San Lucas 8:41-54

⁴¹Ijkuakó oajsiko se tlayákanki de n sinagoga non itoka Jairo. Ye omotlankuáketski iyakapa n Jesús iwa okitlatlaujti mawia icha,

⁴²porke sanwel se itakotsi okipiaya iwa yomiktoka, iwa sikin okipiaya májtlaktli iwa ome xiwitl. Ijkuak Jesús yoyaya icha n Jairo, miakeh tlakah okikuitlapantokakeh iwa sa okipajpatsoayah.

⁴³Iwa intlajkotiah n tlakah noiwa oyaya se siwatl non yokipiaya májtlaktli iwa ome xiwitl ika esmilawálistli, iwa amaka oweletia okipajtiaya.

⁴⁴N siwatl omijkuanijtia ikuitlapa n Jesús iwa okitempantelkoli itlake, iwa san nima iesmilawalis omóketski.

⁴⁵Ijkuakó Jesús otlájtlanki: —¿Akin onechtelko? Kemi nochteh okijtoayah amo okimatiah akin okitelkojka, Pedro okijto: —Tlamachti, nochteh n tlakah mitspajpatsojtiwitseh iwa mitstojtopejtiwitseh, iwa Te titlajtlani: “¿Akin onechtelko?”

⁴⁶Pero Jesús okijto: —Aka onechtelko, porke onikmachili notech okiski nochikawalis.

⁴⁷Ijkuak n siwatl okitak Jesús yokimatia akin okitelkojka, bibiokatiwits omotlankuáketsato iyakapa. Iwa inmixpah nochteh n tlakah okimokuiti tleka okitlakentelko n Jesús iwa kenijki san totokatijkak owalpajtik.

⁴⁸Ijkuakó Jesús okili n siwatl: —Nokone, axa yotipajtik porke otitlaneltokak. Xio ika pakílistli.

⁴⁹Jesús ok otlajtojtoka ijkuak okalakiko se itlakewal n Jairo non okiliko: —Motakotsi yomikki, ayakmó xiktekimaka n Tlamachti.

⁵⁰Pero ijkuak Jesús okikak tlan okiliko n tlakatl, okili n Jairo: —Amo ximawi, te xitlaneltoka, iwa motakotsi pajtis.

⁵¹Ijkuak Jesús okalakito icha n Jairo. Amo okitekawili makalakikah oksikimeh, sanwel Pedro, Jacobo, Juan iwa itajwah n takotsi.

⁵²Nochteh omoyolkokojtokah iwa okichokilijtokah n takotsi. Pero Jesús okinmili: —Amo xichokakah; n takotsi mach omikki, sanwel kochi.

⁵³Pero n tetlajpalojkeh san okiwetskakeh n Jesús porke okimatokah n takotsi yomikki.

⁵⁴Ijkuakó Jesús okimakitski n takotsi iwa okili: —Takotsi, ximewa.