ማቶሳ 26

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹ዬሱሲ ሃ ቲሚርቲያ ኡባ ዉሪሴዳ ዎዴ፥ ባሬና ካሊያዋንታ፥

²«ላዑ ጋላሳፔ ጉዪያን፥ ፓሲጋ ባላ ቦንቺያ ጋላሳ ጊዲያዋ ኤሪታ። ሄ ጋላሲ ታና፥ ኣሳ ናዓ፥ ኣሳይ ማስቃሊያ ቦላ ሚሲማሪያን ꬊሺዴ ካቃናው ኣꬂዴ ኢማና» ያጌዳ።

³ሄ ዎዴ ቄሳቱዋ ካፓቱኔ ጋዲያ ጪማቱ ቃያፋ ጌቴቲያ ቄሳቱዋ ኡባቱዋ ካፑዋ ዎጋ ጎሊያን ሺቂዴ፥

⁴ኣሳይ ኤሬናን ዬሱሳ ኦይቂዴ፥ ዎꬋናው ማቄቴዲኖ።

⁵ሺን ኡንቱንቱ፥ «ኣሳይ ዋላሳ ኬሴና ማላ፥ ፓሲጋ ቦንቺያ ጋላሲ ሄዋ ኦꬆኮ» ያጌዲኖ።

⁶ዬሱሲ ቢታኒያ ካታማን ኦሉዋ ሃርጊያ ሲሞና ሶዪን ዴዒሺን፥

⁷ኢቲ ሚሺራታ ኣልባስፂሮሳ ጌቴቲያ ሹቻፔ ኦሴቴዳ ቢልቃሲያ ኩሜዳ ዳሪ ኣልዖ ሺቱዋ ኣካዴ ዬዳዉና ቁማ ኢ ሚና፥ ሄ ሺቱዋ ዬሱሳ ሁጲያን ጫጫፋዱ።

⁸ሺን ዬሱሳ ካሊያዋንቱ ሄዋ ቤዒዴ፥ «ሃ ሺቱዋ ጮ ባዪዙሳይ ኣያሴ?

⁹ኣዪሲ ጎፔ፥ ሃ ሺቱዋ ኣልዖ ጋቲያን ዛሊዒዴ፥ ሚሻ ሂዬሳው ኢማናው ዳንዳዬቴ» ያጌዲኖ።

¹⁰ዬሱሲ ኡንቱንቱ ጊያዋ ኤሪዴ፥ ኡንቱንታ ሃዋዳን ያጌዳ፤ «ሃ ሚሺራቶ ኣያው ዋዪሲቴ? ኢዛ ታው ሎዖባ ኦꬃዱ።

¹¹ሂዬሳቱ ኡባ ዎዴ ሂንቴናና ዴዒኖ፤ ሺን ታኒ ሂንቴናና ኡባ ዎዴ ዴዒኬ፤

¹²ኢዛ ሃ ሺቱዋ ታ ቦላ ቲጊያዌ ታና ሞጋናው ጊጊሳናሳ።

¹³ታኒ ሂንቴንቶ ቱሙዋ ኦዳይ፤ ሳዓ ኡባን ሃ ዎንጋላ ሚሺራቹዋ ኦዲያሳን ሃቃኒኔ፥ ኣሳይ ኢዞ ዎዛና ኣꬃና ማላ፥ ኢዛ ኦꬄዳዌ ኦዴታናዋ» ያጌዳ።

¹⁴ሄ ዎዴ ታማኔ ላዑ ዬሱሳ ካሊያዋንቱፔ ኢቱ ዪሁዳ ኣስቆሮቱ ያጌቲያዌ ቄሳቱዋ ካፓቱዋኮ

¹⁵ቢዴ፥ «ታኒ ሂንቴንቱሲ ዬሱሳ ኦይꬆፔ፥ ታው ኣያ ኢማኒቴ?» ያጊና ኡንቱንቱ ኣው ሃታሙ ቢራ ቆፒዴ ኢሜዲኖ።

¹⁶ሄዋፔ ጉዪያን፥ ዪሁዳይ ዬሱሳ ኣꬂ ኢማናው ኢንጄቲያ ዎዲያ ዎቼ።

¹⁷ባላ ዳቡዋ ሚያ ጋላሳ ቦንቺያ ኮይሮ ጋላሲ፥ ዬሱሳ ካሊያዋንቱ ኣኮ ዪዴ፥ «ፓሲጋ ቦንቺያ ጋላሲ ኔኒ ማና ቁማ ሃቃን ጊጊሳኔ?» ያጌዲኖ።

¹⁸ሄዋፔ ጉዬ ዬሱሲ ኡንቱንታ፥ «ካታማ ቢዴ፥ ኢቲ ቢታኒያ፥ ‹ታማሪሲያዌ ኔና፥ «ታው ዎዲ ጋኬዳ፤ ታኒ ታና ካሊያዋንቱና ፓሲጋ ቦንቺያ ጋላሳ ኔ ሶዪን ኣꬃና» ጌዳ› ጊቴ» ያጌዳ።

¹⁹ኣ ካሊያዋንቱ ዬሱሲ ባሬንታ ኣዛዞዋዳን ኦꬂዴ፥ ፓሲጋ ቦንቺያ ጋላሲ ማና ቁማ ጊጊሴዲኖ።

²⁰ሳዓይ ኦማርሴዳ ዎዴ፥ ዬሱሲ ታማኔ ላዑ ኣ ካሊያዋንቱና ቁማ ማናው ኡቴዳ።

²¹ኡንቱንቱ ሚሺን፥ ዬሱሲ ኡንቱንታ፥ «ታኒ ሂንቴንቶ ቱሙዋ ኦዳይ፤ ሂንቴፔ ኢቲ ኡራይ ታና ኣꬂዴ ኢማናዋ» ያጌዳ።

²²ኡንቱንቱ ዳሪ ዳጋሚዴ፥ ሁጲያን ሁጲያን፥ «ጎዳው፥ ቱሙ ታኔሻ?» ጉሳ ዶሜዲኖ።

²³ዬሱሲ ዛሪዴ፥ «ባሬ ኩሺያ ታናና ኢቲፔ ዎጪቲያፔ ዬዲዴ ቱሺያዌ ታና ኣꬂ ኢማና።

²⁴ታኒ፥ ኣሳ ናዓይ፥ ፆሳ ማፃፋይ ሃይቃና ጌዳዋዳን ሃይቃና፤ ሺን ታና፥ ኣሳ ናዓ፥ ኣꬂ ኢሚያ ኡራው ኣዬሮ፤ ሄ ኡራይ ዬሌቴናን ኣቴዴንቶ ኣው ሎዓሺን» ያጌዳ።

²⁵ኣ ኣꬂ ኢሚያ ዪሁዳይ ዛሪዴ፥ «ታማሪሲያዎ፥ ኔኒ ጊያዌ ታኔ?» ያጌዳ። ዬሱሲ ዛሪዴ ኣ፥ «ኔኒ ኔ ሁጲያን ጋዳ» ያጌዳ።

²⁶ኡንቱንቱ ሚሺን፥ ዬሱሲ ዳቡዋ ኣኪዴ፥ ፆሳ ጋላቴዳ፤ ሄ ዳቡዋ ሜንꬄሬꬂዴ፥ ባሬና ካሊያዋንቱሲ ኢሚዴ፥ «ሄይቴ፤ ሚቴ፤ ሃዌ ታ ኣሹዋ» ያጌዳ።

²⁷ፁዓ ኣኪዴ፥ ፆሳ ጋላቴዳ። ኡንቱንቶ ኢሚዴ፥ «ኡባይ ሃዋፔ ኡሺቴ፤

²⁸ኣያው ጎፔ፥ ሃዌ ዳሮ ኣሳ ናጋራይ ኣቶ ጌቴታና ዲራው ጉኪያ ታ ሱꬃ፤ ታ ሱꬃይ ኦራꬃ ጫቁዋ።

²⁹ሺን ታኒ ሂንቴንቶ ኦዳይ፤ ታኒ ታ ኣቡ ካዉቴꬃን ኦራꬃ ዎዪኒያ ኤሳ ሂንቴንቱና ኡሻና ጋላሳይ ጋካናው፥ ላዔꬁዋ ሃ ዎዪኒያ ኤሳ ኡባካ ኡሺኬ» ያጌዳ።

³⁰ማዚሙሪያ ዬፆዋፔ ጉዪያን፥ ዴብሬ ዛይቴ ጌቴቲያ ዴሪያ ቤዲኖ።

³¹ዬሱሲ ሄ ዎዴ ኡንቱንታ፥ «ሃቼ ቃማ ሂንቴንቱ ኡባይ ታና ኣጊዴ ኪቻና፤ ኣያው ጎፔ፥ ፆሳ ማፃፋይ፥ ‹ፆሳይ ዶርሳ ሄሚያዋ ዎꬋናዋ፤ ሄዋፔ ጉዪያን ዶርሳ ዉዲ ላሌታናዋ› ያጌ።

³²ሺን ታኒ ሃይቁዋፔ ዴንዶዋፔ ጉዪያን፥ ሂንቴፔ ካሴታዴ ጋሊላ ባና» ያጌዳ።

³³ጴፂሮሲ ዛሪዴ፥ «ኡንቱንቱ ኡባቱ ኔና ኣጊዴ ኪቻናዋንታ፤ ታኒ ኔና ኡባካ ዬጋዴ ኪቺኬ» ያጌዳ።

³⁴ዬሱሲ ጴፂሮሳ፥ «ታኒ ኔው ቱሙዋ ኦዳይ፤ ሃቼ ቃማ ኩቱ ዋሳናፔ ካሴ፥ ኔኒ ታና ሄዙ ካላ ካዳናሳ» ያጌዳ።

³⁵ጴፂሮሲ ዛሪዴ፥ «ታኒ ሃራይ ኣቶ፥ ኔናና ኢቲፔ ሃይቂንቶካ፥ ኔና ኡባካ ካዲኬ» ያጌዳ። ቃሲ ዬሱሳ ካሊያዋንቱ ኡባቱካ ሄዋዳን ጌዲኖ።

³⁶ዬሱሲ ሄ ዎዴ ባሬና ካሊያዋንቱና ጌቴሴማኒያ ጌቴቲያሳ ቢዴ ኡንቱንታ፥ «ታኒ ሂኒ ባዴ ፆሳ ዎሲሺን፥ ሂንቴንቱ ሃዋን ኡቲሺቴ» ያጌዳ።

³⁷ሄዋፔ ጉዬ ጴፂሮሳኔ ዛቢዲዮሳ ናና ላዑዋ ባሬናና ኣፊዴ፥ ዳሮ ካዩዋኔ ኡጋ ዶሜዳ።

³⁸ቃሲ ኡንቱንታ፥ «ታኒ ሃይቃና ጋካናሲካ ካዮታይ፤ ሃዋን ቤጎቲዴ፥ ታናና ናጊቴ» ያጌዳ።

³⁹ላፋ ሲንꬃኮ ሺቂዴ፥ ሳዓን ጉፋኒዴ፥ «ታ ኣቦ፥ ዳንዳዬቲያዋ ጊዶፔ፥ ሃ ፁዓ ታፔ ዲጋ፤ ሺን ኔኒ ኮዪያዋዳን ሃኖፔ ኣቲን፥ ታኒ ኮዪያዋዳን ሃኖፖ» ያጊዴ ፆሳ ዎሴዳ።

⁴⁰ዬሱሲ ባሬና ካሊያዋንቱኮ ሲሚዴ ዬዳ፤ ጌሚዒሾዋንታ ዴሚዴ ጴፂሮሳ፥ «ሂንቴንቱ ኢቲ ሳቴንቶኔካ ጌሚዒሼናን ታናና ናጋናው ዳንዳዪቤይኪቴ?

⁴¹ፓጪያን ሂንቴንቱ ጌሌና ማላ፥ ሚኒቴኔ ፆሳ ዎሲቴ፤ ኣያናይ ጊጊ ኡቴዳ፤ ሺን ኣሳቴꬃ ኤሻይ ዳቡራንቻ» ያጌዳ።

⁴²ዬሱሲ ቃሲ ላዔንꬁዋ ቢዴ፥ «ታ ኣቦ፥ ታኒ ሃ ዎሊቃማ ሜቱዋ ኣኬናን ዴዒሺን ፁዓ ዴንꬃናው ዳንዳዬቴናዋ ጊዶፔ፥ ኔኒ ጊያዌ ሃኖ» ያጊዴ ፆሳ ዎሴዳ።

⁴³ቃሲካ ሲሚ ዪዴ፥ ኣ ካሊያዋንቱ ኣይፊያ ጌሚዒሹ ጎዚ ዎꬄዳ ዲራው፥ ጌሚዒሾዋንታ ዴሜዳ።

⁴⁴ቃሲካ ኡንቱንታ ዬጊ ቢዴ፥ ሄዜንꬁዋ ካሴ ቃላ ዛሪዴ፥ ፆሳ ዎሴዳ።

⁴⁵ሄዋፔ ጉዪያን፥ ባሬና ካሊያዋንቶ ዪዴ፥ «ሃዒ ጋካናዉካ ጌሚዒሺቴኔ ሼምፒቴ? ቤዒቴ፥ ታና፥ ኣሳ ናዓ፥ ናጋራንቻ ኣሳቱዋሲ ኣꬂዴ ኢሚያ ዎዲ ጋኬዳ።

⁴⁶ዴንዲና ቦይቴ፤ ቤዒቴ፥ ታና ኣꬂ ኢሚያዌ ሃዌኩ ጋኬዳ» ያጌዳ።

⁴⁷ዬሱሲ ሄዋ ቢሮ ሃሳዪሺን፥ ታማኔ ላዑ ኣ ካሊያዋንቱፔ ኢቱ፥ ዪሁዳይ፥ ጋኪ ዎꬌዳ፤ ቃሲ ቄሳቱዋ ካፓቱኔ ጋዲያ ጪማቱ ኪቲና፥ ማሻኔ ፃምዓ ኦይቄዳ ጮራ ኣሳይ ኣናና ኢቲፔ ዬዳ።

⁴⁸ዬሱሳ ኣꬂ ኢሚያዌ ሄ ጮራ ኣሳ፥ «ታኒ ዬሪያዌ ኣ፤ ኣ ኦይቂቴ» ያጊዴ ማላ ኦዲ ዎꬄዳ።

⁴⁹ኤሌካ ዬሱሳኮ ሺቂዴ፥ «ታማሪሲያዎ፥ ሳሮ ዴዓይ» ያጊዴ ኣ ዬሪ ኣኬዳ።

⁵⁰ዬሱሲ ዪሁዳ፥ «ታ ላጌው፥ ኔኒ ኦꬃናባ ኦꬃ ኣጋ» ያጌዳ። ሄዋፔ ጉዪያን፥ ሄ ጮራ ኣሳይ ሺቂዴ፥ ዬሱሳ ሎይꬂ ኦይቄዳ።

⁵¹ዬሱሳና ዴዒያዋንቱፔ ኢቱ ባሬ ማሻ ኬሲዴ ቄሳቱዋ ኡባቱዋ ካፑዋ ቆማ ሃይꬃ ቃንፂ ኦሌዳ።

⁵²ዬሱሲ ሄ ዎዴ ኣ ሃዋዳን ያጌዳ፤ «ኔ ማሻ ኣኬዳሳኒ ዛራዴ ዎꬃ፤ ኣያው ጎፔ፥ ማሻ ዴንꬂያ ኡባይ ማሻን ሃይቃና።

⁵³ታ ኣቡ ዳሮ ሻዓ ኪታንቻቱዋ ኢቲ ኩꬃን ዬዲዴ፥ ታና ማዳና ማላ፥ ታኒ ኣ ዎሳናው ዳንዳዪያዋ ኤሪኪ?

⁵⁴ያቲና፥ ፆሳ ቃላይ ሃዋዳን ሃናናው ቤሴ ያጌዳዌ ዋኒዴ ፖሌታናው ዳንዳዪ?» ያጌዳ።

⁵⁵ሄዋፔ ጉዪያን፥ ዬሱሲ ሄዋን ሺቄዳ ጮራ ኣሳ ሃዋዳን ያጌዳ፤ «ታና ካዪሶ ኬሲዴ፥ ካዪሱዋ ኦይቂያዋዳን ኦይቃናው ማሻኔ ፃምዓ ኦይቂዴ ዬዲቴ? ታኒ ጌሻ ጎሊያን ታማሪሳዴ፥ ጋላሳን ጋላሳን ሂንቴንቱና ኦꬂያ ዎዴ ታና ኦይቂቤይኪታ፤

⁵⁶ሺን ሃዌ ኡባይ ሃኔዳዌ ናባቱ ፆሳ ቃላን ፃፌዳዌ ፖሌታናሳ» ያጌዳ። ዬሱሳ ካሊያዋንቱ ሄ ዎዴ ኡባቱ ኣ ዬጊ ቤዲኖ።

⁵⁷ዬሱሳ ኦይቄዳዋንቱ ቄሳቱዋ ኡባቱዋ ካፑዋ ቃያፋኮ፥ ሂጊያ ታማሪሲያዋንቱኔ ጪማቱ ሺቄዳሳ ኣኪዴ ቤዲኖ።

⁵⁸ሺን ጴፂሮሲ ቄሳቱዋ ኡባቱዋ ካፑዋ ዲርሳ ጊዶ ጋካናው፥ ሃኩዋን ኣ ካሌዳ፤ ዬዉዋ ዉርሴꬃ ቤዓናው ዲርሳ ጊዶ ጌሊዴ፥ ናጊያዋንቱና ኡቲ ኣጌዳ።

⁵⁹ቄሳቱዋ ካፓቱኔ ሺቄዳ ኣሳይ ኡባይ ዬሱሳ ዎꬋናው ኣ ቦላ ዎርዱዋ ማርካ ዴማናው ኮዬዲኖ።

⁶⁰ሺን ሃራይ ኣቶ ጮራ ኣሳይ ዪዴ፥ ኣ ቦላ ዎርዱዋን ማርካቲናካ ኣፔ ኣይኔ ዴሚቤይኪኖ። ጉዬፔ ላዓቱ ዪዴ፥

⁶¹«ሃ ቢታኒ፥ ‹ታኒ ፆሳ ጌሻ ጎሊያ ኮላዴ፥ ሄዙ ጋላሳን ዛራዴ ኬፃናው ዳንዳያይ› ጌዳ» ያጌዲኖ።

⁶²ቄሳቱዋ ኡባቱዋ ካፑ ዴንዲ ኤቂዴ ዬሱሳ፥ «ሃዋንቱ ኔና ሞቲያ ሞቶ ኔው ዛሪያባይ ባዌ?» ያጌዳ።

⁶³ሺን ዬሱሲ ጮዑ ጌዳ፤ ቃሲካ ቄሳቱዋ ኡባቱዋ ካፑ ኣ፥ «ታኒ ኔና ዴዑዋ ፆሳ ሱንꬃን ጫላይ፤ ኔኒ ፆሳ ናዓ ኪሪስቶሳ ጊዶፔ ኑሲ ኦዳ» ያጌዳ።

⁶⁴ዬሱሲ ዛሪዴ፥ «ኔኒ ኔ ሁጴዉካ ጋዳ፤ ሺን ታኒ ሂንቴንቱሲ ኦዳይ፤ ሃዋፔ ሲንꬃን፥ ሂንቴንቱ ታና፥ ኣሳ ናዓ፥ ዎልቃማ ፆሳፔ ኡሼቻ ባጋና ኡቴዳዋኔ ሳሉዋ ሻሪያና ዪሺን ቤዓና» ያጌዳ።

⁶⁵ሄዋፔ ጉዪያን፥ ቄሳቱዋ ኡባቱዋ ካፑ ባሬ ማዩዋ ጴꬊ ኦሊዴ፥ «ሃዌ ቦሬዳ፤ ኑና ሃዋፔ ሲንꬃን ኣያው ሃራ ማርካ ኮሺ? ኢ ሃዒ ቦሪያዋ ሂንቴንቱ ሲሴዲታ።

⁶⁶ሂንቴንቱ ቆፋይ ኣዬ?» ያጌዳ። ኡንቴንቱ፥ «ኣው ሃይቁ ቤሴ» ያጊዴ ዛሬዲኖ።

⁶⁷ሄዋፔ ጉዪያን፥ ኡንቱንቱ ኣ ዴሙዋን ጩቺዴ፥ ኣ ዴቼዲኖ፤ ሃራንቱ ቃሲ ኣ ባቂዴ፥

⁶⁸«ኪሪስቶሳ! ኔን ኔና ናቤ ጋሳሺን፥ ኔና ሾጬዳዌ ኦኔንቶ ኣኔ ኑሲ ኦዳ!» ያጌዲኖ።

⁶⁹ጴፂሮሲ ጎሊያፔ ካሬና ዲርሳ ጊዶን ኡቲዴዒሺን፥ ኢቲ ኣሺካራታ ኣኮ ያዴ፥ «ኔኒካ ጋሊላ ዬሱሳና ኢቲፔ ዴዓ» ያጋዱ።

⁷⁰ሺን ኢ ኡንቱንቱ ኡባ ሲንꬃን ሄ ኣሺካራቶ፥ «ኔኒ ጊያዌ ኣዬንቶ ታኒ ኤሪኬ» ያጊዴ ካዴዳ።

⁷¹ቃሲ ቢዴ ዲርሳ ፔንጊያኮ ኬሲሺን፥ ሃራ ኣሺካራታ ኣ ቤዓዴ፥ ሄዋን ዴዒያ ኣሳቱዋሲ፥ «ሃ ቢታኒ ናዚሬቲያ ዬሱሳና ዴዔ» ያጋዱ።

⁷²ጴፂሮሲ ላዔንꬁዋ ጫቂዴ፥ «ታኒ ሄዋ ቢታኒያ ኤሪኬ» ያጌዳ።

⁷³ላፋ ጋሚዒሺን፥ ሄዋን ኤቄዳ ኣሳይ ጴፂሮሳኮ ዪዴ፥ «ኔኒካ ቱማ ኡንቱንቱና ኢቲፔ ዴዓ፤ ኣያው ጎፔ፥ ኔኒ ሃሳዪያ ሃሳያይካ ኔና ኤሪሴ» ያጌዲኖ።

⁷⁴ሄዋፔ ጉዪያን ጴፂሮሲ፥ «ታኒ ሄዋ ቢታኒያ ኤሪኬ!» ያጊዴ፥ ባሬና ሼቃኔ ጫቁዋ ዶሜዳ። ሄ ዎዴ ኤሌካ ኩቱ ዋሲ ኣጌዳ።

⁷⁵ጴፂሮሲ ባሬና ዬሱሲ፥ «ኔኒ ኩቱ ዋሳናፔ ካሴ ሄዙ ካላ ታና ካዳናሳ» ጌዳዋ ሃሳዪዴ፥ ካሬ ኬሲዴ፥ ሴሌቲ ዬኬዳ።