Luká 1:33-48

³³Itó mino lúaló moloko Zakoponi agapilamó zuhaloka gizapa oko minanogo ive. Guivahani loló oko minatimó nene asú amoko gamena hána hána mino-loko voko minanogo ive.

³⁴Loko agelómámo lokago, Maliá láa loko lo amimó: Neza vánegi apizeko minamusive. Nenemú nolani gakó nene nana oko alévolé itive.

³⁵Loko lokago, ageló nenémo láa loko lo amimó: Ómasímini Sikalahulímo geí gumupiló liminogo ive, itó Guivahanímini zámuzámo hize lé ogetanogo ive. Nenemú gipa getatanimó nene etó keké vizeko noi gipa Ómasímini gipalave liki linigave.

³⁶Itó makó lo gimitoze, gelezo. Geí zuhagutí Elisapetéma nene gelehosimámo izegipa agatupagi noigo ikani 6 mota vokave. Eza nene gohuna venámave liki nilago izegipalagi minokave.

³⁷Ómasímo loló amiti netala ma nomive. Loló iti netakó nenazo, nenemú Ómasímo Elisapetenimú li gakó mota gihila zekave.

³⁸Loko lokago, Maliá nene neza Guivahanímini gelekelé mohó nounazo, nolani gakó nene ámináminoko utó ino. Loko lokago, ageló nenémo ahulomiake vimó.

³⁹Maliá nene mino hána amike Zutaia mikasiuka agokaloka numuni makó minatoka iteko vimó.

⁴⁰Iteko vike Zakaliani numukú itike Elisapeteni geké lotamó.

⁴¹Geké lomikago, Elisapeteni mulunagutí izegipalama ziginí igo gilimó. Gelekago, Ómasímini Sikalahulímo nene Elisapeteni agikagú lemeko vaí okago,

⁴²gakó napa like láa loko lo amimó: Ómasímo eza vená mukikutí gelémo etó ike nónohá zegimikave, itó izegipa getatanimó nenegi lusa gemikave.

⁴³Geza není Guivahanímini izolagama noane. Vená ánéama nounazo, nanamú nenitoka okane.

⁴⁴Gelezo. Geké nolonetako, izegipa nenémo mulúnegutí agoliza novizike ziginí okago gelekuve.

⁴⁵Itó geza nene Guivahanímo lo gimi gakó vo alitive loko gele alévolé okako, Ómasímo lusa gegimikave. Nenemú gulugo lamaná okave.

⁴⁶Loko lokago, Maliá láa loko limó: Neza nigikatunú Guivahani agepoka noluve,

⁴⁷itó sikalahúnetunú Ómasi nugutó vizeaká vemú nogoliza vizuke agepoka noluve.

⁴⁸Itó gelekelé mohola neza minomo lemeko minumó itínasa nelémoko noitive. Ómasi alévolé ve nenémo nenitoka netá gihila ale utó okamó nenazo, nenemú omolelé amalelé iki mini-liki itita vegenalite nenikumú giliiki Ómasímo lusa geta venale liki linigave. Aí agulizá etó oko neve.