Luku 8:41-54

⁴¹Koto tomona꞉ta꞉ hali ma꞉nda꞉ ipikita꞉ mo pi hotu haemeke dana꞉ you hali bikita꞉ Diaitusima꞉ a꞉pa Yesuna꞉ anke teke pa꞉ta꞉ panda꞉ puniao ipika꞉ da pa꞉ta꞉ epena꞉ honke leekeme.

⁴²Pa ekipeke ipika꞉ ota꞉ homeke hayeke bapita꞉ 12 yeeke wandikita꞉ tekesiki pa꞉ta꞉ homuluekema꞉ taapolo pitieke handaa leekeme. Koto leeke Yesu pulu haena꞉ mo wanda꞉hali anekehapu mandane mandane yama꞉ a꞉pa momba꞉laaso hata꞉ Yesu mea daka꞉pa daka꞉pa puluekema꞉ taapemekeme.

⁴³Kutupa mo wanda꞉hali anka꞉lopuna꞉ mo bapi 12 andusa꞉na꞉ we yopu hayeke wanda꞉ ma꞉nda꞉ hayekeme. Ipika꞉ yeni tamba꞉ mina꞉yeke dokeda haliweki pa꞉ta꞉ ipika꞉ mani paeyao hala꞉tiki piekepate ipika꞉ yenita꞉ ota꞉ na epeaeyekeme.

⁴⁴Kutupa mo wanda꞉ma꞉ mo wanda꞉hali anka꞉lopuna꞉ puata꞉ Yesuna꞉ hoki nanema꞉ a꞉pa ipika꞉ dopieke dau honiki wataeyekeme. Koto tomona꞉ kone hande we yapeeke ekita꞉ paeyekeme.

⁴⁵Yesuma꞉ mo wanda꞉hali pa꞉ta꞉ lota꞉ pitolo alota꞉ I̱ta꞉ epima꞉ wataeya꞉pe leekeme. Mo wanda꞉halima꞉ alota꞉ Niki ma꞉nda꞉ma꞉ na wataoma꞉me lemeketa꞉ Pidama꞉ Yesuna꞉ pi hombo peaaso alota꞉ Tekehalio. Do wanda꞉halima꞉ neke mea hopa꞉liao daka꞉paasa꞉ handa꞉e leekeme.

⁴⁶Koto leekepate Yesuma꞉ alota꞉ Ekipeke I̱ tukiki pa꞉ta꞉ ula꞉ honkoputa꞉ ma꞉nda꞉ teke pa꞉ta꞉ puleke handaa ma꞉nda꞉ma꞉ I̱ ota꞉ wataeya꞉me laa loa꞉me leekeme.

⁴⁷Mo wanda꞉ma꞉ Yesuma꞉ I̱ma꞉ pua꞉ ekita꞉ handa꞉ ya꞉ka꞉ta꞉me laa pututuma꞉ homa꞉tia a꞉pa Yesuna꞉ anke teke pa꞉ta꞉ a꞉pa panda꞉ puniaeyekeme. Wanda꞉hali paeyaona꞉ leke tonka꞉na꞉ hata꞉ mo wanda꞉ma꞉ Yesu pa꞉ta꞉ ipika꞉ dau honiki wataeyeke ekina꞉ teke make mo ipika꞉ yeni koto kone paeyekeeki make laa haleekeme.

⁴⁸Koto ekina꞉ta꞉ Yesuma꞉ mo wanda꞉ pa꞉ta꞉ alota꞉ Ya wandikio. Naka꞉ hone tulale ekima꞉ naka꞉ yeni ame do kone mea epeaasa꞉me. Puki lopao pue leekeme.

⁴⁹Yesuma꞉ do pi alo haena꞉ta꞉ hali ma꞉nda꞉ma꞉ mo you halina꞉ da nane hao a꞉pa Diaitusi pa꞉ta꞉ alota꞉ Naka꞉ wandikita꞉ ota꞉ homea꞉me. Mo Disa pa꞉ta꞉ pina꞉ pa paena꞉ lae leekeme.

⁵⁰Koto leekeeki opua Yesuma꞉ Diaitusi pa꞉ta꞉ alota꞉ Paala꞉ma꞉ na homa꞉pee. Hone tulaase hau homeke pika꞉na꞉ta꞉ naka꞉ wandiki sikita꞉ ota꞉ paa tialieke leekeme.

⁵¹Yesu mo da pa꞉ta꞉ opolo pulu haena꞉ mo da tukiki pa꞉ta꞉ta꞉ ma꞉nda꞉ ota꞉ na pena꞉ leekepate pa Pida Dioni Dia꞉mesi make mo wandikina꞉ ateke inkiki yaapo pea Yesu ame̱le̱ da pa꞉ta꞉ honda꞉ pambemekeme.

⁵²Koto da pa꞉ta꞉ pitimiki wanda꞉hali paeyaoma꞉ta꞉ mo wandikina꞉ e̱ alo hata꞉ homa꞉ wia pitimikime. Yesuma꞉ mo wanda꞉hali pa꞉ta꞉ alota꞉ E̱ na lapepe. Do wandiki sikita꞉ ota꞉ na homa꞉la꞉pate pa u peliolo hata꞉ pa꞉la꞉me leekeme.

⁵³Koto leekeeki opuaata꞉ mo wanda꞉halima꞉ta꞉ mo wandiki siki ota꞉ homea꞉eki handemeke ekina꞉ Yesu pa꞉ta꞉ kitaemekeme.

⁵⁴Koto lemekepate Yesuma꞉ mo wandiki sikina꞉ kiki mea wi alo hata꞉ alota꞉ Wandiki sikio. Tiae leekeme.