani Yesus bu’thki maaŋḵuthu’d mo dhali ’bora ’bor bwa i is mo, dhali a’di ki ’ce’d a’di mo dhali c̱i a’di ki imanciḵ a’di gwo mo dhali o gwo mo ki: Buthi a’di mo ma, dhali ’kayi mo ma. A’di yansan ita buŋgwar is pem mo be.
27Dhali a’di bu’thki’da ḵubbaaya mo dhali ki a’di c̱iki mom’bor bwa i is mo tani a’di ki c̱i a’di ki uni mo mmo/o gwo mo ki: P̱iyi a’di mo ma, aris umi ’baar mo,
28haali/ a’di yansan ita’da bas pem ki gwo jin gamu me’d mo, a’di jin wolki’d ka pije/ mo gom ’kwani ka ris mo gom mogwama gwam gom miinthus mo be.
29Aha/ ṯora um gwo mo ki aha/ mina diki doḵ/e p̱i yiman maman cwa yansan ki sule/ ntaga tee jin miga/ p̱i a’di jin ta jin this nyaḵki um e Bampa/ ma Ababam pem jin di’d e momis mo be.
30Dhali ki uni yuḵki gway mo tani uni iikin ka pije/ mo e ’Kuwosh Seṯuun mo be.
31Yan’ko’d aYesus ki o uni gwo mo ki: Umi ’baar mo mini ṯa’k mo gom aha/ mon’thiny yan shwane/ mo tani haali/ a’di ’kwarkunu mo ki: Aha/ mina ’kosha manhil ḵa’bal mo dhali ḵa’bal ’pena ma’diny piti mo tani uni minu c̱eker bwa mo be.
32Hili ŋ’ko’d mo tani ki aha/ piyunu/ mo tani aha/ mina ya um iṯwa/a/ e Pany Jaliil mo be.
33Dhala Buṯerus ki ṯor a’di gwo mo eya tente/ ki: Ba uni gwansani ’baar mo mini ṯa’k mo gom /e mo tani aha/ mina diki biṯ ki sule/ mo be.
34Dhala Yesus ki o a’di gwo mo ki: Ka jiŋ gana/ aha/ ṯora /e gwo mo ki mon’thiny yansan shwane/ mo nṯwa/a/ ka dhoŋgola ŋwa diki ko e naskina/ mo tani /e mini waṯaa/ gway me’di kwara mo be.
35Dhala Buṯerus thoḵ a’di gwo mo ki: Hili waḵki/ aha/ mina mii wu mo nyaḵki /e mo tani aha/ mina diki waṯ /e gway mo. Dhali imanciḵ a’di gwo ’baar mo o gwo wakansan mo be.
36Dhali yan’ko’d aYesus yaki’d nyaḵki uni mo e mo jin yuḵu ka Jaṯẖsemaani mo dhali a’di ki o imanciḵ a’di gwo gwo mo ki: ’Koyi mmahan mo ma ki aha/ mina thoṯẖ is mo mmaṯṯaan dhali ’tho mo be.
37Dhali a’di ki susa Buṯerus nyaḵki a’di mo dhali iya/ ma Sabadi isu/ mo, dhali a’di ṯelki mii ’pen mo mmoḵal bwan diṯi’d mo dhali bwa jin ṯoco’d mo be.
38Dhali yan’ko’d a’di ki o uni gwo mo ki: Aḵashiram pem a’di diṯa bwa ki diṯ kagahara mo gom mowu mo. ’Koyi mmahan mo ma, dhali timi nyaḵki aha/ mo ma.
39Dhali mmothoṯẖkina a’di ’peny’ce ari’ceenne/ mo tani a’di biṯki bwam/em piti a’cesh mo dhali ’tho mo ki: Ababam pem, waḵki/ a’di yan mishu mii mo tani dhalka ḵubbaaya yan ya’di pe aha/ mo ma. Bahili a’di jin oyaa/ bwa mo yisa. Hili a’di jin ta bwam pini mo be.
40Dhali a’di p̱u’dki’d e imanciḵ a’di gwo mo dhali gam uni ki uni ishki e mo. Dhali a’di ki owa Buṯerus gwo mo ki: A/um bunya/ mini ’koki tim nyaḵki aha/ ka tente/ ’de/ mo?
41Timi mo mo ma, dhali ’thoyi mo ma, ki um mini ’taki ’koki cic̱ mo e mo jin palu mo, haali/ shi/in ka jiŋ gana/ mo tani a’di ona bwa mo, hili buŋgwar is a’di ihatha’ko’d ki ha’th mo be.
42Doḵ/e gom me’d jin ’ko a’di isu/ mo tani a’di yaki’d mo dhali ’tho mo ki: Ababam pem, waḵki/ a’di yan mol pe mo tani hili isi ciki/ aha/ mina p̱i a’di mo, dhalki a’di jin ta bwam pini mo tani dhalki a’di miinu mo ma.
43Dhali doḵ/e a’di p̱u’dki’d mo dhali gam uni ki uni ishki e mo haali/ em buni ṯo’dki uni is mo be.
44Wakan a’di dhalki uni mo doḵ/e dhali a’di ki ya mo dhali ’tho mo gom me’di kwara mo mmo/o jasi gwon ṯal ’de/ mo be.
45Dhali yan’ko’d a’di p̱u’dki’d mo e imanciḵ a’di gwo mo dhali o uni gwo mo ki: A/um ’kon mmo/ish e kan mo? dhali bu’th mosi/is bum mo? Hili mo mo ma, mo p̱u’dki’d mo hila/ mo dhali Ya/ gi ’Kwani ’ciṯẖkunu is ki gwo mo e me’d gi ’kwani kun ta imanmii miinthus mo be.
46Cuyi mis mo ma. Dhalki ana iina mo. Hili, a’di jin ’ciṯẖki aha/ is ki gwo mo tani a’di p̱u’dki’d mo be.
47Ki a’di di’d mo mmo/o gwo naskina/ mo tani Yahuusa p̱u’dki’d mo, a’di jin ’dap̱ tiya ’twa/ ka ’kume’d i’ce’dka su/ mo, dhali nyaḵki a’di mo tani dhana waambuhany ’kwani p̱u’dkin ki gandala turga/ mme’d mo dhali cwa mo, ’peni igasiis kun can mo dhali ’kwaniŋ gwanyjaḵa/ gi ’kwani mo be.
48Dhali a’di jin ’ciṯẖki a’di is ki gwo mo c̱iki uni jamas mii mo mmo/o gwo mo ki: A’din ’de/ jin miga/ p̱i ’twa/ mo tani ta wathi/ mo. Buthi a’di mo ma.
49Dhali a’di p̱u’dki’da Yesus ki jahanne/ mo dhali o gwo mo ki: Hayy, Tap̱a. Dhali a’di ki p̱i a’di ’twa/ mo be.
50Yesus ki o a’di gwo mo ki: Akam pem, /e miina ta mmahan mo? Dhali yan’ko’d uni ki p̱u’du/ i a’di mo dhali dhu me’d buni ap̱owa Yesus mo dhali bu’th a’di mo be.
51Dhali hili jan ’de/ ’peni uni gwansan jin nyaḵ di ka Yesus mo tani a’di he’thki me’d piti mo dhali buḵ gandala turgam piti mo dhali ruṯẖun c̱iŋkina/ ma gasiis jin ca’d mo dhali ’ciṯẖ ’cem piti mo be.
52Dhali yan’ko’d Yesus ki o a’di gwo mo ki: Dwari gandala turgam pini ka nyaŋ’ko’d e mom piti mo ma, haali/ aris uni gwansani ’baar mo kun ḵalki gandala turga/ mo tani minu ’ce’d sho’k ki gandala turga/ mo be.
53A/ṯosha /e ki aha/ mina mol Ababam pem ’tho mo dhali a’di ki c̱i aha/ ki jahanne/ awaambuhany iman’doyu gwom piti ka ris mo mmo’koki ’ko jasi ’kume’d i’ce’dka su/ mo?
54Hili bakataye ki Gwo ma Arumgimis minu ’taki thim mo ki a’di minu mii mii wakan mo be.
55Dhali ki mo yan mo tani aYesus ki owa waambuhany ’kwani gwo mo ki: Um iiyin ka pije/ ki gandala turga/ mme’d mo dhali ki cwa mo mmobu’th aha/ mmohabus mo me’d wathin ’di/ mo. Ka tee kun baṯẖani ’ko’d mo tani aha/ dikina mo e gu’b gi mondheleladhelel mo mmoṯor gwo mo dhali um ’koki bu’th aha/ mo be.
56Hili aris to gwansani ’baar mo tani uni bu’thki embul mo mo, ki Gwo ma Arumgimis kun ’kwarkina imanc̱i gwo ma Arumgimis kadhamo/ mo minu mii thim mo be. Dhali yan’ko’d aris imanciḵ a’di gwo uni dhalki a’di ’pen mo dhali so mo be.
57Dhali yan’ko’d uni gwansan kun bu’thkina Yesus mo tani uni ki sus a’di eya Ḵayaap̱a jin ta’da gasiis jin ca’d mo e mo jin tulkina iman’kwar to is mo dhali ’kwani gwanyjaḵa/ si’da/ mo be.
58Hila Buṯerus baṯẖki a’di nsho’k isa dhana/ mo ntagi mo gi bwaagoŋ ma gasiis jin ca’d mo. Dhali a’di ki seyu bwaman mo. Dhali a’di ki nyaḵ c̱a’b ki uni kun hili mo mo mmop̱ar ’pemen gwo e mo be.
59Dhali igasiis kun can dhali aris uni ’baar mo gi montul is yan mo tani uni ŋap̱ki gwonthus mo mmo’ce’da Yesusa p̱o/ mo, ki uni mini ’taki kar a’di mmowu mo be.
60Hili uni ’koki gam tonthusa ’de/ mo, bahili aris iman/o gwonthus ap̱o/ a’di mo tani uni p̱u’dkin kadhoŋ mo. Ŋ’ko’d uni su/ p̱u’dkin kadhoŋ mo
61dhali o gwo mo ki: Agarr yansan o gwo mo ki: Aha/ misha mmo’ce’d gu’b gi mondheleladhelel ma Arumgimis sho’k mo dhali nyaŋ a’di ka cim kwara mo be.
62Dhala gasiis jin ca’d a’di doshki’d ki mis mo dhali o gwo mo ki: Ayy, /e moli ’twaŋ kamu/ ’de’k mo? Gwo wakata ona ’kwani gwansan ap̱o/ /e mo?
63Hila Yesus c̱a’bki’d ki shwam mo. Dhala gasiis jin ca’d ki o a’di gwo mo ki: Aha/ ḵana /e gwo ka Arumgimis jin di ki e mo. Ba ṯor am gwo mo ma, waḵki/ /e tana Ḵrisṯẖos mo, a’di jin ta Ya/ ma Arumgimis mo.
64AYesus ki o a’di gwo mo ki: A’di ta gwo jin ona /e si’da/ mo be. Hili aha/ mina ṯor /e a’di ’peni shwane/ mo, /e mini p̱ar Ya/ gi ’Kwani e mo mmoc̱a’b ki me’da bim poros ki mom’bi’th mo dhali mmoyayu/ e bwaaraḵ ’peni momis mo be.
65Dhali yan’ko’d agasiis jin ca’d dherki burrinyem piti bwa mo dhali o gwo mo ki: A’di walki gwo sor jin shi/ashi/ mo. Atinta ’kokina ana mmoŋap̱ gwo mo mmo/o ap̱o/ a’di mo? Um ciḵki gwo sor ’peni ’twam piti shwane/ mo be.
66Gwom bum jin ṯosha um wakata mo? Uni thoḵ gwo mo ki: A’di ha me’d mo mmowu mo be.
67Dhali yan’ko’d uni ki ’taḵ a’di manya/ e bwam/em piti mo dhali dor a’di mo dhali kun tiya ki dor a’di ki cwa mo
68mmo/o gwo mo ki: Oyi am gwo is mo ma, /e jin tana Ḵrisṯẖos mo. Kaja ’dunn idorki /e kan mo?
69Dhala Buṯerus a’di c̱a’bki’da pije/ e bwaman ma goŋ mo. Dhali ari nyarany c̱iŋkina/ p̱u’dki’di a’di mo dhali o a’di gwo mo ki: /E si’da/, /e nyaḵki di ka Yesus gi Pany Jaliil mo be.
70Hili a’di waṯki gwo mo mbwambori uni ’baar mo mmo/o gwo mo ki: Aha/ dinaki mish ’pemen gwom pini yan jin ona /e mo be.
71Dhali ki a’di yaki’d mo ka pije/ eya lambalany gu’b mo tani ari c̱iŋkina/ nyaraŋ kamu/ p̱arki a’di e mo dhala yim ki o uni gwansan gwo kun doshkina pije/ ki: Wathi/ yansan nyaḵ di ka Yesus gi Pa Naasira mo be.
72Dhali yan’ko’d doḵ/e a’di waṯki gwo mo ki gwo mmoṯe gwo mo ki: Aha/ dinaki mish wathi/ yan mo be.
73Yan’ko’d ari’ceenne/ uni kun doshkina pije/ mo tani p̱u’dkin mo dhali owa Buṯerus gwo mo ki: Ka jiŋ gana/ /e ta jan ṯal ’de/ si’da/ ’peni uni mo haali/ ’twam pini ṯor /e eya tente/ mo be.
74Yan’ko’d a’di ṯelki mii ’pen mo mmojee is piti jwa ki is piti mo dhali mmothul gwo me’da p̱o/ mo mmo/o gwo mo ki: Aha/ dinaki mish wathi/ yan mo be. Dhali ki jahanne/ adhoŋgola ŋwa gwoki’d mo.
75Dhala Buṯerus ka gwo ma Yesus e mo jin ona a’di a’di nṯwa/a/: Ka dhoŋgola ŋwa diki ko e mo naskina/ tani /e mini waṯ aha/ gway me’di kwara mo. Dhali a’di yaki’d ka pije/ mo dhali ko ki jabu’th ki ḵu’bu/ ḵu’bu/ mo be.
