Ducasën Dada uaid 1:33-48

³³Adec tsusedpa Acobon tsyuecquido ënenquiocquin chuiquid dapa min mado Esus iquendac —quepanëdash Cabaded Madia chiec.

³⁴Adoaquien: —¿Mitsipadentsimbi bacuë usundoshon bacuë tishpe? Chudabicquid nebi —quepanëdash Madia.

³⁵Adoaquien: —Nuquin Papan Mayan mibëdi tabadnuc mimbi tishendac. Aden Nadatiambocquin naidënquio Madia usundomiaid, icsa nibëdquid, Nuquin Papan madombobi nec, utsibon cabededendac.

³⁶Min utsi Edisabed macho icquin bacuë usundoenquiocboedëmbi nëbi bacuë usundoac. Usundoenquiocquid nec, cabededboedëmbi nëbi ushë 6ted nidan usundoac.

³⁷Utsin natiapimbo yaid Nuquin Papan naidquio nec —quepanëdash Cabaded.

³⁸Adoaquien Madia: —Ai, con Icbon namiaidquio nebi. Ma mimbi chiacpadquio icpanuna —quepanëdash. Aden chiaquien Cabaded nidpanëdash.

³⁹Adashic, aton na nacnenanec Madia tsusedpa Udan tsyuecquidon nidaid macuësh yacno badedi nidpanëdash.

⁴⁰Adec nidashic Sacadias oncamenquio yaidën shubu yacno choec puduedshun Sacadiasën chido, Edisabed istuidash: —Mibi isnuec chobi —Madia quepanëdash.

⁴¹Adsho Edisabedën tantianubi aton bacuë comapenec cuididiquiampanëdash. Adec aton bacuë cuididiquenubi Nuquin Papan Mayanën tantiamiac Edisabed

⁴²Madia chiec nadec comapenec onquepanëdash: —Nuquin Papan bëdamboshë icmiaidquio mibi nec. Mimbi usundoaid adembidi bëdamboshë icmiaidquio nec.

⁴³Nuquin Icbon tita mibi yec ¿atotsi quiash ëbi isnuec cho?

⁴⁴Mibi isec chobi, mibi quesho ëmbi tantianubi, Cuishon, quiacbimboec con bacuë cuididiquianosh.

⁴⁵Nuquin Icbon tantiacpadomboen chuisho tantiaquid mibi iquec mibi bëdambo icted-ictedendac —quepanëdash Edisabed Madia chiec.

⁴⁶Adnubien Madia nadec onquec cuëdëmpanëdash: “Nuquin Papan naid chuibanu. Tantia.

⁴⁷Ëbi usundomiaid Nuquin Papa yacno Yuedanquid nec, quequin tantiec bëdambo iquebi.

⁴⁸Ëbi ambi namiaid icsho bëdamboen isquin Nuquin Papan naosh. Adoacsho, Nuquin Papan bëdamboshë icmiaid Madia nec, quequin abitedishunquio tantiabededendac. Adembidi aton tsyuecquidon tantiabededoaic. Nuquin Papa icsaisa iquec. Icsatiapimbo iquec.