LUCAS 8:41-54

⁴¹Lex wdxiin te mén ne la Jairo ne rnebééy lenydoo, wzuzhib men wnab men lo Ne ne tsa Ne ruxyuu men,

⁴²porke rap men te xsaap men ne rap zeg chibtxup iz, mer mer guet nzeb. Ne za Ne nëz, kesentyent ndalyaa mén zanal Ne, noze reen men Ne.

⁴³Lad yra mén guin za te wnaa ne rzhuun, che wzaa chibtxup iz ryab men ren, no che wluzh men yra ne rap men por ne ra men lo doctor; per ni te men wundet gan nneseyaken men.

⁴⁴Wbig wnaa guin nes zhich Jesus, wtee nya men luzh xab Ne. Orgueguin wyaag men ren.

⁴⁵Lex wnabdiiz Jesus, re Ne: ―¿Txuzh wgal led noo? Kom yra mén re: “Ruttee”, wke Bëd yra Bëd xkompanyer Bëd, re Bëd: ―Maxter, noze reen mén de, noze rtxaap men de, no le de rnabdiiz gan txuzh wgal led de.

⁴⁶Per wke Ne re Ne: ―Nuu mén wgal led noo, porke wyenen noo ne wruu xfwers noo.

⁴⁷Chene wyenen wnaa guin ne wyenen Jesuso, wa men noze rzhiz men, wzuzhib men lo Ne. Lex wxalruu men nes lo yrandxee mén, gan penak wgal men luzh xab Ne no ne orgueguin wyaken men.

⁴⁸Orguin re Ne lo men: ―Zhiina, por ne wlaleedx de noo, wyaken de. Zhaas gugya.

⁴⁹Benak kanii Ne lo men, chene wdxiin te xpén Jairo, re men lo Jairo: ―Le xsaap de che wet. Gunendetre de lo Maxter.

⁵⁰Per chene won No, re Ne lo Jairo: ―Ydxedet de; noze gulaleedx noo, syaken xsaap de.

⁵¹Chene wdxiin Ne ruxyuu Jairo, wdeedet Ne si ndenal ndal mén Ne lenyuu, nonchee Bëd no le Jacob no le Xwa no le xegwzan mëëd guin.

⁵²Yrandxee mén ne ndxin baanske rlaa men, roon men por mëdgwnaa guin. Per re Ne lo men: ―Goondet de; wetet nzaap gwa, noze nexguees nzeb.

⁵³Per lel wzhidxno yra mén guin Ne, porke nan men ne che wet nzeb.

⁵⁴Lex wnëëz Ne nya nzaap guin, ndípse wnii Ne, re Ne lo nzeb: ―Nzebwin, gutsaxee.