Luk 1:33-48

³³Aro i velpol ini nepes nge a Israelre evelelnga, naro nge ile menong e nepes aro ile vusonga avele.”

³⁴Na Maria i nin a ensel ve, “Ur ake aro i velpol vava? Eneke tho ngo tomo e toko e avele.”

³⁵Ma ensel i olal ile riong ve, “God Ioni Riringa aro i eso a wong nge, naro God ako i roro rintet ile engenging aro i seltun ong, maken aro wain riringa ako aro ong pop i aro o apet i ve ini a God Itun.

³⁶Wong nongpol, lomnga e ako iion a Elisabet ako i kimeitu lale na o ri ve i pavurvur aro i pop ol wain e avele, aveto ponange ia ngov or limae lale ako iopo nge.

³⁷Eneke ur e avele i klip nge a God ako aro i oma i.”

³⁸Na Maria i ria ve, “Nongpol, tho ake ini a God ile umonga, aro i oma i a tho nge ranga ve ako wong ri nge.” Mako ensel aken i los lelpot i.

³⁹Na nge wop lemi aken Maria i losa ma i es viri viri a rem a wop epee a Judia ako ini pen polemire.

⁴⁰Ma i eso a Sekaraia ile vel ma i ria ve, “Elisabet, ong kath?”

⁴¹Ma Elisabet i nongpol a Maria ikei, ma povothvoth aken i siu sia rintet a iopo lemi. Na Elisabet i vual nge a God Ioni Riringa.

⁴²Ma i presa viringa ma i ri ve, “Sapase wong, na God ile omaing nge wong, i aolonga nge seng alavusnga ako i oma i nge or. Na sapase mun wain aken ru opom nge.

⁴³Na tho ini seng ao ako ok Pomnga inina i es me mo i porumtet tho, e?

⁴⁴Na lemik mire ako ong ini ok pomnga inina, eneke ako tho nongpol keum ma ine povothvoth ake a opok lemi, ilemi sivenga ma i siu sia.

⁴⁵Na lom lemi sivengaing i aolonga, eneke lomumo nge ur ako Toko Pomnga i ri nge wong ako aro i velpol nunganga.”

⁴⁶Ma Maria i ri vene: “Lemik i papomnga Toko Pomnga.

⁴⁷Na onik ilemi sivenga nge a God ako ini lek pamimionga.

⁴⁸Eneke ilemi esal tho ini ile umonga vulutnga. Ma i patea ponange na panen naro toko na seng alavusnga, aro o apet tho ini seng ako God i oma senu nge tho.