لُكِ 8:41-54

⁴¹سَلِدٍ يَرٍرَتِ ندٍ نَشَ قَ عَ شْن نَشَن نُ شِلِ يَيِرُ. عَ نَشَ قَ عَ سُيِدِ عِسَ بّ، عَ عَ مَيَندِ عَ شَ سِفَ عَ شْنيِ،

⁴²بَرِ مَ عَ شَ دِ فِنّ كٍرٍنيِ نُ قَ نَ قَشَقٍ نّ. عَ حّ كْنتِ نُ بَرَ حّ قُ نُن قِرِن حْندْن لِ. عِسَ تٌ نُ سِفَقٍ يَيِرُ شْنيِ، حَمَ فبٍفبٍ نُ نَ عَ شّتّنقٍ.

⁴³فِنّ ندٍ نُ نَ عٍ يَ مَ نَشَن شَ كِكٍ وَلِ مُ نُ عَ عِتِمَ حّ قُ نُن قِرِن بُن مَ، مِشِ يٌ مُ نْ عَ دَندَندٍ.

⁴⁴نَ فِنّ نَشَ قَ عِسَ شَنبِ رَ، عَ عَ بّلّشّ دِن عَ شَ دٌنمَ سَنبُنيِ رَ. كٍرٍن نَ، عَ شَ كِكٍ وَلِ نَشَ دَن.

⁴⁵عِسَ نَشَ مَشْرِنيِ تِ، «ندٍ دِنشِ ﭑ نَ؟» بِرِن تٌ عَ قَلَ عَ عٍ تَن مُ عَ رَ، ثِيّرِ نَشَ عَ قَلَ عِسَ بّ، «كَرَ مْشْ، حَمَ عِ رَبِلِنشِ، بِرِن نَن عِ شّتّنقٍ!»

⁴⁶كْنْ عِسَ نَشَ عَ مَسٍن، «مِشِ ندٍ بَرَ دِن ﭑ نَ، بَرِ مَ ﭑ عَ كٌلٌن سّنبّ ندٍ بَرَ مِنِ ﭑ قَتٍ.»

⁴⁷فِنّ تٌ عَ كٌلٌن عَ عَ مُ نُ نْمَ عَ نْشُندٍ، عَ نَشَ قَ عَ سّرّنمَ، عَ سُيِدِ عِسَ بّ. عَ عَ بّلّشّ دِنشِ عَ رَ قٍ نَشَن مَ، عَ مَن يَلَنشِ عَ عِكْرّشِ رَ كِ نَشّ، عَ نَشَ نَ بِرِن تَفِ رَبَ حَمَ يَ شْرِ.

⁴⁸عِسَ نَشَ عَ مَسٍن عَ بّ، «ﭑ مَ دِ فِنّ، عِ شَ دَنشَنِيَ بَرَ عِ رَيَلَن. سِفَ بْحّسَ كُي.»

⁴⁹عِسَ تٌ نُ وْيّنقٍ، مِشِ ندٍ نَشَ قَ كٍلِقٍ سَلِدٍ يَرٍرَتِ شْنيِ، عَ عَ قَلَ عَ تَن يَيِرُ بّ، «عِ شَ دِ فِنّ بَرَ قَشَ. عِ نَشَ كَرَ مْشْ تْورْ سْنْن.»

⁵⁰عِسَ تٌ عَ مّ، عَ نَشَ عَ مَسٍن يَيِرُ بّ، «عِ نَشَ فَاشُ. عِ شَ دَنشَنِيَ تُن. عِ شَ دِ كِسِمَ نّ.»

⁵¹عِسَ تٌ يَيِرُ شْنيِ لِ، عَ مُ تِن مِشِ يٌ شَ سٌ بَنشِ كُي قٌ ثِيّرِ، يَيَ، يَكِ، دِ فِنّ بَبَ نُن عَ نفَ.

⁵²عِسَ تٌ عَ تٌ بِرِن نُ وَقٍ دِ فِنّ شَ قٍ رَ سُننُنيِ كُي، عَ نَشَ عَ مَسٍن عٍ بّ، «وٌ نَشَ وَ. يِ دِ فِنّ مُ قَشَشِ شّ، عَ نَ شِقٍ نّ.»

⁵³حَمَ نَشَ يٌ عِسَ مَ، عٍ عَ مَيٍلٍ، بَرِ مَ عٍ نُ عَ كٌلٌن عَ تّمّدِ بَرَ قَشَ.

⁵⁴كْنْ عِسَ نَشَ تّمّدِ بّلّشّ سُشُ، عَ عَ قَلَ عَ بّ عَ شُي عِتٍشِ رَ، «ﭑ مَ دِ، كٍلِ!»