Luuka 1:33-48

³³O laamoto iwdi Yaakuuba, laamu makko timmataa abada.

³⁴Mariyama wii malaa'ika oo: —Hono ɗum laatortoo, mi anndaa gorko?

³⁵Malaa'ika oo jaabii mo, wii: —Ruuhu Ceniiɗo jippoto e maa, baawɗe Laamɗo Toowɗo oo kuurete no ɗowdi nii. Saabe ɗum, ɓiɗɗo mo ndimataa oo noddirte Ceniiɗo, noddirte Ɓii Laamɗo.

³⁶Haya ƴeew, sakiike maa Elisabet duu ɓamii reedu, taweede mo naywii fuu, mo riman ɓiɗɗo gorko. Ana wiyetenoo mo dimaro, kaa jooni omo woni e lewru makko jeegoɓurdu,

³⁷sabi walaa fuu ko Laamɗo waawaa.

³⁸E oon wakkati, Mariyama wii: —Miin, mi korɗo Joomiraaɗo. Yo laatanoram no mbiiru-ɗaa nii. Caggal ɗum, malaa'ika oo witti, seli e makko.

³⁹E ley ɗeen ɲalaaɗe, Mariyama immii law yehi ngeenndi Yahuudiya ngootiri ngonndi dow baamle kaaƴe.

⁴⁰O naati galle Jakariyaa, o jowti Elisabet.

⁴¹Nde Elisabet nannoo jowtaango makko ndee, ɓiɗɗo gonɗo e reedu mum oo dillinii, Elisabet hebbinaa Ruuhu Ceniiɗo,

⁴²ilinii, wii: —A barkinaaɗo hakkunde rewɓe, ɓiɗɗo mo caaw-ɗaa oo duu yo barkinaaɗo.

⁴³Miin, ko ngon-mi faa inna Joomam naata galle am?

⁴⁴Nde jowtaango maa toɓɓinoo e nowru am ndee, ɓiɗɗo gonɗo e reedu am oo dillinike saabe kuyam.

⁴⁵A welii hoore, aan goonɗinɗo ko Joomiraaɗo fodan maa koo laatoto.

⁴⁶Mariyama wii: —Yonki am ana yetta Joomiraaɗo,

⁴⁷ɓernde am ana heewi seyo Laamɗo Kisinoowo kam,

⁴⁸sabi o yurmike kam, miin, korɗo makko lo'uɗo oo. Gila jooni jamaanuuji fuu noddiran kam belɗo hoore.