MAṮṮA 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Haali/ Bampa/ gi Momis a’di wana e ki wathi/ jin cila gu’b mo, a’di jin ya’d mo mon’thamo/ ka’tum mo mmoŋap̱ imanmiiya ṯu’c mo gom bwaman monsinum piti mo be.

²’Ko’di gwo jin gama a’di me’d nyaḵki imanmiiya ṯu’c piti mo gom nasa guurush ka tee mo tani a’di ki hash uni e bwaman monsinum piti mo be.

³Dhali a’di yaki’d mo doḵ/e ka tente/ ta’da tente/ pedoŋon mo tani a’di p̱arki ’kwanin tiya e mo mmodosh mo ka wuny is e mo ma suug mo be.

⁴Dhali e uni mo tani a’di ki o uni gwo mo ki: Um mini ii e bwaman monsinum pem mo si’da/ dhali a’diyin jin ’boro’d mo tani aha/ mina c̱i um a’di mo. Wakan uni iikin mo be.

⁵Gom ya jin yana a’di doḵ/e ka tente/ di’di bwaŋ ’kup mo dhali ka tente/ kwara mo tani a’di ki mii mii jin nyaḵka’d kan mo si’da/.

⁶Dhali ka tente/ ta’da tente/ mudhe’d mo tani a’di yaki’d mo dhali gam kun tiya mmodosh mo dhali a’di ki o uni gwo ki: Atinta dosha um mmahan ka wuny is kan iyula tee mo?

⁷Uni ki thoḵ a’di gwo mo ki: Haali/ wathin ṯal ’de/ yisa di’da jin ŋap̱i aman mo. A’di ki o uni gwo mo ki: Um mini iiku/ mo e bwaman monsinum pem mo si’da/.

⁸Dhali ki mom’pimpili/ p̱u’dki’d mo tani com gi monsinu o’da mandhu tom piti gwo mo ki: Yuḵi imanmiiya ṯu’c mo dhali c̱i uni tom buni gun miina uniya ṯu’c mo mmoṯel ’pen nyaḵki uni gun ’ko’d mo ntagi uni kun ’koni ṯwa/a/ mo be.

⁹Dhali ki uni gwansan kun yuḵkunu mo ka tente/ mudhe’d p̱u’dkin mo tani uni ka ’deṯe/ ’deṯe/ bu’thki nasa guurush mo.

¹⁰Dhali ki uni kun ’koni ṯwa/a/ p̱u’dkin mo tani uni kulumki gwo i bwa mo ki uni mini ’taki bu’th ki nyanye/ mo. Hili uni ’baar mo ka ’deṯe/ ’deṯe/ si’da/ bu’thki nasa guurush si’da/ mo be.

¹¹Dhali ki uni bu’thki uni mo tani uni miikina gumgum ap̱o/ com gu’b mo

¹²mmo/o gwo mo ki: Uni gwansan kun miikina ṯu’c ŋ’ko’d mo ka jasa tenten ’de/ mo tani dhali /e ki dhu uni mmonyaḵki aman mana, aman kun miikina ṯu’c kun diṯadiṯ ka tente/ jin ’batha’ba’th kan mo.

¹³Hili a’di thoḵ jan ṯal ’deŋ kamu/ gwo mo ’peni uni mo ki: Akam pema, aha/ dinaki mii /e ki shi/ mo. Dina /e ki gam gwo me’d ki aha/ mo gom nasa guurush mo ’taa?

¹⁴Buthi a’di jin ta jim pini mo ma dhali yaku/ mo. Aha/ kwanykina a’di jin c̱ika/ uni gwansan mo kun iiyini ’ko’d mo me’d jin c̱ikika/ /e mo be.

¹⁵Aha/ dina bway ki ḵany mo be mmomii to jin oyaa/ bwa mo gom a’di jin ta jim pem mo be. Walla mina /e ta ham ’kus mo gom aha/ mmomiga/ mii ka ’the mo ki ’bore/ mo ’taa?

¹⁶Wakan uni gun ’koni ’ko’d mo tani minu dhu nṯwa/a/ mo dhali uni gun ’koni ṯwa/a/ mo tani minu dhu ŋ’ko’d mo be.

¹⁷Dhali ka Yesus yaki’d ka gagamis e Pa Urushaliim mo tani a’di suski imanciḵ a’di gwo i’kume’d i’ce’dka su/ mo uni ’cena mo dhali e bway mo tani a’di ki o uni gwo mo ki:

¹⁸Hili ana iina ii ka gagamis e Pa Urushaliim mo, dhali Ya/ gi ’Kwani minu c̱i ’kwaniŋ gasiis kun cani me’d mo dhali iman’kwar to mo, dhali uni mini waḵ a’di mo mmo’kosh a’di jwa mo be.

¹⁹Dhali uni mini c̱i a’di ki ’kwani kun ’koki ta ’Kwani Yahuuda/ mo mmomii a’di ka maḵ mo dhali mmodor a’di mo dhali ’kosh a’di mo ki cwany’ciṯẖan dhul mo, dhali a’di midi cu mis mo ka cim kwara mo be.

²⁰Dhali yan’ko’d ata’da gi iya/ ma Sebadi p̱u’dkini a’di mo nyaḵki iya/m piti mo dhali ’ko ki jiŋ ’kup̱a’dup̱uni bwambori a’di mo, dhala yim ki doṯ a’di gwo mo gom to mo.

²¹Dhali a’di ki owa yim gwo mo ki: Atinta ŋap̱a /e mo? Ayim ki thoḵ a’di gwo mo ki: Ḵani iya/m pem su/ gwansan gwo mo ma mmo’ko mo, jan ’de/ midi c̱a’b /e ki me’da bim poros pini mo dhali jan ’de/ midi c̱a’b /e ki me’da biny cam pini mo e bampam pini mo be.

²²Hila Yesus ki thoḵ a’di gwo mo ki: Um ’koki mish to jin doṯkina um mo be. Um mini mish p̱iya ḵubbaaya jin p̱ikika/ mo ’taa? Uni ki thoḵ a’di gwo mo ki: Aman mina mish mii mo be.

²³A’di ki thoḵ uni gwo mo ki: Um mini p̱iya ḵubbaayam pem mo. Hili mmo’ko aha/ ki me’da bim poros pem mo dhali ki me’da cam pem mo tani a’di diki ta miim pem mmodhal um bway mo, haali/ a’di ta mo gom uni gwansan kun thosonkin ma Ababam pem mo gom uni mo be.

²⁴Dhali ki uni gun ’koni ’kume’d ciḵki gwo yan mo tani uni ’kokin ka nyor mo ap̱o/ uni su/ gwansan mo kun ta ikam mo be.

²⁵Hila Yesus yuḵki uni mo dhali o gwo mo ki: Um mishki mo mo ki tap̱a kun ’koki ta ’Kwani Yahuuda/ mo mii miin tap̱a ap̱o/ uni mo dhali ’kwanim buni gun can mo miiki moshirr ap̱o/ uni mo be.

²⁶Mii yansan minu ’koki mii wakan e bwam um mo. Hili a’diyin jin midi ’taki ca mo mbwam um mo tani a’di midi mii ta amanmiiya ṯu’c bum mo.

²⁷Dhali a’diyin jin midi ’taki di nṯwa/a/ mbwam um mo tani a’di midi mii ta c̱iŋkinam bum mo be.

²⁸Wakansan me’d Ya/ gi ’Kwani p̱u’dki’d mo ki a’di minu ’koki mii to mo tani hili ki a’di midi mii to gom ’kwani mo dhali mmoc̱i mondiki/em piti mo mmota amangwam gom ’kwani ka ris mo be.

²⁹Dhali me’d jin iikina uni ka pije/ mo ’peni Pa Ariiha mo tani adhana waambuhany ’kwani baṯẖki a’di nsho’k mo be.

³⁰Dhali hili ’kwaniny ja’da/ isu/ ’kokin e shemen bway mo be. Ki uni ciḵki gwo ka Yesus yaki’d ki yampe mo tani uni cuu gwo kagahara ki: Miiyi mii ap̱o/ aman mo ma, Ya/ ma Dawuu’d mo.

³¹Dhali awaambuhany ’kwani ḵucurki uni ki gwo mo mmoṯor uni gwo mo mmo’ko ki shwam mo. Hili uni cuukin kagahara ki nyanye/ mo ki: Tap̱a, miiyi mii ap̱o/ aman mo ma, Ya/ ma Dawuu’d mo.

³²Dhala Yesus doshki’d mo dhali yuḵ uni mo dhali o gwo mo ki: Atinta o um bwa jin miga/ mii gom um mo?

³³Uni thoḵ a’di gwo mo ki: Tap̱a, dhalki em bam ḵa’du mo ma.

³⁴Dhala Yesus ki ḵwo’c uni e i is mo dhali ta uni em buni ki me’d mo, dhali ki jahanne/ uni bu’thki momish mom buni mo dhali uni baṯẖki a’di nsho’k mo be.