1Dhali a’di cic̱ki bwam ma ḵur mo mmo’ciṯẖa/ gap̱ mo dhali a’di p̱u’dki’d mo e ’peŋkuman bampam piti mo be.
2Dhali hili uni ḵalki a’di wathi/ jin muṯṯa/ is mo mmo/isha a’di eya cim piti mo. Dhali ka Yesus p̱arki moŋgam gwo is buni e mo tani a’di ki o a’di jin muṯṯa/ is gwo mo ki: Buthi adu mo ma, ya/m pem. Miinthus pini dhalkunu /e ’pen mo be.
3Dhali hili iman’kwar ton tiya o gwo mo e is buni ki: Wathi/ yansan walki gwo sor mo be.
4Hila Yesus mishki gwom buni jin kulumkina uni ibwa mo be mmo/o gwo mo ki: Atinta kuluma um gwon thus eya dum bum kan mo?
5Haali/ mii jana sa/? ŋ’ka’da’d mo? Mmo/o wathimpa gwo mo ki: Miinthus pini dhalkunu /e ’pen mo? walla mmo/o gwo mo ki: Cuyi mis mo dhali ’deki acim pini dhali ya mo?
6Hili ki um mini mish ki Ya/ gi ’Kwani ta gi moshirr mo e mony’cesh yan mo mmodhal miinthus gi ’kwaniny’cesh ’pen mo – yan’ko’d a’di ki o wathi/ jin muṯṯa/ is gwo mo ki: Cuyi mis mo, dhali ’deki acim pini mo dhali yayi bway pa mo ma.
7Dhali yan’ko’d a’di cuki mis mo dhali ya bway pa mo be.
8Ka waambuhany ’kwani p̱arki a’di e mo tani uni ’kokin mo mmoḵo/ is mo dhali uni karkina Arumgimis ki ca mo gom a’di jin c̱iki moshirr e ’kwani kan mo be.
9Ka Yesus yaki’d ki yampe ’peni maṯṯan mo tani a’di p̱arki wathiŋ kamu/ e mo jin yuḵu gway ka Maṯṯa mo mmoc̱a’ba a’di mo e mo jin teruwa thulp̱a/ mo. Dhali a’di ki o a’di gwo mo ki: Baṯẖi aha/ nsho’k mo ma. Dhali a’di cuki mis mo dhali baṯẖ a’di nsho’k mo be.
10Dhali ki a’di c̱a’bki’d mo eya tharabeesa e gu’b mo tani hili imantera thulp̱a/ ka ris dhali imanmii miinthus mo p̱u’dkin mo dhali ’kowa ’cesh nyaḵka Yesus mo dhali imanciḵ a’di gwo mo be.
11Dhali ki ’Kwani P̱arisiyiin mishki mii yan mo tani uni ki o imanciḵ a’di gwo gwo mo ki: Atinta shwan ma manṯor gwom bum to mo nyaḵki imantera thulp̱a/ mo dhali ’kwani kun mii miinthus kan mo?
12Hili ki a’di ciḵki gwo yan mo tani a’di ki o gwo mo gom uni gwansan kun ’kon ki ’bore/ mo kun mini mii ’koki mii ta ga hakiim mo, hili jasi gom uni gwansan kun ’ba’thkin mo be.
13Iiku/ mo ma dhali da/ari a’di yan jin ta ’pemen gwo mo ki: Aha/ ŋap̱a momiimii moyi dhali yisa gom to jin minu ’ciṯẖ ’kus mo. Haali/ aha/ p̱u’dkina mo yisa mmoyuḵ uni gun mii miiŋḵar/e mo yisa hili gom uni gun ta imanmii miinthus mo be.
14Dhali yan’ko’d imanciḵa Yohaan gwo uni p̱u’dkini a’di mo mmo/o gwo mo ki: Atinta ga/a aman to mo dhali ’Kwani P̱arisiyiin si’da/? hili imanciḵ /e gwo ’koki ga/ to mo?
15Dhala Yesus ki o uni gwo mo ki: Mina ’kwani kun yuḵu mo e momiimash mo mmota yilkina/ mmoko mo e mo c̱aan jin dina wathinyaŋa’b nyaḵki uni mo ’taa? Atee mini p̱u’du/ mo ki wathinyaŋa’b minu gu mo ’peni uni mo tani dhali yan’ko’d uni ki ga/ to mo be.
16Wathin ’deŋ kamu/ yisa di’da jin kar sharkin burrinye/ jin diki shum is ap̱o/ burrinyen dhamo/ mo haali/ mo jin ’dap̱u mo tani midi dher bwa mo ’peni burrinye/ mo, dhali mondher piti midi shi/ mo kagahara.
17Wakan si’da/ wathiŋ kamu/ diki kar yimana mura’th jin this e bwaŋ ḵucaŋ yimana muratha dhamo/ mo. Waḵki/ a’di midi mii kan mo tani ḵucaŋ midi ’twaḵ mo dhali yimana mura’th midi gac̱a sho mo, dhali ḵucaŋ minu ’ce’d sho’k mo. Hili yimana mura’th minu kar e ḵucaŋ kun daḵa ḵucuru mo dhali wakan uni su/ mini ’ko ka ’dan’dap̱ mo be.
18Ki a’di di’d mmo/o gwo mo wakan i uni mo tani hili tap̱aŋ kamu/ p̱u’dki’d mo dhali c̱a’b ki jiŋ ’kup̱a’dup̱uni bwambori a’di mo mmo/o gwo mo ki: ’Bwa/um pem daḵa wu’d mo be. Hili yayu/ mo ma dhali kar me’d pini ap̱owa yim mo ka yim midi di ki e mo.
19Dhala Yesus cuki mis mo dhali baṯẖ a’di nsho’k mo nyaḵki imanciḵ a’di gwo mo be.
20Dhali hili a’boma kamu/ diki’di mun jin ’kosha is ka nyor mo ’pena bas jin gus a’di ki yili ’kume’d i’ce’dka su/ mo. Dhali a’di p̱u’dki’d mo ŋ’ko’di a’di mo dhali ta ’twaman burrinyem piti is ki me’d mo,
21haala yim o gwo mo ki is piti mo ki: Waḵki/ aha/ mina ta a’di jasi ’twaman burrinyem piti is ki me’d mo tani aha/ mina isi ’bor mo be.
22Yesus ṯu’kki’d mo dhali p̱ara yim e mo dhali o a’di gwo mo ki: Buthi adu mo ma, ’bwa/um, moŋgam gwo is pini wac̱ki /e mo be. Dhali ki jahanne/ mo tani a’bom wac̱ki’d mo be.
23Dhali ka Yesus p̱u’dki’d mo e gu’b gi tap̱a mo tani a’di p̱arki imanp̱iya ṯẖaṯẖar e mo dhala waambuhany ’kwani mo mmomiiya dulaṯṯ mo
24dhali a’di ki o gwo mo ki: Iiku/ mo ma haali/ ari nyara/ diki wu mo, hili a’di ishi e mo be. Dhali uni p̱e’th a’di mo be.
25Hili ka waambuhany ’kwani urkunu ka pije/ ’baar mo tani a’di seki bway bwaŋ gu’b mo dhali butha yim mme’d mo be dhali ari nyara/ cuki mis mo.
26Dhali gwo gom mii yan mo tani a’di yaki’d ki lala’th mo e bampa/ ’baar mo be.
27Dhali ka Yesus yaki’d ki yampe mo ’peni mun mo tani ’kwaniny ja’da/ isu/ baṯẖki a’di nsho’k mo mmocuu ki ’twa/ kun caaca mo ki: Miiyi mii ap̱o/ aman mo ma, Ya/ ma Dawuu’d mo.
28Ki a’di cic̱ki gu’b mo tani ’kwani kun tana ja’da/ p̱u’dkini a’di mo. Dhala Yesus ki o uni gwo mo ki: Um gamki gwo is mo ki aha/ misha to yan mii mo ’taa? Uni thoḵ a’di gwo mo ki: Nye, Tap̱a.
29Dhali yan’ko’d a’di ki ta uni em buni is ki me’d mo dhali o gwo mo ki: Isi me’d moŋgam gwo is bum mo tani a’di miikunu gom um mo be.
30Dhali em buni ḵa’dkunu mo dhala Yesus ki la ḵan uni gwo ki ’bi’th mo mmo/o gwo mo ki: Dhalku/ ki dhal wathiŋ kamu/ mmomish a’di yan mo.
31Hili uni iikini bway mo dhali peper gwom piti ki lala’th mo e pa gwansani ’baar mo.
32Me’d jin iikina uni mbway mo tani hili wathin ’diye/ jin bu’th ma rum thus mo suskunu i a’di mo be.
33Dhali ka rum thus urkunu ka pije/ mo tani wathi/ jin ta’da ’diye/ oki gwo mo dhala waambuhany ’kwani merkin mo mmo/o gwo mo ki: Toŋ kamu/ yisa di’da jin p̱aru e mo wakansan ’thissa/ mo e ’Kwani ma Israyiil ki sule/ mo be.
34Hili ’Kwani P̱arisiyiin o gwo mo ki: A’di urki’da rum thus ka pije/ ki gway gi tap̱a ma ruma ’cesh mo be.
35Dhala Yesus yaki’d e ’peŋkuman bampa/ ’baar mo dhali e bampa/ si’da/ mmoṯor gwo e gu’b gi montul is buni mo dhali mmoc̱i gwom ’borga/ gom Bampa/ ma Arumgimis mo dhali mmowac̱a ris ’ba’th kun ’koshi ’kwani mo dhali aris isa nyor mo be.
36Ki a’di p̱arki’da waambuhany ’kwani e mo tani a’di hilki’da hil ka ’thime/ mo gom uni mo haali/ uni ’kokin mo ka ha’th’ko’d mo dhali dar gi mom’bi’th mo mmowa e ki ḵa’bal kun dar ga manhil uni mo be.
37Dhali yan’ko’d a’di ki o imanciḵ a’di gwo gwo mo ki: Bwaman mondhe’d iskina to mo tani hili imanmiiya ṯu’c uni ’koni daḵa/ mo be.
38’Thoyi wakansan mo ma, ki Tap̱a gi mondhe’d midi hashki imanmiiya ṯu’c mo e bwam mondhe’d piti mo be.
