1Dhalku/ ki c̱iŋitha c̱iŋi’th mo ki um minu ’koki c̱iŋi’th mo.
2Haali/ ki gwo jin c̱iŋitha um ki c̱iŋi’th mo mmopi mo tani um minu c̱iŋi’th mo dhali ki mii jin bara um mii mo tani um minu bar ka nyaŋ’ko’d mo be.
3Atinta mishkina /e businyan to i e ma kam pini mo hili diki mish adhana ḵa’dum jin di’d /e e em piniŋ gana/ mo?
4Walla atinta mina /e i/owa kam pini gwo mo ki: Dhalki aha/ guna /e businyan to ’peni em pini mo ma dhali /e ki dhal adhana ḵa’dum /e i em piniŋ gana/ mo.
5/E jin tana he’k e ka he’k e kan mo, buḵi aḵa’dum jin di’di em pini nṯwa/a/ mo ma dhali yan’ko’d /e mini mish mohil ki ’bore/ mo mmobuḵ businyan to jin di’da kam pini i e mo be.
6Dhalku/ ki c̱iya ’ka to jin ḵogu mo dhali dhalku/ ki biṯ dhemam bum mbwambori ḵuthar mo, hili isi ciki/ ki uni mini sa uni ki sho’k mo dhali ṯu’k mo mmo’kosh um mo be.
7Doṯi to mo ma dhali a’di minu c̱iki um mo be. Simmi mii e mo ma dhali um mini gam a’di mo be. Nagkani anagkan ki me’d mo ma dhali a’di minu ḵa’d ki um mo be.
8Haali/ aris uni ’baar mo ka ’deṯe/ ’deṯe/ kun doṯki to mo tani bu’thki uni mo dhali uni gun simmki mii e mo tani gamki to mo dhali a’di jin nagkanki a’di mo tani a’di ḵa’dkunu a’di mo be.
9Walla wathi/ jana di’di bwam um mo waḵki/ ya/m piti doṯ a’di gwo gom maaŋḵuthu’d mo tani mina a’di c̱i a’di wosh mo ’taa?
10Walla waḵki/ a’di ki doṯ a’di gwo gom wa’c mo tani mina a’di c̱i a’di tasha/ mo ’taa?
11Waḵki/ um si’da/ kun ta ’kwani kun ta thus ki thus kan mo mishi tom ’boron c̱i ki uc̱im bum mo tani bakata bese/ mmin ma Babam bum jin di’di momis mo diki c̱i aris to gwansan kun ’boron ki uni gwansan kun doṯki a’di mo si’da/?
12Wakan ma to yin jin ona um ki ’kwani mini mii mii gom um mo tani miiyi wakan si’da/ gom uni mo ma haali/ gwo yansan ta gwoŋḵan jin c̱inu mo dhali gwo gi imanc̱i gwo ma Arumgimis kadhamo/ mo be.
13Cic̱i um mo ma e bway jin nyutha ’twaman ki nyu’th mo haali/ acampur a’di waŋgala waŋgal mo dhali bway a’di ’disha mii mo e mo jin shunu mo e mo jin ’ce’du sho’k mo dhali uni gwansan kun cic̱kin e a’di mo tani tana ris ka ris mo be.
14Haali/ acampura nyu’thga/ mo tani dhali bway mo tani a’di diṯa mii mo jin shunu mo e mondiki/e mo dhali uni gwansan kun gamki a’di mo tani ’koni daḵa/ mo be.
15Jiyi imanc̱i gwonthus ki e ki ’bore/ mo ma uni gun p̱u’dkin mo e um mo mmohitha mur ḵa’bali is mo, hili e bwaman ma du mo tani uni tana wu gun pitili to ki she/ mo be.
16Um mini mish uni ki maman buni mo. Amura’th minu ho mo ’pena ’de/ mo ’taa? walla p̱u/ ’pena liṯ mo ’taa?
17Wakan aris cwa kun ’boron mo tani dho’th maman kun ’boron mo hili cwa kun shi/ashi/ mo tani dho’th maman kun ta thus ki thus si’da/ mo be.
18Cwam ’borga/ mol dho’th maman kun shiyin mo walla cwa shigga/ si’da/ mol dho’th maman kun ’boron mo be.
19Aris cwa ’baar mo ka ’deṯe/ ’deṯe/ kun ’koki dho’th maman kun ’boron mo tani uni jep̱u ka ’cesh mo dhali ṯaki o’d mo be.
20Wakan si’da/ um mini mish uni ki maman buni mo be.
21Aris ’kwani ’baar mo ka ’deṯe/ ’deṯe/ kun o aha/ gwo mo ki: Tap̱a, Tap̱a mo tani mini ’koki cic̱ mo e Bampa/ gi Momis mo hili jasi a’di jin mii bwa ma Ababam pem jin di’d e momis mo be.
22Dhali ka cim c̱aan mo tani ’kwani mini ta aris ka ris mo kun mini o aha/ gwo mo ki: Tap̱a, Tap̱a, ’kona aman ki o gwo is ki gway pini mo ’taa? dhali ura rum thus ka pije/ ki gway pini mo? dhali miiya ris dhan mii kun ’bitha’bi’th ki gway pini mo ’taa?
23Dhali yan’ko’d aha/ mina ṯor uni gwo eya tente/ mo ki: Aha/ dinaki mish um ki sule/ mo be. Iiku/ mo ’peni aha/ mo ma, um gun ta imanmii tonthus mo.
24Aris ’kwani ’baar mo ka ’deṯe/ ’deṯe/ kun ciḵki gwom pem gwansan mo dhali mii uni mo tani uni wana e ki wathi/ jin yuḵayuḵ mo mmonyaŋ gu’b piti eya p̱o/ wosh mo be.
25Dhali ka sho’k wolki yi’de/ mo dhali dhana gannu/ yi’de/ p̱u’dki’d mo dhali ’tham poshki’d mo dhali dor ap̱o/ gu’b mo tani hili a’di diki ’tuḵ mo be haali/ a’di ŋḵa’bkunu ap̱o/ wosh mo be.
26Dhali aris ’kwani ’baar mo ka ’deṯe/ ’deṯe/ kun ciḵki gwom pem mo dhali ’koki mii uni mo tani uni wana e ki wathim p̱us jin nyaŋki gu’b piti ap̱owa si’b mo be.
27Dhali ka sho’k wolki yi’de/ mo dhali agannu/ yi’de/ p̱u’dki’d mo dhali ’tham poshki’d mo dhali dor ap̱o/ gu’b c̱aan mo tani dhali a’di kumki’da ’cesh mo be dhali adhana bar jin caaca shinu is e a’di mo be.
28Dhali ka Yesus ’baarki gwo gwansan mmo/o mo tani awaambuhany ’kwani merkin mo gom gwonṯor piti mo be
29haali/ a’di ṯorki uni gwo mo me’d wathi/ jin ta gi moshirr mo dhali yisa me’d iman’kwar tom buni mo be.
