1Mmohilkina a’di awaambuhany ’kwani mo tani a’di seki bway ’kuwosh jin turatur mo dhali ki a’di c̱a’bki’da ’cesh mo tani imanciḵ a’di gwo p̱u’dkini a’di mo be.
2Dhali a’di ki ḵa’d ’twam piti mo dhali ṯor uni gwo mo mmo/o gwo mo ki:
3Mom’bor mii gom uni gun hatha’ko’d e shi/in mo, gom bampam buni ta ji gi momis mo be.
4Mom’bor mii gom uni gwansan kun gwokin mo, ki uni minu malas mo be.
5Mom’bor mii gom uni gun ’thup̱ ma du mo ki uni mini gam mal ma ’cesh mo be.
6Mom’bor mii gom uni gwansan kun ’kosha ṯe/ mo dhali kun butha ṯe/ miiŋḵar/e mo ki uni minu kap̱ mo be.
7Mom’bor mii gom uni gun miimii mo ki uni mini gam momiimii mo be.
8Mom’bor mii gom uni gun dhelel ma du mo ki uni mini p̱ara Arumgimis e mo be.
9Mom’bor mii gom uni gun dhuna dhu ka ḵu’th is mo ki uni minu yuḵ ki iya/ ma Arumgimis mo be.
10Mom’bor mii gom uni gwansan kun ṯoju bwa mo gom gway gi miiŋḵar/e mo, gom bampam buni jin tana uni mo tani ta ji gi momis mo be.
11Mom’bor mii gom um ki ’kwani mini sor um mo dhali ṯo’c um bwa mo dhali wal gwo sora shigga/ ap̱o/ um mo gom gway pem mo be.
12’Kunyi bwa mo ma dhali ’bori bwa mo, haali/ tom bum gun tana um gun ish ḵumma/ mo e momis mo tani uni eḵkin mo, haali/ wakan ’kwani ṯoci imanc̱i gwo ma Arumgimis bwa kadhamo/ mo uni gun ’koni ṯwa/a/ ki um mo be.
13Um tana ’doŋkoro/ gom mony’cesh mo. Hili waḵka ’doŋkoro/ midi this montaŋkar piti e mo tani a’di midi mish ’bala’th kata mo? A’di diki ha me’d mo doḵ/e gom toŋ kamu/ mo, hili isi ciki/ a’di minu biṯa sho mo dhali minu yap̱ ki sho’k gi ’kwani mo be.
14Um ta moŋkush gi ’kwaniny’cesh mo be. ’Peŋkuman bampa/ c̱aan jin ḵa’bkunu mo e ’kuwosh mo tani a’di molu ba’k mo be.
15Walla ki ’kwani c̱i’thkina lamba/ mo tani uni kum a’di ’kup̱ ki toŋ’kul bwa mo ’taa? Hili uni ki kar a’di e ṯirkina/ mo dhali a’di ki c̱i moŋkush e gu’bi ’baar mo be.
16Dhalki moŋkush bum kushi mo mo wakan mbwambori ’kwani mo, ki uni mini p̱ar miim ’boron bum e mo dhali c̱i monyca ka Babam bum jin di’d e momis mo be.
17Dhalku/ ki ṯosh ki aha/ p̱u’dkina mo mmop̱uu gwoŋḵan jin c̱inu mo dhali imanc̱i gwo ma Arumgimis kadhamo/ mo. Aha/ p̱u’dkina mo mmop̱uu uni mo yisa, hili mmothim uni mo be.
18Haali/ ka jiŋ gana/ aha/ ona um gwo mo ki: ntagi momis dhali mony’cesh uni mini pe mo tani walla ari businyaŋ gwo walla ’pisiraŋ gwo mo tani uni mini ’koki pe mo ’peni gwoŋḵan jin c̱inu mo ntagi uni ’baar mo minu thim mo be.
19A’diyin jin midi ’ce’d gwoŋḵana ’de/ ’peni uni gwansan kun ’kwarkunu mo kun p̱isin mo dhali ṯor ’kwani gwo wakan mo si’da/ tani a’di minu yuḵ ki a’di jin p̱isap̱is mo e Bampa/ gi Momis mo. Hili a’di jin mii uni mo dhali ṯor gwo ki uni mo tani a’di minu yuḵ gway ki a’di jin caaca mo e Bampa/ gi Momis mo be.
20Haali/ aha/ ṯora um gwo mo ki isi ciki/ miiŋḵar/em bum mo mini bol ku gi iman’kwar to e mo dhali ’Kwani P̱arisiyiin mo tani um mini mol cic̱ e Bampa/ gi Momis mo be.
21Um ciḵki gwo jin onu ’peni ’kwanin dhamo/ ki: /E mini mii dhalku/ ki ’kosha ’kosh mo, dhali a’di jin ’koshki’da ’kosh mo tani a’di midi ’dap̱i gwon dwall mo be.
22Hili aha/ ona um gwo mo ki aris ’kwani ’baar mo ka ’deṯe/ ’deṯe/ ki ji gi mii’da nyor ka kam piti mo tani a’di midi ’dap̱i gwon dwall mo be. A’diyin jin soro’da kam piti mo si’da/ mo tani midi ’dap̱i gwon dwall e montul is gi ’Kwani Yahuuda/ mo, dhali a’diyin jin midi o /e gwo mo ki: /E ta p̱us mo tani, a’di midi ’dap̱i mo ma al o’d mo be.
23Wakan waḵki/ /e ki guyu/ tom pini jin c̱inu ki me’d mo ap̱owa gwaṯa/ mo dhali /e ki ka gwo e ka kam pini dina toŋ kamu/ ap̱o/ /e mo tani
24dhalki tom pini jin c̱ina /e ki me’d mo mbwambor ma gwaṯa/ mo dhali yaku/ mo, mmogwama gwam nṯwa/a/ mo nyaḵka kam pini mo dhali yan’ko’d yayu/ mo dhali c̱i tom pini jin c̱inu ki me’d mo.
25Miiyi amugu ki jahanne/ mo nyaḵki a’di jin yer /e is ki gway mo ki um ’kon mo mmo/ii ka yiha/ mo e bway mmodwall gwo mo nyaḵki a’di mo, isi ciki/ amanyer /e is ki gway midi biṯki /e mo e me’d ma mandwall gwo mo dhali amandwall gwo mo a’di midi c̱iki /e ka manji mo mo dhali /e minu kar eya sijin mo be.
26Ka jiŋ gana/ aha/ ona /e gwo mo ki /e mini mol ’ba/ piyu/ ka pije/ ki sule/ mo ntagi /e mini c̱iya maliim jiŋ ’ko’d mo be.
27Um ciḵki gwo jin onu ki: Dhalku/ c̱al ki mii mii mo ma.
28Hili aha/ ona um gwo mo ki aris ’kwani ’baar mo ka ’deṯe/ ’deṯe/ uni gun hili ’kup̱ ki up̱ mo mmo’dap̱ e mo tani ki jahanne/ uni miiki miinyc̱al nyaḵki up̱ mo eya dum buni mo be.
29Waḵki/ e ma bim poros pini ṯu’c /e mo mmomii miinthus mo tani buḵi a’di ka pije/ mo ma dhali biṯi a’di asho mo haali/ a’di ’boro’d gom /e mo mmothis buŋgwar is gi ’ban is piniŋ kamu/ e mo jin mina buŋgwar is pini ka ’bimpil diki ya mo e mo ma al o’d mo be.
30Dhali waḵki/ me’da bim poros pini midi ṯu’c /e mo mmomii miinthus mo tani ’ciṯẖi/ a’di mo ma dhali yip̱i a’di asho mo haali/ a’di ’boro’d gom /e mo mmothis buŋgwar is gi ’ban is piniŋ kamu/ e mo jin mina buŋgwar is pini ka ’bimpil diki ya mo e mo ma al o’d mo be.
31A’di onu si’da/ ki: A’diyin jin midi dhal ashim piti ’pen mo tani dhalki a’di thosoni’da warka/ jin dhaluwa dhal ’pen mo.
32Hili aha/ ona um gwo mo ki aris ’kwani ’baar mo ka ’deṯe/ ’deṯe/ gun dhalki up̱ buni ’pen mo hili isi ciki/ jasi gom gwo gi miinyc̱al mo tani uni dhu uni ki imanmii miinyc̱al mo dhali a’diyin jin midi mash a’bom jin dhal ma kaṯẖim piti ’pen mo tani a’di si’da/ miiki miinyc̱al mo be.
33Doḵ/e um ciḵki gwo jin onu mo ki ’kwanin dhamo/ ki: /E mini dhalku/ ki mii thul me’da p̱o/ gwo mo mmo/o is ka ṯor mo, hili thimi gwo e Tap̱a mo a’di jin thula /e gwo me’da po/ mo mmo/o mo.
34Hili aha/ ona um gwo mo ki: Dhalku/ gwo ki mii thul me’da p̱o/ mo mmo/o mo ki sule/ mo ma, walla gom momis mo haali/ a’di ta’da ḵursi ma Arumgimis mo be,
35walla gom mony’cesh mo haali/ a’di ta mondhu sho’k piti mo, walla gom Pa Urushaliim mo haali/ a’di ta ’peŋkuman bampa/ ma Maliḵ jin ca’d mo.
36Dhali dhalku/ ki mii thul gwo me’da p̱o/ mo mmo/o mo gom ’kup̱ pini mo haali/ /e molona mur’kup̱ ṯal ’deŋ kamu/ war mo mmota gi kush mo walla mmota gi ’thi/ mo.
37Dhalki gwom pini jin ona /e mo midi ta jasi anynye mo walla yisa mo. Ma e toŋ kamu/ jin mar mii yan is mo tani uni p̱u’dkin ’peni tonthus mo be.
38Um ciḵkin a’di jin onu ki: Ki e gom e mo dhali ki she/ gom she/ mo tani
39hili aha/ ona um gwo mo ki: Dhalku/ ki roc̱ a’di jin ta thus mo. Hili waḵki/ jan ’deŋ kamu/ midi dor /e e ’ban ’peshe/ ma bim poros mo tani ṯu’kki a’di ’bana kamu/ si’da/ mo ma.
40Dhali waḵki/ wathin ’deŋ kamu/ midi sus /e mo dhali bu’th burrinyem bwaman pini mo tani dhalki a’di bu’th jam p̱o/ si’da/ mo ma.
41Dhali waḵki/ wathin ’deŋ kamu/ ḵan /e gwo ki ’bi’th mo mmoya ki ŋaṯgin ’de/ mo tani yayi nyaḵki a’di mo ki ŋaṯgini su/ mo.
42C̱iki a’di jin doṯki to ’peni /e mo dhali dhalku/ ki ush a’di jin midi bar to ḵal ’peni /e mo.
43Um ciḵkin a’di jin onu ki: /E mini en amannyaḵ c̱a’b pini mo dhali shi/ ’kup̱ pini i e mo.
44Hili aha/ ṯora um gwo mo ki: Eni uni gun ta ’kup̱ ki um mo ma dhali ’thoyi gom uni gwansan kun ṯoci um bwa mo.
45Wakan ki um mini ta iya/ ma Ababam bum jin di’d e momis mo, haali/ a’di ṯu’cki’da tentem piti mmosul ap̱o/ ’kwani kun to thus ki thus mo dhali ap̱o/ uni kun ta ’kwaniŋ gana/ mo, dhali a’di ki hasha sho’k ap̱o/ ’kwani kun ta kuŋ ḵar/e mo dhali ap̱o/ uni gun ’koki ta kuŋ ḵar/e mo be.
46Haali/ waḵki/ um ki en uni gwansan kun eni um mo tani tom bum kun mina um gam gom mii gi wakan mo tani mini wakata mo sa/? ’Kona imantera thulp̱a/ ki mii mii jin nyaḵa’d kan mo ’taa?
47Dhali waḵki/ um ki the jasi iwaḵ bum me’d mo tani mii jana imiina /e ki nyanye/ mmobol cin tiya e mo? ’Kona ’kwani kun ’koki ta ’Kwani Yahuuda/ ki mii mii jin nyaḵa’d kan mo ’taa?
48Wakan um mini mii ta unim ’borgaŋ gana/ mo me’da Ababam bum jin di’d e momis jin ta a’dim ’borgaŋ gana/ mo be.
