Luka 8:41-54

⁴¹Ehame mitific soŋaŋ moc, ʒâŋene Jairo, e warerâ Jesure maŋfuŋko fodaperâ mu wâsic ecnewec.

⁴²Otâ‐ticne mocjaha jara‐ticne 12 eha hâmozo ehuc fowecte Jesu hefârewec. Eme Jesuzi manarâ rahame ŋic jaŋe roʒâc bâʒâŋiŋ ecnembiŋ.

⁴³Eme ŋondeŋ‐jeŋicko ŋokac moc juwec, e soc rohuc juhame jara 12 ewec. Eme dokta jaŋe bafickeniŋte bâipieku behembiŋ.

⁴⁴Eme ŋokac eki hâcne Jesure râpefuŋko rârâ ŋaqi‐ticne bâuawec. Bâuame izia socticne ʒickewec.

⁴⁵Eme Jesuzi wiorâ muwec: “Mozi bâuacnukac?” Mume ŋic jaŋe micke‐fârepie Petorozi ʒiŋuc muwec: “Qaqazu, ŋic jaŋe roʒâc bâʒâŋiŋ egarehuc heuacguŋgopieŋ.”

⁴⁶Mume Jesuzi ʒiŋuc muwec: “Aricne, moczi bâuacnuhame tâpiri‐nane rame manapac.”

⁴⁷Eme ŋokac e fuŋne‐nane taniŋkekac murâ ɋarac ɋarac qahuc Jesure maŋfuŋko fodaperâ hucticnere dâŋ â bâuarâ izia ɋiɋic qawec irec dâŋ mâmâc mufuame mana‐fârembiŋ.

⁴⁸Eme Jesuzi ʒiŋuc âzâcnewec: “Otâ‐mae, mamanasiŋgere biaŋgukac, buge âke mâteŋkeha rac.”

⁴⁹Iŋuc muhuc domahame mitific soŋaŋte fickonec dâŋ ʒiŋuc warewec: “Otâge hâmokac, irec qaqazu maŋgâŋ mi ecnetec warezejec.”

⁵⁰Eme dâŋ i Jesuzi manarâ soŋaŋ ʒiŋuc âzâcnewec: “Mi hâwicguoc, manasiŋnutec otâge biaŋkeocmu.”

⁵¹Iŋuc murâ ficko fisirâ gâcne hecke‐jareme domahapie Petoro, Johane, Jakobo â naru neŋgoc mamac jahecne jaŋe sawa rocjopame raʒimbiŋ.

⁵²Eme ŋic ŋokac ki mamakuc ehuc domahapie ʒiŋuc jazaweo: “Mi kioniŋ, naru e mi hâmojec, e mâc guŋ fokac.”

⁵³Eme jaŋe hâmo‐jâmbâŋkewec i mana sanaŋkehuc gâwiecnembiŋ.

⁵⁴Eme Jesuzi naru menao rorâ wiracnerâ muwec: “Naru, go faharec.”