LAASUNDE 2:5-26 - Luda yã takada kũ Bisã yão

LAASUNDE 2:5-26

Click on verse(s) to share them!

⁵Ma karanↄ kpàkpa ma swa dàkonↄ kɛ̀kɛ ma lí kũ òdi a nɛ́ ble buri sĩnda pínki bàban.

⁶Ma íkakinↄ kɛ̀kɛ ògↄ̃ mↄtↄ pisi líkpɛ pìnↄa.

⁷Ma zↄ̀nↄ lùlu gↄ̃gbɛ̃nↄ kũ nↄgbɛ̃nↄ, ò a kenↄ ì ma bɛa. Má zùnↄ kũ pↄ́kãde ketenↄ vĩ dasidasi de gbɛ̃ kũ ò kú Yurusalɛmu ma ãnↄla ń pínki.

⁸Ma andurufu kũ wuraao kàkaramai kũ kínanↄ aruzɛkɛnↄ kũ ń bùsu pↄ́nↄ. Ma lɛ̀sirinↄ sɛ̀ gↄ̃gbɛ̃ kũ nↄgbɛ̃nↄ, ma nↄgbɛ̃ kũ gↄ̃gbɛ̃ dì lukańyĩnↄ sɛ̀ dasi.

⁹Ma tↄ́ bò, má zↄ̃kↄ̃ de gbɛ̃ kũ ò kú Yurusalɛmu ma ãnↄla ń pínki, akũ má kpɛ́ ↄ̃ndↄ̃ vĩ a pínki gũn.

¹⁰Mádi gí ma zĩdanɛ kũ pↄ́ kũ à ma wɛ́ blèeoro. Mádi pↄ́ kũ à ma pↄ gbà ke tóro. Ma pↄ kɛ̀ nna ma zĩkɛna sĩnda pínkia, àkũmɛ ma ísimmawarana pínki láada ũ.

¹¹Kũ ma wɛ́ pɛ̀ yã kũ ma kɛ̀nↄi pínki kũ ísimma kũ ma wàraao a musu, ma è a pínki bi pãmɛ, pɛna gukoriamɛ, à àre vĩ andunia gũnlo.

¹²Akũ ma laasun lɛ̀ gɛna ↄ̃ndↄ̃ kũ yↄ̃nkↄkɛo kũ mìsarikɛo kpa. Yã kũ ò kɛ̀ zaa zĩ baasiro, a kpaten kína gɛ̃nɛ ni kɛ dↄↄ?

¹³Ma è ↄ̃ndↄ̃ àre vĩ de yↄ̃nkↄkɛla lákũ gupura dìgↄ̃ àre vĩ de gusirala nà.

¹⁴Ɔ̃ndↄ̃ri wɛ́ dìgↄ̃ kú a arɛ, yↄ̃nkↄ dìgↄ̃ kure gusiran. Akũ ma è gó dokↄ̃nↄ mɛ́ ani ń bikũ ń pínki.

¹⁵Akũ ma laasun lɛ̀ ma swɛ̃̀n ma pì, zaakũ gó dokↄ̃nↄ mɛ́ ani ó bikũ kũ yↄ̃nkↄnↄ nà, bↄ́ àreen mani le ma ↄ̃ndↄ̃aa? Akũ ma pì, abirekũ pãmɛ dↄ.

¹⁶Ɔ̃ndↄ̃ri yã ni dↄ gbɛ̃ken de yↄ̃nkↄlaro, ń pínki ń yã ni sã gbɛ̃nↄn zia. Ɔ̃ndↄ̃ri dì ga lán yↄ̃nkↄ bàmɛ.

¹⁷Akũ ma a kunna gya bò, zaakũ yã kũ òtɛn kɛ andunia gũn pínki dì kɛmɛnɛ nɛ̀sɛyakayã ũmɛ. A pínki bi pãmɛ, pɛna gukoriamɛ.

¹⁸Akũ ma zĩ kũ ma kɛ̀ andunia gũnnↄ gya bò pínki kũ mani tó ma gɛ̃nɛnɛ yãi.

¹⁹Dí mɛ́ à dↄ̃ tó ↄ̃ndↄ̃ri ke yↄ̃nkↄn a ũu? Bee kũ abireo zĩ kũ ma kɛ̀ andunia gũn kũ ↄ̃ndↄ̃o ni gↄ̃nɛmɛ. Abirekũ pãmɛ dↄ.

²⁰Akũ ma pↄ yàka ísimma kũ ma wàra andunia gũn pínki yã musu.

²¹Zaakũ gbɛ̃ dì zĩ kɛ kũ ↄ̃ndↄ̃o kũ dↄ̃naao kũ gonikɛo, akũ àdi tó gbɛ̃ kũ adi a ke kɛronɛ à gↄ̃ a pↄ́ ũ. Abirekũ pãmɛ dↄ, nɛ̀sɛyakayãmɛ manamana.

²²Bↄ́n gbɛ̃ dì le ísimma kũ à wàra andunia gũn kũ ↄsi kũ à kàao pínki yã musuu?

²³A kunna andunia gũn gↄrↄ sĩnda pínki a zĩ dìgↄ̃ sunɛ kũ yã'ũmmanaao kũ pↄyakanaaomɛ. Bee gwãani a laakarii dìgↄ̃ kpatɛnaro. Abirekũ pãmɛ dↄ.

²⁴Yã kũ à mana kũ bisãsirio mɛ́ à de à pↄ́ ble à í mi à a zĩ sáabu kpá. Ma è abirekũ bò Luda ↄĩmɛ dↄ.

²⁵Luda kpányĩ sari dí mɛ́ ani fↄ̃ à pↄ́ ble à pↄnna kɛɛ?

²⁶Luda dì ↄ̃ndↄ̃ kũ dↄ̃naao kũ pↄnnao kpá gbɛ̃ kũ à kɛ̀nɛɛa, ama àdi aruzɛkɛ kakarana zĩ da durunnakɛriinɛ de à sí à kpá gbɛ̃ kũ a kɛ̀nɛɛa. Abirekũ pãmɛ dↄ, pɛna gukoriamɛ.