MƐBORIMƐ WÉÌTÌ 2:5-26

⁵kɛ́dɛí dɛpénnɛ̀ kɛ́duɔ dɛpɑɑ nkɛ́fííkú dɛtie ndɛbotí ndɛbotí dɛ̀ɛ̀ pɛí.

⁶Kɛ̀ ń keú sibií kɛ́nyɔ́ɔ́rìnɛ̀ dɛtepɑ̀nnɛ̀ n fìíkú dɛ̀,

⁷kɛ́do ntidɑɑtì tinitidɑɑtì nɛ̀ tinitipòtì, kɛ̀ bɛ̀ m piɛ́ ibí n cĩ́ɛ̃̀tɛ̀ miɛkɛ, kɛ̀ nní mmɔkɛ iwũɔ̃ inɑ̀ɑ̀kɛ nɛ̀ ipe nɛ̀ sibɔɔ́ mɛdiɛ̀, kɛ́pɛ̃ɛ̃tɛ́ bɛ̀ɛ̀ n niitɛ́nɛ̀ kɛ buotɛ́ Sedisɑdɛmmu.

⁸Kɛ̀ n koú timɑ́tì pɛ́ítì, kɛ́wɑɑ́ mbɛdèmbɛ̀ bɛnitidɑɑbɛ̀ nɛ̀ bɛnitipòbɛ̀, kɛ́mmɔkɛ onìtì dɔ́ dɛ̀, bɛnitipòbɛ̀ pɛ́u kɛ́ntú bɛnitipotɔ̃mbɛ̀ diɛbɛ̀.

⁹Kɛ̀ n dɛukɛ kɛ pɛ̃ɛ̃tɛ́ bɛ̀ɛ̀ n niitɛ́nɛ̀ kɛ di tikpɑ̀tì Sedisɑdɛmmu. Bɑ́ nɛ̀ mɛmmɛ kɛ̀ nní nkpɑɑ́nɛ̀ n yɛ̀mmɛ̀.

¹⁰N nuɔ nyɑ̀ dɛ̀ɛ̀ kó dimɑ̀ɑ̀ kɛ ndɔ́, n yí dɛ̀ nyì yetɛnɛ̀, n yí mmɔ̀ntɛ n yɛ̀mmɛ̀ diwɛ̀ì mɑrì kɛ̀ dɛ̀ nni nnɑɑti nɛ̀ mutɔ̃mmú mumɔu m pĩ́ mmù. Dɛɛ̀ do tú n kó mucɔ̃́ntimu.

¹¹Dɛ mɔ̀nnì kɛ̀ ntotí n yɛ̀mmɛ̀ n tɔ̃mmú mumɔu ĩ́nkɛ̀, n dɔ̀ɔ̀ dɛ̀ɛ̀ kó dimɑ̀ɑ̀, kɛ́nsɔ̃́ ndɛ̀ í dò nkɛ́bɑntɛ́ dɛ̀ í cɑ̃́ɑ̃́nnɛ̀ ɑ bo ndɔ́mɛ̀ kɛ́kpɑɑkɛ kuyɑɑkù. N yí cɔ̃ntɛ dɛ̀mɑrɛ̀ kɛtenkɛ̀ ĩ́nkɛ̀.

¹²Kɛ̀ n totí n yɛ̀mmɛ̀ ɑ bo nciìmɛ̀ nɛ̀ ɑ bo ntúmɛ̀ kuyɛìnkù nɛ̀ ɑ bo wɑ́ɑ́tɛ́mɛ̀ dɛ ĩ́nkɛ̀. Yé wèè yóó cɔutɛ́ mí nhokpɑ̀ɑ̀tì dɛ yiɛ̀ nyóó dɔɔ̀ mù kɛ̀ mù ncɑ̃́ɑ̃́.

¹³Mɛm̀mɛ n yɑ̀mɛ̀ mɛciì mmɔ̀kɛmɛ̀ mucɔ̃́ntimu kɛ pɛ̃ɛ̃tɛ́ ɑ bo yɛimmɛ̀, kuwenniku mɔkɛmɛ̀ mucɔ̃́ntimu kɛ pɛ̃ɛ̃tɛ́ dibiìnnì.

¹⁴Mɛciì nyiɛ̀ nnuɔ nwúómmu kɛ̀ kuyɛìnkù ɑ̃́ɑ̃ntɛ dibiìnnì miɛkɛ. Kɛ̀ nní nsɔ̃́ ntìmɑtì mɑ́ɑ̀ tiì bɛ̀ bɑ̀ɑ.

¹⁵N dɛ nyɑ̀ mɛborimɛ yóùmɛ̀ kɛ í dò nkɛ́bɑntɛ́. Tìì yóó tuɔkɛní kuyɛìnkù kɛ̀ tiì yó n tuɔkɛní, n nɛ́ ciì bɑ nkpɛ́í?

¹⁶Bɛ̀ ɔ̃ɔ̃ í nhɑ̃ kɛ yɛ̃́ mɛciì nyiɛ̀ nkpɛ́í, bɛ̀ mɛ nhɔ̃ɔ̃ í nhɑ̃ kɛ yɛ̃́ kuyɛìnkù kpɛ́í mbɛ̀ ɔ̃ɔ̃ bɛ̀ yɛ̃̀mmu bɛdɛ́. Kuyɛìnkù ɔ̃ɔ̃ kúmu kɛ mɛciì nyiɛ̀ nkú.

¹⁷N yɛ̀mmɛ̀ mɛɛ̀ cɑ̀ɑ̀rɛ̀ dɛ̀ í n nɑɑti! Dɛ̀ɛ̀ dɔɔri kɛtenkɛ̀ ĩ́nkɛ̀ dɛ̀ í n nɑɑti, mɛborimɛ í dò nkɛ́bɑntɛ́, dɛ̀ í cɑ̃́ɑ̃́nnɛ̀ ɑ bo ndɔ́mɛ̀ kɛ́kpɑɑkɛ kuyɑɑkù.

¹⁸Mutɔ̃mmú m pĩ mmù kɛtenkɛ̀ ĩ́nkɛ̀ kɛ ɔ̀u, kɛ yóó mù yóunɛ̀ wèè n tũ̀nní, dɛ̀ í n nɑɑti mu kpɛ́í.

¹⁹We nyɛ̃́ wèè n tũ̀nni kòò bo nciì yoo ò bo ntú kuyɛìnkù? Weè nɛ́ yóó bɑɑtɛ́ n dɔ̀ɔ̀ dɛ̀ɛ̀ kó dimɑ̀ɑ̀ kɛtenkɛ̀ ĩ́nkɛ̀ nɛ̀ n kó mɛciì. Dɛndɛ múnkɛ í dò nkɛ́bɑntɛ́.

²⁰Mɛm̀mɛ dɛ̀ yɑ̃rikɛmɛ̀ n kɔ̃̀ntì nɛ̀ mutɔ̃mmú m pĩ mmù kɛ ɔ̀u kɛtenkɛ̀ ĩ́nkɛ̀.

²¹Ntɛ onìtì wèè pĩ nho tɔ̃mmú nɛ̀ mɛciì nnɛ̀ mɛyĩ́ɛ̃́tímɛ̀ kɛ̀ mù yié mmɛsɑ̀ɑ̀. Kòò nɛ́ mù yóu nɛ̀ otɔù wèè í pĩ mmùmɑmù. Dɛndɛ í dò nkɛ́bɑntɛ́ dɛ̀ cɑ̀ɑ̀ri mɛyɛ̀mmɛ̀ mmɛ.

²²Onìtì kó mucɔ̃́ntimu nɛ́ tú ɔ̃̀mmu o tɔ̃mmú nɛ̀ tihɔ̀ùtì o ɔ̀ù tìì kó dimɑ̀ɑ̀ kɛtenkɛ̀ ĩ́nkɛ̀?

²³O we yɛmɔu tu kuyonku kpɛyɛ nyɛ, kòo tɔ̃mmú tú muyonkumu. Bɑ́ kɛyènkɛ̀ ò ɔ̃ɔ̃ í nhòmpɛ̀. Dɛndɛ í dò nkɛ́bɑntɛ́.

²⁴Onìtì bo dimɛ̀ kɛ́yɑ̃̀ dɛɛ̀ tu o kó diwɛ̀ì nɛ̀ o tɔ̃mmú ò pĩ mmù. Dɛndɛ kó dimɑ̀ɑ̀ bonní Kuyie mborɛ̀ ndɛ.

²⁵Kuyie mbɛ́immu kɛ tú kɛ̀ kuù í te we mbo di kɛ̀ dɛ̀ nhò nɑɑti?

²⁶Kuyie nhɔ̃ɔ̃ duɔ́ nkù dɔ́ wènwe mɛciì nnɛ̀ mɛyĩ́ɛ̃́tímɛ̀ nɛ̀ diwɛ̀ì. Bɛnitiyɛibɛ kó mutɔ̃mmú Kuyie mbɛ̀ duɔ́mmù tu bɛ̀ bo koúmɛ̀ kɛ tíí nkù dɔ́ bɛ̀ kpɛ́í. Dɛndɛ í dò nkɛ́bɑntɛ́ dɛ̀ í cɑ̃́ɑ̃́nnɛ̀ ɑ bo ndɔ́mɛ̀ kɛ́kpɑɑkɛ kuyɑɑkù.