1Dhali ki mon’thamo/ p̱u’dki’d mo tani aris igasiis kun can dhali ’kwaniŋ gwanyjaḵa/ gi ’kwani mo uni gamki ’twa/ ’kup̱ ap̱owa Yesus mo mmokar a’di mmowu mo be.
2Dhali uni ki deḵ a’di mo dhali sus a’di mo dhali mmoc̱i a’di ka Bilaaṯus jin ta’da mudhiir mo be.
3Ka Yahuusa jin ta’da man’ciṯẖ a’di is ki gwo p̱arki a’di e mo ki a’di waḵkunu mo tani a’di rici’da du is mo dhali a’di ki ’doyu ’dolkon kush jin ta’da iss ’de/ i’ce’dka ’kume’d ka nyaŋ’ko’d mo e igasiis kun can mo dhali ’kwaniŋ gwanyjaḵa/ mo
4mmo/o gwo mo ki: Aha/ miikina miinthus mo mmo’ciṯẖ a’di is ki gwo mo, a’di jin din ma bas ka p̱o/ mo. Dhali uni ki thoḵ a’di gwo mo ki: A’di yan ta’da ta gom am mo? Hili is pini ’teyi e ma.
5Dhali a’di ki ṯa’k ’dolkon kush e gu’b gi mondheleladhelel mo dhali a’di ki pi ka pije/ mo dhali ya mo dhali shir is piti ka nyoḵ mo be.
6Hili igasiis kun can uni bu’thki ’dolkon kush mo mmo/o gwo mo ki: A’di diki ta mii jin dhala gwoŋḵan bway mo mmodhu uni mo e mo jin dhunuwa guurush mo haali/ uni tana guurush ma bas mo be.
7Wakan uni gamki ’twa/ ’kup̱ mo mmobu’th uni mo dhali yol mo gi iman/uḵa nos mo mmokan ’kwani kun ta yilkina/ nycine/ mo be.
8Wakan mombunto yan yuḵkunu gway ki Mombunto ma Bas mo ntaga tee yansan mo be.
9Wakan gwo thimkunu mo, a’di jin okin ma manc̱i gwo ma Arumgimis kadhamo/ mo jin ta’da Irmiya mo mmo/o gwo mo ki: Dhali uni bu’thki ’dolkon kush kun ’koni iss ’de/ i’ce’dka ’kume’d mo jin ta she/ yol piti mo, a’di jin ta she/ yol jin karkina unin tiya kun ta iya/ gi uc̱i ma Israyiil mo be.
10Dhali uni ki c̱i uni gom uni kun cila mombunto ma iman/uḵa nos mo be me’d gwo jin shukina tap̱a aha/ bway mo be.
11Dhala Yesus doshki’d mbwambora mudhiir mo dhala mudhiir ki doṯ a’di gwo mo ki: Ki /e de /e tana Maliḵ gi ’Kwani Yahuuda/ mo? Dhala Yesus ki thoḵ a’di gwo mo ki: A’di ta gwo jin ona /e si’da/ mo be.
12Hili ki a’di yerkunu is ki gway mo ki igasiis kun can mo dhali ’kwaniŋ gwanyjaḵa/ mo tani a’di diki thoḵ ’twaŋ kamu/ mo be.
13Dhali yan’ko’da Bilaaṯus ki o a’di gwo mo ki: Dina /e ki ciḵ gwo mo ’taa? ama’diny gwo kun ona uni ap̱o/ /e mo?
14Hili a’di diki c̱i a’di ’twan thoḵa ’de/ mo walla ari gwoŋ kamu/ jin yerkunu a’di is ki gway mo. Wakan ntaga mudhiir a’di merki’d kagahara mo be.
15Dhali ka yuḵ jin yuḵu mo tani mii ma mudhiir isa yempa/ mo mmo’cuḵka waambuhany jan ṯal ’de/ ’peni uni habuus mo a’di jin doṯkina uni mo be.
16Dhali uni tan gi wathi/ eya sijin jin mishu ’baar mo eya tente/, a’di jin yuḵkunu gway ka Baraabas mo be.
17Wakan uni tulki is mo mmonṯal ’de/ mo dhala Bilaaṯus ki o uni gwo mo ki: Kaja i/o um bwa jin miga/ ’cuḵki um mo, a/Baraabas ’taa? walla Yesus a’di jin yuḵu ka Ḵrisṯẖos mo?
18Haali/ a’di mishki dhap̱an buni jin takina uni mo mmoc̱i a’di mo be.
19Isa dhamo/ ’teya ki a’di diki’d mmoc̱a’ba kursi jin dwallu gwo jin ta jim piti mo tani ashim piti hashki a’di gwo mo mmodhalku/ toŋ kamu/ ki mii ap̱o/ wathiŋ ḵar/e yan mo haali/ aha/ ṯo’ckunu bwa kagahara shwane/ gom a’di mo ki gwony jan mo be.
20Dhali igasiis kun can dhali ’kwaniŋ gwanyjaḵa/ uni lalki ’kwani sho’k ki gwo mo mmodoṯ gwo mo goma Baraabas mo dhali mmo’ce’da Yesus sho’k mo be.
21Dhala mudhiir ki o uni gwo mo doḵ/e ki: Jana ’peni bwam uni su/ jin o um bwa mo jin miga/ ’cuḵki um mo? Dhali uni ki thoḵ gwo mo ki: aBaraabas be.
22Dhala Bilaaṯus ki o uni gwo mo ki: Dhali aha/ mina miiya tinta ka Yesus mo a’di jin yuḵu gway ka Ḵrisṯẖos mo? Uni ’baar mo thoḵ gwo mo ki: Dhalki a’di ’koshu ki cwany’ciṯẖan dhul mo.
23Dhali a’di ki thoḵ uni gwo mo ki: Gomata sa/? Tonthus gi wakatinta imiikina a’di mo? Hili uni cuukin kagahara mo mmonṯal ’de/ mo mmo/o gwo mo ki: Dhalki a’di ’koshu ki cwany’ciṯẖan dhul mo.
24Wakan ka Bilaaṯus p̱arki a’di e mo ki a’di mol gwo p̱i jip̱i/ mo tani hili a’di ki dhal mii e i is mo goma dulaṯṯ jin ṯelkunu ’pen mo tani a’di ki bu’th yi’de/ mo dhali ’thur me’d piti mo mbwambor ma waambuhany ’kwani mo mmo/o gwo mo ki: Aha/ dina ka p̱o/ ’pena bas gi wathi/ yan mo. Hili a’di ’te/ ki is bumi niin ma.
25Dhali aris ’kwani ’baar mo thoḵ a’di gwo mo ki: Abas piti midi di ap̱o/ aman mo dhali ap̱o/ uc̱im bam mo be.
26Dhali yan’ko’d a’di ki ’cuḵki uni aBaraabas mo dhali ki a’di dorki’da Yesus ki yis bip̱ mo tani a’di ki c̱i a’di mmo’kosh ki cwany’ciṯẖan dhul mo be.
27Dhali yan’ko’d i/askar ma mudhiir uni ki susa Yesus mo e bwaagoŋ gi gu’b ma mudhiir mo dhali uni ki tula askar isi ’baar mo mmonṯal ’de/ mo ibwambori a’di mo be.
28Dhali uni ki ’cuḵ a’di burrinye/ mo dhali hi’th a’di is ki burrinye/ jin ta’da duḵ is mo be.
29Dhali uni ki thoson toŋ’kup̱ ’pena ’de/ mo dhali uni ki hi’th a’di i’kup̱ piti mo dhali uni ki kar a’di guluca cwahan e me’da bim poros piti mo dhali luŋ ki jiŋ ’kup̱a’dup̱uni bwambori a’di ka maḵ mo mmo/o gwo mo ki: Hayy, Maliḵ gi ’Kwani Yahuuda/ mo.
30Dhali uni ki ’taḵ a’di manya/ i is mo dhali uni ki bu’th gulu’c mo dhali dor a’di e ’kup̱ piti mo be.
31Dhali ki uni miiki a’di ka maḵ mo tani uni ki ’cuḵ a’di burrinyen duḵ is mo dhali uni ki hi’th a’di burrinyem piti i is mo dhali uni ki sus a’di ka pije/ mo mmo’kosh ki cwany’ciṯẖan dhul mo be.
32Me’d jin ’kokina uni mmoya ka pije/ mo tani uni p̱u’dkin mo e wathi/ gi Paŋ Kerawaan jin yuḵu gway ka Simaan mo. Wathi/ yansan a’di ṯu’ckina uni mo mmoḵal cwany’ciṯẖan dhul piti mo be.
33Dhali ki uni p̱u’dkin mo e mo jin yuḵu ka Gulguṯẖa mo tani (a’di jin ta ’pemen gwo jin onu ki: Mo ma Simaŋ ’Kup̱ mo)
34uni ki c̱i a’di yimana mura’th jin ’koshu e ki toŋ ḵa/ga/ mo. Hili ki a’di nyoḵki a’di mo tani a’di ushki a’di p̱i mo be.
35Dhali ki uni ’koshki a’di ki cwany’ciṯẖan dhul mo tani uni ki ḵwa/ burrinyem piti bwa mo e bwam uni ’cena mo mmoṯa’k to mo.
36Yan’ko’d uni ki ’ko a’cesh mo dhali rash ’ko mo mmotim a’di ap̱o/ mo be.
37Dhali ap̱o/ ’kup̱ piti mo tani uni ki ’kwar gwo ap̱o/ a’di mo jin deŋu e mo ki: Yansan ta’da Yesus jin ta’da Maliḵ gi ’Kwani Yahuuda/ mo be.
38Dhali ’kwani su/ kun tana ’di/ nyaḵkunu ’kosh ki a’di mo ki cwany’ciṯẖan dhul mo, jan ’de/ ki me’da bim poros piti mo, dhali jaŋ kamu/ ki me’da biny cam piti mo be.
39Dhali uni gwansan kun iikin ki iimpe e bway mo tani uni sorki a’di mo mmopir ’kup̱ buni mo be,
40dhali mmo/o gwo mo ki: /E jin mini ’taki ’kosh gu’b gi mondheleladhelel mo dhali nyaŋ a’di ka cim kwara mo tani woṯẖi is pini mo. Waḵki/ /e ta Ya/ ma Arumgimis mo, ba thulu ka ’cesh ’peni ap̱o/ cwany’ciṯẖan dhul mo.
41Wakan si’da/ igasiis kun can dhali iman’kwar to mo dhali ’kwaniŋ gwanyjaḵa/ mo tani uni miiki a’di ka maḵ mo mmo/o gwo mo ki:
42A’di woṯẖki tiya mo tani is piti mola a’di woṯẖ moyi. Dhalki a’di thulu’d ka ’cesh shwane/ ’peni ap̱o/ cwany’ciṯẖan dhul mo, dhali ana mina gam a’di gwo is mo be.
43A’di gamki’da Arumgimis gwo is mo. Dhalka Arumgimis ’cuḵ a’di mo shwane/ waḵki/ a’di ona bwa ki a’di mo, haali/ a’di o gwo mo ki a’di ta Ya/ ma Arumgimis mo be.
44Dhali unin ’di/ kun nyaḵkunu ’kosh ki cwany’ciṯẖan dhul nyaḵki a’di mo tani uni si’da/ waḵki a’di ki gwon ’de/ yan mo be.
45Dhali shwane/ ka tente/ ta’da tente/ mbwaŋ ’kup̱ mo tani adhan mondhurumi’d p̱u’dki’da p̱o/ mony’ceshi ’baar mo ntaga tente/ mbum ’ban mo be.
46Dhali ka tente/ ta’da tente/ kwara mo tani Yesus gwoki’d ki ’twa/ jin caaca mo ki: Ili, Ili, lama sabaktani, a’di jin ta ’pemen gwo jin onu ki: Arumgimis pem, Arumgimis pem, atinta dhalkina /e aha/ ’pen kan mo?
47Dhali unin tiya kun doshkin ki ’dishe/ ciḵki a’di mo dhali o gwo mo ki: Wathi/ yuḵki’d Iliyya mo be.
48Dhali jan ṯal ’de/ ’peni uni a’di guski’d ki jahanne/ mo dhali a’di ki ḵala lip̱a/ mo dhali ’tu’d a’di ki yiman tom ’pac̱a’d mo dhali kar a’di eya cwahan mo dhali a’di ki c̱iki a’di mo mmop̱i mo be.
49Hili kun tiya o gwo mo ki: C̱ori naskina/ bala/. Dhalki ana p̱ara mo e mo waḵki/ Iliyya midi thulu/ mo mmowoṯẖ a’di mo.
50Dhala Yesus cuu’d ki dhan ’twa/ jin caaca doḵ/e mo dhali a’di ki c̱i shi/in piti mo be.
51Dhali hili mo mo ma, burrinye/ gi gu’b gi mondheleladhelel mo a’di dherkunu bwa mo ka ’ban su/ mo ’peni buŋ’kup̱ mo ntagi bum’pen mo, dhali mony’cesh yiḵinki is mo, dhali aris woshi ’baar mo pwaṯẖkunu bwa mo be.
52Dhali moŋ’kup̱aje si’da/ uni ḵa’dkunu ’twa/ mo, dhali aris buŋgwar is gi uni kun dhunu ki she/ ki dhelel dhelel mo uni gun ishki e mo e mowu mo tani uni cukunu mis mo be.
53Dhali mmopikina uni ka pije/ ’peni jis jwa mo tani ’ko’di mompim piti mo tani uni iikin e ’peŋkuman bampa/ jin ḵogu mo dhali piki ’kwani i is ka ris mo be.
54Dhali ka mancil ma askar iss ’kwanim pa mmudhe’d dhali uni gwansan kun nyaḵ ’ko ki a’di mo tani uni rashkina Yesus tim mo mmop̱ar mony’cesh e mo mmoyiḵin is mo dhali to gwansan kun bu’thki embul mo mo tani uni ’tu’dkunu mo ki moŋḵo/ is mo dhali o gwo mo ki: Ka jiŋ gana/ yansan ta Ya/ ma Arumgimis mo be.
55Wakan si’da/ up̱ ’kokin ka ris mo mmun mmohil mo ’pena dhana/ mo, uni gun baṯẖkina Yesus nsho’k mo ’peni Pany Jaliil mo mmota imanmii a’di to mo be.
56Dhali e bwaman uni mo tani aMariyam Magdaliyya diki’d mo dhala Mariyam jin to Ko Yakuub mo dhala Yuusup̱ mo dhali ko iya/ ma Sabadi mo be.
57Dhali ki mo ta mom’pimpili/ mo tani wathi/ jin ta pa ki pa p̱u’dki’d mo ’peni Pa Arraama jin yuḵkunu gway ka Yuusup̱ mo, a’di si’da/ jin ta’da manciḵa Yesus gwo mo be.
58A’di yaki’d mo eya Bilaaṯus mo dhali doṯ a’di gwo mo gom buŋgwar is ma Yesus mo. Dhali yan’ko’d Bilaaṯus ki ḵan gwo mo ki a’di minu c̱i ki a’di mo be.
59Dhala Yuusup̱ ki bu’th buŋgwar is mo dhali ’tam a’di is ki burrinyen dhelelga/ jin ta’da dhiny e mo be.
60Dhali ’thi a’di e jis pitiŋ gana/ jin ta jis jwan this mo, a’di jin ’kolkina a’di wosh mo. Dhali a’di ki ’daŋkal wosha caaga/ mo mmo’dap̱ ’twaŋkal jis jwa ’twa/ mo, dhali a’di ki ya mo be.
61Mariyam Magdaliyya dhali Mariyama kamu/ nyaḵki ’ko mmun mo mmo’ko ka p̱ar ’twa/ gi moŋ’kup̱aje mo be.
62Dhali ka cim jiŋ ’ko’d mo, a’di jin ta’da cim jiŋ ’ko’d jin Thosonkunu to mo tani igasiis kun can dhali ’Kwani P̱arisiyiin tulki isi bwambor ma Bilaaṯus mo be,
63dhali o gwo mo ki: Tap̱a, am kakina gwo e jin okin ma manhe’k ’kwani e mo ki a’di di’d ki e mo naskina/ mmo/o gwo mo ki: ’Ko’da cim kwara mo tani aha/ mina cuyu mis doḵ/e mo be.
64Wakan ki /e mini ḵan gwo mo ki moŋ’kup̱aje minu mii ji mo ki ’dantar mo ntaga cim kwara mo, isi ciki/ ki imanciḵ a’di gwo mini ’koki ii mo dhali ḵwal is piti mo dhali ṯor ’kwani gwo mo ki: A’di piki’d ’peni mowu mo, dhali gwonthus jin ta jiŋ ’ko’d jin minu o mo tani a’di midi war ki shi/ kagahara mo mmobol jin ṯwa/a/ e mo be.
65Bilaaṯus ki o uni gwo mo ki: Um tan ga askar kun ji mo mo. Iiku/ mo ma, mmoji a’di ki ’dantar mo me’d jin misha um a’di mii mo be.
66Wakan uni iikin mo dhali ji moŋ’kup̱aje mo, dhali uni ki ’dap̱ wosh ’twa/ ka ’diŋkila/ mo dhali dhu imanji mo mo be.
