Luka 1:33-48

³³Na akuja kuwatawala ujukulu wa Yankubu kwa milele, na ufalume wake aauna mwinsho.”

³⁴Mariyamu akindairi laika ire: “Nipongolaja? Nomi sinamba kumwijiwa nlume!”

³⁵Laika ire akinjibu, akamba: “Roho Takatifu akwisukira, na uwezo wa Mwenye Nkulu ukufinika na kinviri cake. Ndimana, wauja kumpongola‑yo takatifu, akuja kwitiwa Mwana wa Mwenyezimungu.

³⁶Ona, jamaa yako Zabeli, iye novyo kamwimita mwana nlume ingawa koluvala. Akitíwa nata, ewu mwezi‑wu wasita emíte.

³⁷Konta ka Mwenyezimungu, acipo kinu cakunzaidi.”

³⁸Basi, Mariyamu akamba: “Kweli-kwelini, omi niwa ntumisi wa Mola. Vikune kamba vyaunambire-vyo.” Ikisa, laika ire akilawa akuka vyake.

³⁹Nozire suku zire, Mariyamu akilawa, akuka upesi-upesi, upande mmoja uri myango kaya ya Yudeya,

⁴⁰akingira nnyumba ya Zagariya, wakidairiyana habari na Zabeli.

⁴¹Zabeli, nakusikira shauti ya Mariyamu paandairire habari, mwanawe mmatumbo mure katupa, na Zabeli kamwijala Roho Takatifu.

⁴²Akimwambira pakulu-pakulu, akamba: “Uwe ndi ujanliiwe pakulu kuwapunda wanawaka piya! Ajanliiwe ndi wauja kumpongola mmatumbo mwako‑yo!

⁴³Vyakuja kwangu omi kuwoniwa na mama wa Mwenye wangu namunani?

⁴⁴Ona, panisikire shauti yako, kwa mpunde nowo, mwanangu mmatumbo mwangu katikinyika kuwa radi!

⁴⁵Heri ire akubali kuwa vitimiziwe visemiwe kwake upande wa Mola!”

⁴⁶Sambi, Mariyamu akamba: “Moyo wangu unkurisa Mola!

⁴⁷Roho yangu iwa radi kwa Mwenyezimungu, Nvushi wangu.

⁴⁸Kamana kanang'aniza unyenyekevu wa ntumisi wake. Kweli, mwanzo wa sambi‑pa, vizazi piya wanita wakujanliiwa,