Luk 1:33-48

³³Eka e amitie Yekobe molobseli komok anamabebo, e nakaia unangai kimanino mo blimanomobabo ge baabosea

³⁴Maliao abisake baabanoa Ne imake mo dibim blim bli olole fatnanita ne amunsa namabine? ge baabasoa

³⁵abisake baabonea Gode Hob eta daabkeneta bekebkenebo, Sume titilo gekemano kesoa ob miine dofanemebe nakaia unangai oha bianiba E Gode miin kiningobo ge ohamomabiobe.

³⁶Eka ne weng mako baabkenamabio Ob baabo Lisabeto sino nakaia unangai owe bianiba o fioumobo, memei mo dlanamabobabo ge owe binabibo o konokanobuo otane o amunsa buo alimo 6 blimanobe.

³⁷Gode titilo sbal kesoa inamin namin okoko sino klam tlebuo mema olosa klabianea olosa inanamabebo gesea

³⁸Maliao abisake baabanoa Ne Gode okok unangobo, kobo weng olo baatnenebo Gode emaye inatneneko gesoa abisake deibo onsebe.

³⁹Maliao bianoa mitdanoa monoa beil bibo bib sumo Yuda betan ye unanoa

⁴⁰tamnoa Sekalaiae am tam unanoa Lisabeto baabonoa Ayam biebo? gesoa

⁴¹Lisabeto wentenabua mene amun tem wat doungowasea eka Gode Hobe Lisabeto bekebo bia

⁴²Lisabeto Maliao weng sum baabonoa Obo Gode daabkene kesoa obo seinamabeobe. Unang maki seinino ob seinino gaisenoa ob mene dofanemebe Gode daabanea seinamabebe.

⁴³Obo ne Sume dofanamabeb otane teneba niniin blim unang ne am ele tlebobo,

⁴⁴ne ob wengo wentena bia ne mene amun tem wat seimbianea doungowanebe.

⁴⁵Obo Gode wengo wenteneba e wengo bainobo geneb kesoa Gode daabkenea seinamabeobo ge baabosobe.

⁴⁶Maliao baanoa Ne Sume niniino dobtouleb biania

⁴⁷Gode ne hengmino temo blio nemtlanamabe nakae bobolo fumbiania seinbibe.

⁴⁸Ne niniin blim besa okok unang otane Gode natemnea ne niniino nemtouleb biebe. E titilo sum kesoa e inamin namin kukub olo sum omnebo, nakaia unanga isa i molobseli walo unaib isa baaniba Maliao Gode daabonea seinbinobiobo ge onemomabiobe, Gode niniino kiningobe.